Formes e colores de Matthias Sieff e Dario Bosin

Data

14 de jugn 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Na beliscima mostra al Museo d’èrt comtemporana de Ciavaleis met dant la scultures de fegura carateristiches del zipiador da Ciampedel e i chèdres astrac del pitor da Pardac.



L’é dalbon na marevea la neva esposizion de “Art Box Avisio”. L Museo d’èrt contemporana de Ciavaleis ge à dat lèrga a doi artisć de ezelenza te chesta 3^ edizion del scrign che dal 2016 en cà met al luster la produzion artistica de la valèdes de la Veisc, dassen rica e de valuta, cresciuda de grazia a la Scola d’èrt de Fascia. Dò aer vedù ti egn passé Mariapia Desilvestro e Tiziano Deflorian, e dapò Lara Steffe e Miriam Weber, chest’outa l dialogh che ne vegn proponet te l’alestiment da Elio Vanzo e Alice Zottele l’é chel anter Matthias Sieff e Dario Bosin.
Matthias Sieff l’é da Ciampedel e dò l diplom a l’Istitut d’èrt Soraperra l se à perfezionà te la scultura de fegura a Selva, emparan delvers l’anatomìa de om e femena, e dapò l se à laureà a Viena, olache l’à emparà a jir aldelà de la tradizion e de la fegura classica.
Te sia òperes, en gran pèrt monumentèles, l’à arjont n stil personèl che se tol fora de anter e se fèsc cognoscer sobito e l’é dò a se vadagnèr n nonzech e n aprijiament semper maor ence foradecà.
Dedant a la Reìna e l Re, en vender ai 8 de jugn, Matthias Sieff e Dario Bosin, ensema con l curator de la mostra Elio Vanzo, i à podù didèr l publich a vardèr la òperes metudes fora con n eie più ascort, per descorir neves aspec e deschiarir percorsc e segnificac.
Te la desvaliva sales la òperes de Sieff e Bosin dialoghea delvers, en armonìa o en contrast de formes e colores, e en ùltima te la doi sales sunsom ogneun di doi artisć à sie spazie per poder palesèr fin junsom sia èrt.
La esposizion de Sieff e Bosin resta fora tel Museo de èrt contemporana d Ciavaleis enscin ai 24 de jugn e se pel la veder de vender sera da les 21.00 a les 23.00 e de sabeda e domenia domesdì da les 13.50 a les 19.00.

De più te La Usc stampèda de vender ai 15 de jugn.





 (lg)