Por ne spaterlé nia da mangé

Data

31 de dezember 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
San Salvester y Nanü, deboriada cun les festes da Nadé, é dis olache al vëgn mangé deplü co zënza. Por l’ann nü valgügn consëis por ne spaterlé nia mangiaria, coiüs adöm dala Zentrala di Consumadus.
Savôse che sce an vá a cumpré ite canche an á fan, cumpron gonot demassa y che sce an se fej na lista, ne cumpron nia patüc surafora o che ne vá nia debojëgn? Trëi consëis por ciaré da ne spaterlé nia patüc da mangé te nostes ciases.

1. I planifichëii canche i vá a cumpré ite y ci che i vá a cumpré ite!
I ciari avisa ci che i adori veramënter y me feji na lista di produc che i mëssi cumpré ite. Por na sigüda dái ciamó n’odlada te frescara y te stangode de ciasadafüch. I ne vá nia a cumpré ite cun fan, por schivé da cumpré massa patüc de resserva. Te botëga cumpri te na manira consecuënta, cun püces ezeziuns, ma ci che é sön lista. I ne tëgni nia cunt de ofertes ”Tol 3, paia 2!” sce i n’adori ma un o dui toc dl produt. Sce al röia manco patüc da mangé tl refodam, restel inultima plü scioldi te tacuin.

2. I ti á crëta a mi sënsc!
Sce n produt vá sura la data de dorada minima y i ne sá nia sce an pó bëgn ciamó le mangé o no, le controlëii cun mi sënsc: impröma ti ciari avisa, spo tofi y inultima cërci. Sce i ne vëighi nia che salta tl edl y degönes anomalies, pón mangé le produt y i m’l lasci savëi bun.
La gran pert di produc che á na data de dorada minima (Mindesthaltbarkeitsdatum) é ince ciamó da podëi mangé do che la data lassura é tomada, en pert cinamai por mëisc dedô - tan inant che ai n’é nia ciamó gnüs dauris y ai é gnüs tignis sö sciöche al alda. Ma pro alimentars cun na data de tomanza (Verbrauchsdatum ”Zu verbrauchen bis...”, data di scadenza ”da consumarsi entro...”) velel: do che ai é tomá ne dessi nia plü gní mangiá o boiüs.

3. I adori sö i avanc de patüc da mangé!
Por schivé che al sides tröc avanc ciari da cujiné aladô dl bojëgn, ciaran da ne fá nia massa de gran porziuns. Sce al avanza impó ciamó val’ iade valch, tëgni sö i avanc al frësch y i ciari da i adoré sö defata. Sce al avanza tratan l’edema de pices cuantités de pasta, soni cöc, riji, verzöra o früc da cose feji impara n ”grestl dl’edema” che i perfezionëii cun n pü’ de ciajó o n ü. Sce i á cumpré massa pan feji sones impara o te de pici cadrí, i le lasci gní sëch - insciö se conservëiel plü dî - y i le tëgni sö te n bosse. Cun les sones de pan pói spo fá n iade o l’ater val’ d’extra impara, y le pan taié sö adori sciöche pan da bales. Implü pón ince fá frogores fora de pan vedl sëch sce an le mëna jö cun la mascin dala cern o le lascia spidicé sö te n moscedadú eletrich. Te restorant o te ostaria me lasci fá ia ci che i á avanzé y m’l toli a ciasa.

Galaria retrac