La Usc di Ladins

La situazion dla scoles ne n’ie defin nia saurida: no per la direzions, la nseniantes y i nsenianc, ma niancanó per i sculeies y i genitores. Ntervista ala presidënta dla Consulta provinziela di Genitores dla Direzions dla Scoles y Scolines Ladines, Noemi Frontull.

La Usc di Ladins: Coche presidënta ëis dessegur rujenà cun i reprejentanc di genitores de duta la scoles y scolines ladines, cie se n diji pa?
Noemi Frontull: Sci, la ntendënta Edith Ploner me à prià bel de ti fé a l savëi coche la buta cun l nseniamënt da dalonc. Nscila éi sambën cialà de abiné adum l plu minonghes y esperienzes che l fova mesun. L ie unit adum truepa nfurmazions dessegur de utl per l’enes che vën, dantaldut sce la scoles ëssa da resté stlutes mo plu giut de chël che n minova tl prim.

Cie se n dij pa i genitores?
Tla Consulta ons genitores che reprejënta duta la scoles y scolines. Uni scola, uni età y uni realtà a si bujëns y si problems. La prima tëma de truep genitores ie sambën chëla de ne vester nia for al’autëza dl lëur da maester de si mutons. Pona iel nce truep lims tla hardware, ti njins, che n à te vel’ cësa.

Scumencion dai mëndri.
Tla scolines vëijen dantaldut che ai mutons ti màncel l jì a scolina, l urté i cumpanies, l’ativiteies d’uni sort che la scolines pitova, dantaldut alalergia.
Tla elementeres y mesanes vën l cuntat danter maestri/es y sculeies/ées tenì dantaldut tres e-mail y telefonn. Chësc ie scialdi costrutif, l cuntat persunel danter nsenianc y sculeies vën a chesta maniera miëur y l studië renfurzà. La mutans y i mutons mpera a se deriejer y vën plu autonómes.

Co ie pa la cunlaurazion?
Coche presidënta dla Consulta di Genitores dla Direzions dla Scoles y Scolines Ladines ulëssi tlo tò l’ucajion per rengrazië dut l personal de nseniamënt, la diretëures, i ispetëures y la ntendënta per l bon lauré deberieda. Nëus genitores son for cuntënc che n à n’urëdla davierta per nosta ideies y nosc bujëns. Speron sambën che n posse tosc inò jì de reviers al lëur de scola coche fan usei mo dan n valguna enes.

La ntervista ntiera ie da liejer tla edizion stampeda di 10 de auril.

Simon Peter Moroder

FOTO:
Noemi Frontull, presidënta dla Consulta provinziela di Genitores dla Direzions dla Scoles y Scolines Ladines.