Se saré daite

Data

06 de messel 2018

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Comentar de pruma, de Pablo Palfrader
La crisa di migranc á metü l'Europa söi jenëdli y ti á dé gran fle a scraiuns y populisć. I tonns vëgn tres plü groi, meton al prigo libertés che an á albü agn da arjunje. Öna é chëra da s'armöie lediamënter danter i stac dl'Uniun Europeica. Na liberté che é plü co mai sön iames debles. Danter la tëma da migranc y chëra da terorisć ó l'Europa sconé damí i confins y se saré daite. Tl'Europa instëssa vára spo inant. L'Inghiltera á lité le Brexit y ó se saré daite, l'Ungaria de Orban tira sö mürs y ó se saré daite, tla Germania ó la CSU de Seehofer desgorje migranc te Paiern y se saré daite. Sön chësta él ince l'Austria de Kurz che ó controlé sü confins a süd y se saré daite. Le Minister dl Intern Salvini ne lascia nia plü arsí bastimënc de migranc y vëiga de bun edl i controi söle Prener. Al ó se saré daite ince ël. Te Südtirol él partis che tirass plü ion sö n mür a Salurn y oress se saré daite. Al mancia madër che Gherdëna fejes sö n mür sön Ju de Frara, la Val Badia a Peraforada, La Pli a Curt, Badia jön Punt de Fer y Corvara a Punt da Bos. A chësc punt podesson ince se saré daite te ciasa y por na sigüda me sari ciamó te mia ciamena. Dailó destödi ma ince la löm, por ne messëi nia me temëi da mia ambria. I scraiuns á dagnora albü parores che la jënt orô aldí, cun resultac gonot catastrofai. Porchël: ponsun sura, denanche tlocené.