Colegament Reba - Cortina - Civetta coi schi: Grones "Gnanca da vede"

Data

06 de dezember 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Darè che inier l president de la region Veneto Luca Zaia l à tornà a mete sun taula darè agn l'idea den colegament de lifc e piste da 64 miliogn de euro nanter Anpezo, Reba e l Civetta, l capocomune da Fodom l se dis senza parole e, soraldut, foresto a sta idea. "No ai parole, no m'avarave mai spetà de vegnì a n savè na tala dai giornai e no de persona - met man l capocomune nte na letera mandada incuoi da doman al governator de la region Veneto Luca Zaia - Fé puro l colegament nanter Anpezo e l comprensorio del Civetta, ma no chel con Reba. Chest l jisse difati a tocà luoch che dal pont de veduda idrogeologico, paesaggistico, cultural e archeologico no i à compagn chilò dintor. L é luoch chis, chi de la Mont de Andrac e de la Mont da Ciastel, ulache davant zent agn zentener de jovegn i é morc n temp de guera, senza contà che per fà ce che i dijesse de volé fà, crede che chi 64 miliogn de euro no i bastarave gnanca. Su chele mont la region l à investì pi de doi miliogn de euro de fondi Interreg per tegnì da cont e valorizà caminamenc, trioi e manufac dei temp de guera, de modo che la jent che và ilò a caminà no la desmentie. No jiron a sacrificà l bel e la natura de chi luoch defendui da l'UNESCO per deguna rejon al mondo, chi l è luoch che i è nte la Rete Natura 2000, debui dal pont de veduda idrogeologico parceche i é clasificai come luoch P3 e P4. Sacrificà chi luoch ntel inom dei lifc volarave dì jì a tocà incia l'area archeologica del Ciastel d''Andrac, per chela che l comun da Fodom l à tant investì ntei agn e che, ades come ades, l é un dei luoch pi amirai de noste Dolomiti". Grones l sara via dijendo che, ades come ades, chel colegament no l é pervedù da degun piano neve regional e che, proprio su l'idea de sto colegament che no la é nuova ai ambienti de la politica, bele davant calche an l consilio de comun da Fodom l ava dat parere negatif. "La maor part de chi bosch e de chi prai i é dei privati o del comun da Fodom - sara via Grones - e fà mal lieje ste robe dai giornai senza le sentì da banda del governator. Da el difati no ai ciapà nia de scrit e gnanca na telefonada su sta sua intenzion e de chest son restà davero mal. Faron de dut per defende la Mont d'Andrac e la Mont da Ciastel. No jiron a chipà ju e a dejemà un dei puoz luoch che no é restai tocai da la aluvion".