Manifestazions atuales speziales

Data

11 de agost 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 11 de agost
Musiga ladina te plaza
Indoman sabeda, ai 12 d'agost 2017, dales 20:00 inant, a La Pli de Mareo
Serada de musiga ladina sön plaza d'La Pli de Mareo en gaujiun di 25 agn dla UCL - Uniun Ciantauturs Ladins, cun la finala dal vi dl Pest „Cassa Raiffeisen" por cianties ladines nöies, a chëra che al s'á cualifiché: Gabi Mutschlechner, Bruno y Elisa, Annika, Paul Maieron cun i „Enzian" y Daniel Willeit.
Al festival ciantará spo i ciantauturs y grups: Acajo, Martina Iori, Hubert y Lucia, Alexander Dal Plan, Jean Daniel Granruaz y Iaco Rigo. Organisaziun: UCL y Jonëza La Pli.

A pe te la Mont de Fuciada
En domenia ai 20 de aost te la Mont de Soraga magnères da zacan, musega e mestieres da n'outa
En domenia ai 20 de aost l Comitat Manifestazion de Soraga, col sostegn del Comun e de la sociazions de paìsc, endreza la 16^ edizion de la aprijièda scomenzadiva "A pe ta Mont" a la descorida di saores e i mestieres da zacan te la Mont de Soraga. Ta Garghele, La Regola, Sbrinz, la Val e Col Codé se podarà magnèr e beiver ti desvalives baic olache i volontadives enjignarà zeche da bon col compagnament de musega.
Ta Garghele l'é l grop di giagres che enjigna l disnèr con café de orc, bracel e yogurt; ta la Regola l'é l grop Folk con l'aperitif; ta Sbrinz l'é l grop di Alpins con polenta, liènia e crauc; ta la Val l'é l grop di hotelieres con gnoches, pria e capusc; jun Col Codé l'é l grop Festa e Vea con polenta e formai, pan e liènia e kaiserschmarren, l Grop di Joegn con i douces e l Comitat Manifestazion con la fortaes. Daperdut sarà musega con i Alpen Boys, i Museganc da zacan e la Bhömische de la Val de Cembra. Te la gejiola de Fuciada da les 11.00 vegn dit messa.
Te ogne bait e cianton se podarà veder i èrc e i mestieres da n'outa: coche vegn fat i cortìe da ciacia, i cestons, se pel vardèr zipièr l legn, coche se fèsc a fèr formai, a fèr ciauza e maia. Sarà ence la mostres "Fuciada tel passà" e "Natura a colores sa mont", la esposizion de la sociazion "Sul fronte dei ricordi" e de Helambu Arcobaleno che porta sie didament tel Nepal, la erbes de la firma Fiores e vegnarà moscià ence coche vegnìa fat sù n bait dò la vera. Ben segur che sarà ence jeghes per bec coi truches e l percors per jir a descorir la eves.
La festa taca ite entorn les 9 da doman. Se pel ruèr ite a pe dal jouf de Sèn Pelegrin opura coi pulmins che ponta demez dal piaz tedant la gejiola de Sèn Pelegrin o dal piaz de la forenadoa de Col Margherita.

Mostra de cripeles fates a man
Sëgn d'agost, tl pice salf sot Comun a La Val
La Val á le plajëi da mostré cripeles fates a man ti ultims 30 agn y passa. Chëstes gnará metüdes fora tl pice salf sot Comun y an podará ti ciaré en jöbia 17, vëndres 18, domënia 20 y lönesc 21 d'agost dales 17.00 ales 20.00, en mertesc ai 22 d'agost dales 21.00 ales 22.00 y en mercui ai 23 d'agost dales 10.00 ales 12.00.

I "Zeitsprung" tl Ciastel Colz
"Wo soll ich mich hinkehren" é le titul dl conzert, söl program ai 14 d'agost dales 21.15, tl ciastel Colz a La Ila. N ater apuntamënt cun le Festival Badiamusica 2017
Te chësta ocajiun sonará le grup "Zeitsprung Consort", metü adöm da Johannes Vogt (laute y teorba), Daniel Kartmann (percusciuns y usc) y Rüdiger Kurz (violone). "Wo soll ich mich hinkehren...?" ê na ciantia popolara tl tëmp dl Renascimënt y é le moto di trëi artisć. L'interes por la lirica, la storia y les condiziuns soziales y politiches ispirëia intres indô le grup y i porta a scrí cianties y aranjamënc nüs. Le conzert é metü adöm da bai storics, toccates y sonates todësces, austriaches y talianes, y ince melodies tutes fora da operes.

