Siria: P. Firas Lutfi te Fascia

Data

14 de auril 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks

Endèna che i eies de dut l mond vèrda a la situazion dramatica de la Siria, a Poza, Soraga, Sèn Jan e Pera se pel sentir la testimonianza del francescan de la gejia cristiana de Aleppo. 

Anter i personajes che ne à didà e pel ne didèr a capir la senestra e dramatica situazion de la Siria, l’é Pare Firas Lutfi, frate francescan sirian de la Custodia de Tera Sènta che porta inant sia atività pastorala te la parochia de Aleppo. 

P. Firas l rejona delvers talian, ence te chisc dis passé l’é stat chiamà te la trasmiscion de RAI1 “Radio anch’io” per portèr sia testimonianza e l’à contac con don Andrea Malfatti, piovan te Fascia. 

Apontin anché, che la tenjion e la cuses de doura de èrmes chimiches é crepèda fora con l’atach de l’America (adum con Franzia e Gran Bretagna), P. Firas rua te Fascia e per noscia jent chesta l’é dalbon na gran oportunità de saer e capir vèlch de più, scutan la testimonianza de chi che la grieva situazion de la Siria i la vif de persona da egn, de n om de gejia, che no à enteress a secodir l’informazion strumentalisèda e de spes faussa che ne rua sun chi fac. 

La doura de èrmes chimiches l’é n delit contra l’umanità ma l fat l’é che la gran potenzes del mond à dut l’enteress a fèr la vera te la Siria. Na vera  che i é dò a fèr sul cef de la popolazion, de femenes e de bec, no con l’obietif de didèr chesta jent, ma per secodir enteresc economics, raporc de forza politics nazionèi e internazionèi, marcià de la èrmes. 

“Gé son da la pèrt de la jent, de mia jent – disc P. Firas – no son n om de politica, e no son n espert per poder dir se e chi che à durà èrmes chimiches, ma no aon ogetivamenter proes de chi che les aessa durèdes. Te chesta vera te la Siria l’é stat durà, da na pèrt e da l’autra, vigni vertola per portèr inant ogneun si enteresc e obietives, a descapit de la jent.

I disc che la storia la é maestra de vita, purampò no l’é la pruma outa che i Stac Unii peissa de ressolver i problemes politics con la èrmes, l’aon jà vedù per ejempie te l’Iraq e te la Libia, ma nesciun problem politich pel vegnir ressolt con la èrmes, chesta situazions se cogn les ressolver con l dialogh.

Ades a Aleppo la situazion la é n muie grieva, la jent é destrametuda, l’à jà padì 7 egn de vera, l’à vedù n muion de morc e de sanch, zenza che chest sie servì a nia. E ades i cogn ence veder che i “gregn” de la tera i se met a “jièr” a la vera sun sie cef, per desmostrèr de esser forc. Chest zozet, tant da na pèrt che da l’autra, e endèna la jent cogn padir.

Che pélel vadagnèr i siriegn da l’atach de Trump? I vadagna demò n Paìsc amò più martorià e destrut de coche l’é ades.”

Ma la paroles no bèsta a empeèr na pìcola lum de speranza per la popolazion de la Siria. Per chest P. Firas Lutfi, ensema con l Gran Muftì de Aleppo i se à metù adum per didèr i bec de Aleppo col projet “N inom e n davegnir”. Se pea via da l’inom, percheche a n muion de bec siriegn ge vegn neà ence l prum e fondamentèl derit, chel de poder vegnir scric ite al register anagrafich, de esser recognosciui, donca de “esister”.

De dut chest ne rejonarà P. Firas, anché, sabeda ai 14 de oril, endèna la messa de les 18.00 a Poza, e doman, domenia ai 15 de oril, endèna la messes da les 9 da doman a Soraga, da les 10.30 te la Pieif de Sèn Jan e da les 18.30 a Pera.  (Lucia Gross)