La cultura di ladins al luster a Roma

Data

18 de merz 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L gran patrimonie no materièl fat de storia, lengaz, saores, mic e esprescions artistiches del raion ladin vegn prejentà en sabeda ai 18 de mèrz al MAT, Museo Arti e Tradizioni poolari, te la capitala de la Tèlia.


Ai 18 de mèrz ló dal Museo delle Civiltà - Museo Nazionale delle Arti e Tradizioni Popolari de Roma, l'é n event dedicà ai ladins. L'é stat endrezà da l’Istitut Cultural Ladin de Fascia tel chèder del projet “Gli Italiani dell’Altrove” metù a jir dal BIA de Milan (Beni Immateriali ed Archivistici) en colaborazion col Museo delle Civiltà e l’Istituto Centrale per la Demoetnoantropologia de Roma.

L projet, envià via del 2012, l’é vegnù vigni an più gran e rich de grà a scontrèdes dedichèdes outa per outa a una de la mendranzes storiches de la Tèlia, col zil de meter al luster sia realtà storica e chela d’aldidanché, pean via dal patrimonie culturèl no materièl.

A la dì dedichèda ai Ladins de la Dolomites tolarà pèrt desvalives studiousc, enrescidores e artisć che à studià l raion ladin aldò de la lejendes e de la contìes, zis leèdes al teritorie de la Dolomites, e che i é stac bogn de les tramudèr en èrt, letradura e musega.

Averjarà la scontrèda i saluc di raprejentanc istituzionèi anter chisc, per la delegazion ladina, Bepe Detomas, assessor a la mendranzes linguistiches de la Region, Mariagrazia Santoro, presidenta de la Fondazion Dolomites Unesco e Milva Mussner, presidenta de l’Union Generèla di Ladins dla Dolomites.

Fabio Chiocchetti, diretor de l’Istitut Cultural Ladin, rejonarà de Lengaz de la mère – mère tera, e dò vegnarà moscià l film-documentèr de Piero Badaloni Gli abitanti dell’arcipelago.

Se jirà inant con na degustazion di saores ladins endrezèda dal chef Sergio Rossi de Fuciada, e domesdì l scritor Roland Verra rejonarà di mic ladins e vegnarà endrezà na meisa torona con l’antropologh Cesare Poppi, Pietro Badaloni e etres esperc.

La dì la se serarà sù col conzert del trio Ganes, musizistes de nonzech de la Val Badia, che les prejenterà sie ùltim CD dal titolo “An cunta che…” ispirà belapontin a la contìes de la Dolomites.

L’Istitut Cultural de Vich à portà a Roma ence na picola espojizion de publicazions e materièi multimediai per duc chi che volessa aer maora informazions su la mendranza ladina.

Depiù su La Usc stampèda di 17 de mèrz.



 (lg)