Comentar de Pruma

Data

25 de mei 2018

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Cuntribuc y turism y ladins
Tla provinzia de Bulsan ài ulù taië i cuntribuc per l svilup turistich, dantaldut te nosc raion, ajache l raion ie cunscidrà "sëura-svilupà". Na logica, chëla dla Provinzia, che vel bele da ntëur a n vint ani incà, da ulache l vën ora, dantaldut per i raions ladins, che "ëis bën scioldi assé, ne adurvëis perchël nia deplù scioldi, che jissa contra la logica soziela de ti judé a duc, dantaldut a chiche à plu debujën."
Na logica, chësta, che ie me feje for ert a ntënder. I raions ladins à bën la fertuna de avëi la plu bela cuntreda dl mond, ma i ladins à pa bën nce sapù da lauré, per se fé su la nfrastrutures.
Na regulamentazion rateda tan sota - coche metuda a jì dala Provinzia de Bulsan ma bonamënter
nia mé - semea bën che la ebe na si fundamënta, bela scëmpla. Ma la cossa ie do mi ntënder, sce son bele tl lëur de scemplifiché, n mumënt mo plu scëmpla: la va de cunscidré la pert de nduzion, de "indotto", che l'economia mascimamënter tla valedes ladines porta. Ulons'a lascé valëi la logica dl 90 percënt de chëutes te Südtirol, nce per l livel de chëutes generedes tla Ladinia? Bonamënter bën sëura i cater y mez percënt aldò dla cumpededa dla populazion, per Südtirol ma ratësse nce per l'autra valedes ladines! Per ne dì nia: vëniel pa bën arjont, per i ladins, l percënt de cuntribut tl sustëni publich culturel y soziel, aldò de na logica pruporziunela?
Tlo fóssel da fé n trëi conc, da pert de nosc berbesc y de nosta andes dla politica, dan jì a taië l sustëni sun mesura al'economia, che ie nce sustëni soziel, tan deplù sce mutivà dala induzion economica di ladins. Y i nvestimënc turistics possa, nce sce l semea n parados, zënzauter nce avëi na si azezion de ambient, de sustëni per la cuntreda y la natura, y monce per la cultura, y da nëus la cultura ladina!
Persunalmënter me sàl, - ma l sarà bën che son tan n gran iniurant n materia - che zachei se feje si nteresc dovia, ntan che ne son, coche ladins y coche politica ladina, nia boni de fé valëi nosta rejons. Dant sons bën mo a una che l vënie taià i cuntribuc te cër' ciamps dl'economia, nce - per tré su bele inò na cuestion che ne son gordenó bon de dlutì - che i nes mëte da sëurajù raions de marketing che va da Fie nchin tl Ahrntal, y nëus che se cufon bel valënc a rengrazië, ntan che nosc esperc de marketing muessa ti spieghé l "andazo" ai gran esperc nueves de marketing de raions y strutures per definitionem nia omogenns, ma te na logica da sëurajù, de na omogeneità istituzionela, ma che ne tën - l me desplej a l dì - nia cont dla realtà ladina.  (de David Lardschneider)