Manifestazions atuales speziales

Data

17 de fauré 2017

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 17 de fauré
"Carnival Village" a La Ila
En Jöbia grassa ai 23 de forá dales 14.30 inant, vëgnel metü da jí tl zënter da La Ila na festa da Carnescé
Tl parch dlungia la scora dai schi da La Ila gnarál metü sö le "Carnival Village", olache al vëgn pité de vigni sort de animaziun por i mituns: la mascotte dla scora de schi da La Ila gnará a saludé i plü pici, l'animadú Kekko fajará de vigni sort de strinëc y matades, y i mituns pó ince se pastelné na maschera da carnescé adöm al'animadëssa dl Museum Ladin. En chësc ann gnarál ince fat scoltöres de nëi, cun chëres che i mituns podará se lascé fá jö. Al ne manciará sambëgn nia tröp devertimënt y musiga, sciöche ince val' canifl da carnescé y val' da bëre. Pici y gragn é dër bel inviá a passé le domisdé adöm, vistis sö en maschera.

Gara de liöses da fëgn
I dui lönesc ai 20 de forá y ai 6 de merz, dales 21.15 inant, vëgnel metü da jí la gara de liöses da fëgn originales y nia modificades, a Calfosch sön la pista "Colfosco"
Al pó tó pert grups da 2 y an mëss avëi na liösa da fëgn y n linzó da fëgn cun le fëgn laite,
sciöche ince vistimënt da zacan. I partezipanc ala gara s'incunta dales 20:15 y ai ne pó nia fá na proa cun la liösa, mo al ti gnará dé la poscibilité da se ciaré jö le percurs a pe. Al é preodü pesć por i pröms trëi grups classificá y trëi pesć a estraziun por n valur de 650,00€ a chi che tol pert a trames les gares. Cun l'iscriziun (debann) ciafa i partezipanc n bon por na pasta y boanda.
Les iscriziuns vëgn tutes sö dala Scora de Schi da Calfosch al 0471/836218, cina en sabeda ai 18.02.2016. Chësc por le pröm apuntamënt o por tó pert a trames les gares. Al ne vëgn nia azeté plü de 9 liöses por vigni data. En chësta ocajiun sarál ince i maestri dla Scora de Schi da Calfosch che fej na picia desmostraziun dles tecniches dl jí cun i schi y le grup freestyle "Pirates" lasciará odëi de vigni sort de acrobazies y salc. Sö al cil podaran odëi parapënc y deltaplans cun chentli y al ne manciará nia intratignimënt musical.

La noza da paur - por tigní vies les tradiziuns da n iade
En mertesc ai 21 de forá vëgnel a s'l dé la bela manifestaziun, tl zënter da San Ciascian
Gran importanza ti vëgnel dé ciamó aldedaincö ales tradiziuns da paur. Cun deplü manifestaziuns fora por l'ann, ón ti les porté dant ai plü jogn y ai sciori de nüsc paisc.
La manifestaziun "Noza da Paur" gnará metüda da jí le mertesc ai 21 de forá dales 21.00. La defilada passará fora por le zënter de San Ciascian, olache al gnará fat le gran past da noza cun les spezialités ladines y les tradiziun da n iade.
La defilada gnará daurida da n valgügn mituns, y sciöche da tradiziun sarál da odëi la liösa cun la nücia, sü geniturs, le mënanücia y la ciamarita, la tota da bato. Sön n'atra liösa sarál le nüc, ince ël cun sü geniturs y le mënanüc. A pe o sön d'atres liöses sarál i atri familiars, i amisc y i vijins, y tl zënter dl paisc sarál la Müjiga da San Ciascian che tolará ite düc i inviá ala noza. Implü ne manciarál nia val' grup musical che abeliará la noza cun i orghi da man y les ëres cun la troht.
Tröpes é les tradiziuns liades ala noza da paur: le de dla noza, sön le iade da jí te dlijia, gnôl fat la parada, che vëgn ince ciamó fata aldedaincö. Tratan le past ti gnôl porté na cioura ai fredesc y ales sorus plü vedli di nüc y ciamó da maridé; chësta messâi spo cumpré jö. La nücia, le de dla noza, n'â nia le guant blanch, mo n guant tradizional y na gherlanda de ciüfs blanc de cëra sön le ce. I
fredesc y i amisc di nüc se vistî de bi ciapí fac sö cun plömes y ciüfs de metal. I jogn i arjignâ ca cun tröp savëi y impëgn. I jogn cun i ciapí, parenté di nüc, ê i sonsí y les jones ê les sonseles. Le pröm sonsel y la pröma sonsela ê le fre y la so plü vedli di nüc y al ê chisc che daurî le bal do le past da noza. An podará odëi dötes chëstes tradiziuns tratan la "Noza da Paur", ai 21 de forá a San Ciascian.
Al vëgn rengrazié le Comun de Badia, la Vijinanza Armuntarora, i polizisć y i lauranc de Comun, i Stödafüch da San Ciascian, la Crusc Blancia Alta Badia, la Uniun di Ustis da San Ciascian, la Uniun di Ciavai Haflinger y la Uniun di Ciavai Norics dla Val Badia, i grups musicai, les uniuns dla Jonëza da Paur dla Val Badia y düc chi che fej pert ala defilada, che á metü a desposiziun i guanc o che se crüzia por le bun garaté dla manifestaziun.

