La Usc di Ladins

Al é sté na sëra zënza plöia, porchël cun aries n pü’ frësches. Mo les önesc formaziuns danter concorënc al Pest Cassa Raiffeisen y le conzert por le chert de secul dla UCL-Uniun Ciantauturs Ladins é jüdes sön paiun tl zënter de paisc cun motivaziun y ince pasciun. Cotan de jënt é rovada adalerch por tó pert a chësc program musical ladin, sostegní en chësc iade por le sorvisc gastronomich dala Jonëza d’La Pli de Mareo. Le festival á metü man püch do les 21:00 cun la performance di pröms trëi grups interprec dl Pest de cianties, dedô éra jüda inant cun i ciantauturs ladins y grups ladins: Acajo, Jandaniel Granruaz, Martina Iori, Hubert y Lucia y Compagns. La secunda sona dl concurs á spo odü y aldí i The Enzians y Daniel Willeit. La juria é stada metüda adöm da Iaco Rigo (vizepresidënt y organisadú dl festival), Hubert Obwegs - diretur dla Cassa Raiffeisen Val Badia, Jandaniel Granruaz - ciantautur ladin, y Raimond Irsara di Acajo de Gherdëna.

La serada s’á soné fora do mesanöt cun les cianties de Iaco Rigo & band y Alexander Dal Plan.

Fotos: Iaco Rigo