La ligrëza dl vire

Data

03 de jené 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
I jun tl ann nü cun valgünes reflesciuns de Karin Pizzinini sön la belëza, la reconescënza y la manira de odëi les cosses.
Tratan na bona pert dl isté ái la poscibilité da jí a pe sö por munt, por la maiú pert cun grups de sciori da vigni pert dl monn, por ti mostré n valgügn di plü bi ciantuns de nostes Dolomites. Chisc á por me n grandiscim valur y se mirita da gní respetá y tignis da cunt. Poester deache al é mi daciasa, deache i sun chersciüda y á la fortüna de podëi vire chiló, vel chisc posć ciamó deplü por me. Ince sce i i vëighi vigni de, ne me stüfi mai da chirí ti chedri che i á incër me ia i mudamënc dles sajuns y dles löms, i ti ciari vigni iade cun edli nüs, y al me sá tres danü tan bel, che i sinti datrai cuaji le bojëgn da scraié dala ligrëza. Avisa chësc é chël che i oress ince dé inant, y i me prôi da le fá fora dal cör. Por me é le respet por la natöra nia d’ater co n spidl che vá man tla man cun le respet por les porsones y i valurs dla vita, cun chi che i á podü crësce sö, sciöche l’amur, la generosité, la fedelté, la lealté y d’atres.
Do ti avëi dé a mi ghesć les prömes spligaziuns sön nüsc traverc dl de y les particolarités dl post, che i implirá man man che i rovun inant, piunse ia bel plan, le ritm dl fle aumënta y vignun se perd n pü’ te sü pinsiers. I ne sá nia ciamó ci direziun che i mi tolará, mo de na cossa sunsi sigüda: i fajará döt ci che i pó por che les porsones che é cun me se rëndes cunt dles belëzes che i un incër nos ia. Al mëss ester i agn che passa, che me fej tres plü gonot ponsé zoruch y recordé le tëmp dl’infanzia y dla jonëza, cun n pü’ de incherscimun por la maiú scemplité, cun chëra che an fajô y tolô sö döt cant. Cun i recorc se descëda ince les emoziuns y se scialda le cör. Al me pé che chësc bun cialt incër le cör ia sciampes aldedaincö tres plü dalunc, sides tres plü rî da abiné. I raporc danter les porsones é gnüs plü assöc, se limitëia al’essenzialité de ci che an á da fá, cuaji fina a rové al’aroganza. Al vëgn brontoré y critiché deplü, te na manira püch costrutiva, che ne dëida nia mioré y ne fej nia ponsé do, mo provochëia na cuntrareaziun dla medema sort, cherian n cërtl vizius. Ci che an fej vëgn gonot fat cun na odüda che ne vá nia iadelá dla piza dl nes y scialdi egoistica. Mo deache i á la fortüna da ester nasciüda y podëi vire te n pice ciantun de paraisc, me savessel massa sciode da me lascé sciuré sura le ce jö chël mantel grisc y pesoch, y i me tëgni tocia la speranza che döta chësta belëza mantëgnes via ince la löm ti cörs dles porsones che vir chiló.

ESTER RECONESCËNC
Canche i deuri i edli da doman y i vëighi les pizes di crëps che slomina sciöche sce le sorëdl gniss da daíte fora, me sinti implida da na gran reconescënza. Cun la reconescënza él na te’ cossa: sce an mët n iade man impara, spo....

Döt le pinsier podëise lí t’La Usc di Ladins di 5 de jená 2018, olache i ciafarëis ince fotos dër particolares fates dal’auturia.  (karin pizzinini)

Galaria retrac