Broomball da carlascé
Le Sport Club Amatorial Antermëia inviëia a n turnier de broomball, ai 25 de forá
Cun les granares söla dlacia! Chësc sarál da fá en sabeda ai 25 de forá dales 19.00 inant a Antermëia. Por chësc de á le SCA Antermëia organisé le turnier de "Broomball - Carnival Edition". Por chësta ediziun da carlascé é düc inviá da rové alerch en maschera, ince les scuadres che soga para, deache dedô vara inant cun na party da carlascé tl Icebar, cun musiga de DJ Tino. Por informaziuns plü menüdes sön le turnier y por iscriziuns, telefoné cina ai 24 de forá dales 18:00 a Armin, al numer 347/9102642.

„Tuo marito? Imbroglione come il mio"
La „Nuova compagnia di teatro d'arte" da Bornech röia ince tla Val Badia
L'assoziaziun dl teater tl lingaz talian da Bornech sot la presidënza y regia de Antonio Loguercio presentëia les edemes che á da gní ince a Bornech, tla Val Badia y a Reba so toch atual „Tuo marito? Imbroglione come il mio", na comedia te trëi ac de Antonio Loguercio, tuta da „Due mariti imbroglioni" de E. Scarpetta.
A La Ila sará la compagnia en sabeda, ai 18 de forá dales 20:30 (Ciasa de cultura), a Bornech en domënia, ai 19 e merz dales 16:30, y en vëndres, ai 31 de merz dales 20:30 (dagnora Ciasa Kolping) y a Reba en sabeda ai 8 d'aurí dales 20:30 (Zënter congresc).

Gran defileda da Carnescià a Urtijëi
N Juebia Grassa ai 23 de fauré dala 3 domesdì.
La plu bela mascres vën premiedes

N Juebia Grassa mët la Lia dl Turism de Urtijëi inò a jì la gran defileda da Carnescià. Duc i mutons y la mutans coche nce i granc ie nviei a fé pea pra la defileda tres Urtijëi, che pierà via dala 15.00 dal Hotel Madonna (dlongia l supermarket Despar), passerà tres l raion da jì a pe y jirà inant nchin sun Plaza de Dlieja. Tlo uniràl fat na pitla festa cun mujiga deejay y Clown Linda, leprò uniràl partì ora de bon crafons.
Fé nce tu pea cun ti cumpanies! La plu bela mascres unirà premiedes! Chi che ulëssa fé pea cun na gran grupa o n carët dëssa, per rejons de urganisazion, prëibel se lascé nuté su tla Lia dl Turism, mandan na e-mail a Questo indirizzo email è protetto dagli spambots. È necessario abilitare JavaScript per vederlo. o cherdan su l 0471 777600.

"Corchi"
Giaurida dla mostra n vënderdi ai 24.2. dala 18.00 tla galaria Adler Art a Persenon
Pian via dai corchi tradiziunei che univa ziplei y vën mo al didancuei ziplei te Gherdëina à i trëi artisć de Urtijëi Leander Piazza, Sergio Sommavilla, Gregor Prugger y l artist tudësch Günther Kempf laurà ora chësta tradizion a n'autra maniera cun fantasia, humor y ironia.
La giaurida dla mostra sarà n vënderdi, ai 24 de fauré dala 18.00 tla galaria Adler Art, Str. Ponte Aquila 9 a Persenon. La mostra resterà davierta nchin ai 9.3. dal lunesc ala sada dala 10.00 ala 12.00 y dala 17.00 ala 19.00.

Campiunac provinziei de superG
Duman sada ai 18.2. sun Secëda dala 10.00 sun l purtoi Fermeda
L Schi Club Gherdëina mët a jì duman sada ai 18 de fauré i campiunac provinziei de superG per la categuries dl Grand Prix, jëuni nasciui ti ani dal 2001 nchin al 2004. L fajerà pea plu de 300 mutans y mutons de dut Südtirol.
L vën pià via dala 10.00 danmesdì sun l purtoi Fermeda y la premiazion sarà dala 14.00 suinsom dla furnadoia de Secëda. L Schi Club Raiffeisen Gherdëina nvieia duc i apasciunei de schi a unì a ti cialé a chisc pitli campions.

Cuintet Ma'Alot
Cunzert n mierculdi ai 22.2. dala 20.30 tla Cësa de Cultura a Urtijëi
Te chësc penultim cunzert dla sajon di Jëuni de Mujiga de Gherdëina saràl da audì l cuintet Ma'Alot, che lascerà audì l "Viac da d'inviern" de Franz Schubert, tla verscion per tenor, strumënc a fla y armonica.
L tenor Christoph Prégardien ie ratà un di tenores lirics plu mpurtanc de nosc tëmps, che cun si bela usc sterscia, si dizion tlera y daniëura na nterpretazion sapuda, se à davanià gran stima. Nsci iel da audì deberieda cun la gran urchestres tla sales da cunzet plu mpurtantes de Europa. Da auzé ora pra chësc cunzert ie mo la sunadëura de armonica Heidi Luosujärvi dla Finlandia, che ie unida premieda pra plu cuncors y à sunà sciche solista nce deberieda cun urchestres mpue sëura dut l mond, y l tlarinetist Tino Plener che à cunlaurà cun suzes cun plu urchestres y ie n sunadëur de mujiga da camera scialdi damandà.
Deberieda cun chisc trëi nterprec sónel mo Christina Fassbender flaut, Christian Wetzel oboe, Ulf-Guido Schäfer tlarinet, Sibylle Mahni corn y Volker Tessmann fagot.