Diesc agn dala mort dl Prof. Walter Belardi

Data

04 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
N recort personal
Le monn cultural ladin dess avëi dër mancia Walter Belardi, por sües vijiuns tleres y sotes di fenomens sozio-culturai dla Ladinia. So insegnamënt resta sciöche ejëmpl de impëgn concret y de idealism costant por la gauja ladina. I ciarun da se mirité l’arpejun spirituala y le patrimone de conoscënza che al s’á lascé zoruch.

Ai 31 de otober dl 2008 morîl a Roma le professur Walter Belardi, porsona dër conesciüda y aprijada ince tla Ladinia, por i tröc stüdi y i tröc libri che al á dediché ala cultura y al lingaz ladin. Tröp él bele gnü scrit incër i gragn miric che Belardi s’á fat lunc y lerch tl ciamp dla linguistica, y deplü plates é da ciafé te internet, por ci che reverda sües inrescides y sües publicaziuns. Veramënter lungia y importanta é la bibliografia che al nes á lascé zoruch. Al bastass chiló alzé fora ma n per de libri che á signé la storia di stüdi de ladinistica: l’Antologia della lirica ladina dolomitica (gnüda fora tl 1985); la Storia sociolinguistica della lingua ladina (publicada tl 1991) y le Profilo storico-politico della lingua e della letteratura ladina (gnü fora tl 1994). Te La questione del “ladin dolomitan” (1993) ál scrit fora süa convinziun che le ladin adora n lingaz scrit unifiché, por ti ester manëcia ales nezescités aministratives, culturales, y sozio-politiches tl dagní. Süa posiziun nasciô da reflesciuns y da osservaziuns scientifiches, dalunc dales tëmes y dai preiudizi dla politica locala. Danter i tröc contribuc de etimologia y de gramatica storica ladina, ti ál spo dediché monografies a Max Tosi, Frida Piazza y Felix Dapoz, alzan fora l’originalité leterara y la valüta poetica de chisc auturs ladins. Cun döt ci che ël á fat por nosc lingaz y nosta cultura, messunse alzé fora le gran debit de reconoscënza che le monn academich y les istituziuns culturales ladines á ti confrunc de Belardi. Mo a 10 agn da süa mort, oressi recordé personalmënter le professur che m’á acompagné tratan mia formaziun universitara. Al se trata de recorc filtrá da mia esperiënza y da mia sensibilité, che ne pretënn nia da ves pité n cheder complet y ogetif dla porsona de Walter Belardi, mo che proa da ti ji do al raport - plëgn de valüta y de contignüs umans y culturai - che é gnü a se dé te université danter n professur y n so studënt.

Carlo Suani nes cunta dl Prof. Walter Belardi y dles esperiënzes che al á podü fá cun ël tratan le stüde y dedô! Da lí do tla ediziun de La Usc di Ladins atuala!