Comentar de Pruma

Data

13 de messel 2018

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Tant vel pa aldidancuei n "Di dla Unité Ladina"?
Al é baldi n 'di spezial' soul tl erch de n ann, olache la jent ladina se recorda de ester na popolazion, con la carateristica y richeza de n si lingaz y na sia cultura y storia. Chest di invieia de s'enconté, soura les vals y i confins, dalonc da cie che despartesc. L "divide et impera" proclamé y metú en at anter la Pruma y la Seconda Vera á fat n gran dann nia demé al lingaz ladin, ma dantaldut ai cefs dla jent y al spirit de apartenenza.
L "divide et impera" resta en funzion inant y broa di per di, basta pensé a les politiches, y a la politica, che despartesc for ciamó con nia reconesce la "koiné ladina" (ladin dolomitan), con nia reconesce l'Union Generela di Ladins dla Dolomites sciche raprejentazion ofiziala de chesta nosta popolazion dl lingaz plu inravisé dles Alpes. I on poscibeltés y ence leges (p.ej. la fondazion dla Lia di Comuns Ladins) che podess nes uní cotant deplú y aficé a na colaborazion te trueps ciamps y tles problematiches, ma sce les "volontés" politiches da chiló y iló ne ti dá nia l'atenzion y l'atuazion pratica y reala, resteles sun l papier, y les divergenzes anter i ladins y sies valedes azelereia inant. L "Di dla Unité Ladina" n'é perchel nia demé na ocajion per recordé chela sona de unité ladina che é steda bona da souravive con duc i "divide et impera" enfin sen, ma ence per revendiché i valours de chel liament che nes vegn tres ciamó dejaprové con na intenzion clera.  (de Iaco Rigo)