Orchestres pîta Mahler y Tavella
L'ensemble "Windkraft" y "I Virtuosi Italiani" sot al dirighënt Kasper de Roo sona n conzert de Badiamusica, ai 16 d'agost dales 21.15 a Calfosch, ince cun la rapresentaziun de n toch de Konrad Tavella
An podará aldí la nona sinfonia en D-Dur de Gustav Mahler y le toch "Stardust" de Konrad Tavella, che á davagné tl 2016 le concurs de composiziun dla Uniun di Artisć Südtirolesc. L'orchestra de stromënc a fle "Windkraft" é gnüda metüda sö dl 1999 y se dedichëia dantadöt ala spezialisaziun de musiga contemporana. L'orchestra da ciamena "I Virtuosi Italiani" é nasciüda dl 1989 y rapresentëia atualmënter na formaziun de musiga da ciamena de livel internazional alt.

"Mia anima lalda le Signur"
Ai 17 d'agost dales 21.15 él tla dlijia de Badia n conzert söl oghe, cun Sarah Kim Yeonju dala Corea dl Süd, sot al titul "Meine Seele erhebt den Herren", sciöche referimënt al Magnificat
Badiamusica inviëia al terzo conzert d'orghe dl Festival Badiamusica 2017. L'artista jona Sarah Kim Yeonju é nasciüda tla Corea dl süd y á studié orghe y musiga de dlijia tla Université de Balsan y tl Mozarteum de Salzburg. Lapró éra stada organista tla catedrala catolica de Seoul. Por le publich de Badiamusica portarára dant musighes de Dietrich Buxtehude, Johann Pachelbel y Johann Sebastian Bach.

"AKASHA – La Quintessenza"
Chësc le titul de n spetacul artistich y ince acrobatich che gnará desfiré ai 14 d'agost a Corvara
En chësc isté vëgnel tigní por le pröm iade n spetacul artistich tl stade dla dlacia a Corvara. En lönesc ai 14 d'agost sarál i acrobac dla compagnia "Stardust" che porta dant n spetacul basé sön i cater elemënc primordiai: füch, tera, ega y aria. Tratan l'esibiziun vëgnel presenté les carateristiches tan desvalies de chisc cater elemënc, che vëgn impó liá y alzá fora dala forza dl ecuiliber universal, insciö da cherié do la minunga di alchimisć n cuinto elemënt: l'eter. Le spetacul mët man dales 21:15, cun elemënc de füch y scraiënc, che rapresentëia le caos primordial, por mostré spo cun ritms y sonns desvalis i cater elemënc te dötes sües formes. Tl'ega podaran amiré sirenes che bala, tl'aria sarál acrobac che mostra esibiziuns che lasciará le publich zënza fle; le füch gnará rapresenté cun chentli y cërtli impiá y imajes dla tera y dla natöra gnará mostrades te n spetacul de löms y corusc. Les chertes por tó pert al spetacul pón cumpré ti ofizi turistics dl'Alta Badia al prisc de 12,00€ por i adulc y 8,00€ por mituns cina a 12 agn.

"Ariel, danter tera y mer"
Insciö á inom le musical da mituns metü da jí en chësc isté a Al Plan de Mareo. Premiera incö vëndres ai 11 d'agost
Le toch é te cater lingac, cun 25 mituns y mitans dla Val Badia, che á tles ultimes edemes podü ciaré ite tl monn dl musical tres n workshop. Cianté, balé, jobelné, fá i costüms y le scenar é stá al ordin dl de. La premiera dl toch é incö vëndres ai 11 d'agost dales 20:00, tl salf dles manifestaziuns d'Al Plan de Mareo. Les atres rapresentaziuns é en sabeda ai 12 d'agost dales 15:00 y dales 20:00, y en domënia ai 13 d'agost dales 18:00. Entrada lëdia, 30 menüc dan le mëteman.
Ara se trata de na produziun dl Sorvisc ai Jogn Val Badia. La direziun musicala y organisaziun é de Sofia Pisching y Stefanie Kaneider; la rejia, coreografia y adataziun dl toch é de Barbara Rottensteiner Comploi; i costüms y la grafica de Maria Frenner; l'assistënza, proieziuns y grafica de Nadia Gerstl; les traduziuns de André Comploi.

