Comentar de pruma

Data

09 de november 2018

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Col, l "pais dei 250 eroi"
Cussì l é stà ciamà su Facebook sti di passai l pais da Col, ma podarave ester Fodom, La Rocia, Selva, Fascia, Alie...chichemai, duc sion stai Eroi nte sta situazion. Da paejana che à vedù con voge la malora pos dì che no l é stà degugn che no s'abe dat da fà. A la fin degugn sava co sarave ruà valgugn a ne deidà. Per l martes da doman i studafuoch i ava bele girà a pe dut l comun, risciando sua vita sot l vent, le boe e le piante, per fà na stima dei dagn e per vede che no fosse morc o ferii. Da ilò l é pee via na machina de lauranc che sot la soravijion de Studafuoch e Socorso Alpin, l'à laurà di e not per tornà a mete l pais in pe. Bela e da auzà fora la scomenzadiva per dà n past ciaut a duc i lauranc. Na ventina de
persone nanter cuoghi e camerier i à injegné nte le Scole la marenda per duc chi che laurava su strade, cuarc e boe. N modo per se ciatà auna e se sentì duc a cesa. L magné da fà su l é ruà dai rifugi e ristoranti del pais e, na part, incia da Anpezo e dai pais dintor. N servije organizà a la perfezion, coi volontari che portava su la schina la scrita "Noi tignon duro". E cussì on fat, on proprio "Tignù duro". Eroi no l é demà stà i lauranc e chi de le cujine: ntei di de la malora Franca e Antonietta i à tegnù davart suo bar per dà l muot a la jent de avè semper n cafè, l giornal o n luoch ulà se ciatà e Giancarlo con sua botega l é semper stà a servije de la jent. Eroi l é stà chi doi lauranc che tornava dan cantier che i ava a Padola e che, restai fermi sun Giau ncora l lunes daremesdì, co l martes i é ruai a Col i à dat ad imprest al comun l generator che i ava sun suo mezo, de modo che la cesa de comune la podesse avè la lum. Eroi l é stà i i tosac che, per chel che i à podù, i à dat na man e Eroi i é stai incia chi da Col che con suoi mezi e suoi braz, senza spetà aiuti che no se sava co o se i sarave ruai, i à liberà da soi la strada che portava a Ciaurì. No podevane contà a degugn nte ce malora che sievane ruai a finì, ma ntel prim s'avon rangé con nuos mezi: eco parceche sion stai Eroi. Soraldut parceche on bù da tegnì fora chela strenta al cuor che on sentù l martes da doman a vede noste cese e nosta val strasomeade dal grant
vent, n valch che se regordaron demà noi e che degugn podarà capì. Canche le strade i é difati stade davarte a chi dal de fora e mezi e socorsi i é ruai, dut l ava bele ciapà na ziera pi zivila. Chest l é demà ce che mi ai podù vede e sigur tante picole storie o situaziogn no le cugnesse, le cugnessaré voi auter. Granda la solidarietà che Fodom e Col i à ciapà da dute le vai ladine, no demà per l magné o per la roba material, ma proprio incia per lauranc e mezi: ncora davant che l'Italia la capisse come che sievane metui, i auter ladign i s'à delongo ativà per capì come che stevane e per ne dà na man. Manco telefoni e tant laor: chesta l é stada la malora per noi. Darè avè laurà na giornada le sere i é passade nanter de vijign a vardà foto vege o a se contà storie dei temp passai: robe che no se feva da agn. Pense che sta malora la n'abe fat tornà a cugnesse come paejagn, che tanc de noi abe bù modo de laurà o descore con jent che da temp no la incontrava. Na medejina forsi per zerte situaziogn? Valgugn dis de si. Mi ai descorest de Col...meté l'inom de vost pais nte sto comentar e torné al lieje: crede che, su per ju, le robe le siebe stade cussì daperdut. Chest parceche sion duc jent da mont che, co l é debujegn, la se tira ite le manie e la laora. Sion jent, orgoliosa de podè l dì, da puoce ciacole e tant laor.  (de Giulia Tasser)