"Ora legala": sci o no?

Data

17 de agost 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Comentar da la redazion

La Comiscion Europeica á metú a jí dai 4 de messel ai 16 de agost 2018 na consultazion anter i zitadins dla Union Europeica en cont dl "pro" y "contra" la ora legala da d’isté. Passa n milion y mez de persones á dit la sia, la comiscion europeica tolará ca les minunghes di zitadins per confermé la situazion che i on tres la desposizion 2000/84/CE, chela che mena inant de 60 minuc les saites dla ora da la ultima domenia de merz a la ultima domenia de otober de vigni ann, o per mudé la situazion tolan ju la "ora legala/nueva".

Interessant él da vedei che i Statesc dl Nord é en gran pert per tó ju la "ora legala" lascian per dut l ann l’ora solara che se oreinteia aldó dla lum naturala; chest é saurí da capí, ajache d’isté tl Nord é la lum dl di longia assé per l sport y l moviment, ence mesa la nuet. Y tla Talia pa? Sciche i analisć y esperc dij ne porta la "ora legala" degun utl per l’economia y l sparagn energetich, y n’é nience n problem per les persones atempedes y i tiers te stala. Ma che la ora legala porta te nosc luesc na ora plu lum da seira é n fat. Tolan ju la ora legala aronse d’isté bele scur tosc do les ot y perchel di bele les cater da doman... Chi adora pa la lum tant adora da doman, y chi adora pa scur tant adora da seira?

Ester per o contra la ora legala é lié a n grum de emozions personales, important él demé che n pue duc i zitadins de chesta Europa ae la medema ora (con +1 o +2 respet ala UTC te cer Statesc). Sce la Comiscion Europeica ess da tó ju la ora legala, valessel per duc i Statesc Europeics, ajache dantaldut l marcé y la mobelté se damana na ora unificheda! Che vigni persona adora na ora savonse, che sce te ruves n’ora tardí n’aste suvenz plu nia da dí!

Iaco Rigo

Galaria retrac