Nia boc l’ùltim de l’an!

Data

30 de dezember 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Chesta usanza no ne partegn, la porta dejèjes per la jent de età, i malé la besties e la crea problemes per chi che laora per noscia segureza. L’UAL con Michele Anesi ence chest an auza fora l’apel.

Ence chest an, spetan la net de l’ùltim, se à levà semper più adaut la oujes contra la pratega de sbarèr e empeèr feghes l’ùltim de l’an: na “moda” che fèsc sprigolèr debel la besties, tant te cèsa che tel bosch, ma ence la jent de età o malèda, e che de segur no la partegn a noscia tradizion.

Descheche sozet oramai da vèlch an en ca, se à levà ence la ousc de l’Union Autonomista Ladina e de sie secretèr politich Michele Anesi per dir adaut che l respet per la Dolomites, per nosc ambient e per la besties, ne domana de lascèr sù chesta pràtega pech zivila. “Cognon respetèr e amèr nosc teritorie e noscia cultura” disc Anesi: l’é n messaje che se pel veder semper de più, sui media e sui social, ma soraldut te la comunicazions de l’Unesco Patrimonie de l'umanità. La filosofìa de la Fondazion Unesco envìa la popolazions a rencurèr e stravardèr sie patrimonie natural e cultural. I feghes de l’ùltim de l’an - disc Anesi - i met en pericol chest stravardament, l’é na usanza che no à nia a che fèr con la jent da mont e che la raprejenta n perìcol per desvaliva situazions. A cauja de chesta pratega zenza fondament dotores e infermieres cogn se dèr jù a “concèr ite” dans e ferides a gregn e pìcoi; i malé e la jent de età vegn desturbé, la besties se sprigolea e vèlch outa les pel aer ence reazions tragiches; en ùltima, ma no per emportanza, i studafech enveze che poder se goder chela sera con mìngol de serenità i cogn stèr dò e dò taché te sia radio per tema de cogner jir coran a studèr n fech.

Zaolà l’é ordenanzes che descomana i boc, ma ampò daperdut l respet per nosc teritorie cognessa ne emponer de renunzièr a na pratega che no partegn al spirit de viver la marevees de la mont. Amò apede - fenesc fora l secretèr de la UAL - i scioldi che se sparagna a no comprèr i feghes i pel vegnir spenui per vèlch da n muie più gustégol e enteressant per recordèr al miec i dis entorn Nanef passé te la Dolomites, o per didèr zachei che à più de besegn. Duta la manifestazions te noscia valèdes arà l medemo ejit ence zanza boc!

 (lg)

Galaria retrac