La Usc di Ladins

A Ciampedel chest an tel dì de la Sègra di Sènc Felip e Giacum l’é stat na gran festa, no demò religiousa e de la comunanza de paìsc, ma ence zivila, militara e culturala per duta Fascia, con la partezipazion, sot n bel soreie ciaut, de n muie de Gropes, autoritèdes e jent da duta la val e da foravìa.  

L Comun, adum con i Scizeres de Fascia e de etres raions e con l’Istitut Ladin, à endrezà l’inaudazion del Stont, l veie “I.R. Casino di Bersaglio”, soul ejempie de chisc veies frabicac storics che te Fascia era amò en pe e che l’é stat restaurà su encèria de la Provinzia dai Architec Weber&Winterle, doventan na senta sul teritorie del Museo Ladin de Fascia.

Dò la procescion con l gonfalon, la statues di Sènc, la Musega Auta Fascia, i Schuhplattler e n muie de Gropes e raprejentanzes di Scühtzen rué ence da foradecà, te gejia cercenà da duc i bandierèr don Luigi à ofizià la messa grana ciantèda bel dal Cor de gejia. Dò messa l’é stat onorà i morc en vera te cortina e dapò l’é stat l’inaudazon e la benediscion ofiziala del Stont, con duc i descorsc de l’autoritèdes, l referat de la storica Maria Piccolin e i colpes de la salva di Scizeres e ence del canon.

En ùltima duc à podù ciapèr na bona marena jun Ischia e la festa é jita inant domesdì con musega e bai e duc i à abù l met de poder jir ite a veder l Stont con si alestimenc che sporc na bela piata de noscia storia.

Depiù sun duc i contegnui sarà da poder lejer su La Usc stampèda de vender ai 11 de mé. Chiò endèna na galarìa de retrac.

 (Lucia Gross)