Conzert dl grup "Westbound Generations for Africa"
Le grup musical "Westbound", metü sö dal dotur Toni Pizzecco, se lascia aldí te n conzert, indomann sabeda ai 12 d'agost, tl salf dles manifestaziuns a Corvara
Le grup é conesciü por sües melodies caraterisades dal "westcoast sound", che foss i sonns tradizionai dla California. Bele da tröc agn incá organisëia chësc grup conzerc de benefiziënza, sostignis dal'assoziaziun di doturs südtirolesc por le monn. Cun la tournee de chësc isté, dal titul "3 generations for Africa", gnarál dé n aiüt por le ressanamënt de na pert dl ospedal Attat tl'Etiopia. Le publich podará se conforté da ascuté sö melodies dër conesciüdes sciöche "Sound of silence", "The boxer", "Southern Corss" y d'atres cianties de Bob Dylan, Crosby, Stills, Nash & Young, Supertramp, Bruce Springsteen y d'atri grups. Le conzert mët man dales 21:15.

Gran festa y defilada a La Ila
En Santa Maria dal Ciüf ai 15 d'agost, dales 11.00 inant, tl zënter de paisc. Dales 14.30 gran defilada dal tema "La storia di ladins dles Dolomites"
Sciöche da tradiziun, gnarál tigní ince en chësc ann la festa de Santa Maria dal Ciüf tl paisc da La Ila, le mertesc ai 15 de agost dales 11.00 inant. Le de de festa mët man cun griliada y matinée tl parch dlungia le Hotel Ladinia. Dales 11.30 él la Müjiga da La Ila che tëgn conzert y dales 13.00 él i platleri dla Val Badia che porta dant so spetacul. Inant vára spo dales 14.30 cun la defilada fora por le zënter da La Ila, en chësc ann caraterisada dal tema "La storia di ladins dles Dolomites". Da odëi sarál de vigni sort de ciars y de costüms che mostra i avenimënc plü importanc dla storia di ladins, dala nasciüda de nosc lingaz cina aldedaincö. Dedô jará la festa inant cun spezialités gastronomiches y jüc por gragn y pici. Lapró tëgn conzert les musighes da San Scimun y da La Val. Da sëra gnarál pité musiga da bal cun le grup "Vollgas".
La domënia ai 27 d'agost sarál spo la segra da La Ila, che metará ince man dales 11.00. Dales 12.00 sonará la Müjiga da La Ila y dedô podarán aldí ciamó la Musiga da St. Michael a Eppan y la Müjiga di Jogn dl'Alta. Da sëra sona le grup "Carreras". Les manifestaziuns vëgn metüdes da jí dai Stüdafüch y dala Müjiga da La Ila, cun le sostëgn dl'Assoziaziun Turistica Badia.

Festa alaleria a San Martin
La Musiga da San Martin de Tor á le plajëi da Ves invié ala festa alaleria, che vëgn organisada ai 14 y 15 de agost, sön plaza dl paiun
Le program dla festa mët man ai 14 d'agost dales 19.00, cun la poscibilité da cené. Dales 20.30 inant serada folcloristica y intratignimënt musical cun les "Gitschberg Gitsch". Dales 22.00 inant sona le grup "The Enzians".
La domënia ai 15 d'agost dales 9.30 sarál la mëssa da festa te dlijia. Dales 11.00 inant sön plaza dla festa matinée cun liagnes blances; dales 11.45 defilada y conzert dla Musiga da Schabs, dales 14.45 defilada y conzert dla Musiga da Völser Aicha, dales 18.00 inant musiga da bal cun "I Tirataie". La Musiga da San Martin inviëia düc a sté en compagnia pro val' da bëre y da mangé.

Iluminaziun dl Sassongher
Gran festa a Corvara, en vëndres ai 18 d'agost dales 21.15 tl zënter dl paisc
Sciöche al é oramai tradiziun, vëgnel ince en chësc ann metü da jí l'iluminaziun dl Sassongher a Corvara. La manifestaziun gnará tignida le vëndres ai 18 d'agost. Por l'ocajiun sarál la Müjiga da Calfosch-Corvara che abelësc la serada cun n ingres dales 21:00 fora por le zënter de Corvara y dedô n pice conzert sön paiun dla plaza de comun, che metará man dales 21.15. An podará aldí les plü beles melodies fora dl repertore ampl dla Musiga. Tratan le conzert sarál n valgügn alpinisć dl grup "Croderes" che iluminará le Sassongher, le crëp simbol dl paisc. Incër les 22.00 podarán amiré n spetacul de füc artifiziai, organisé dal'Assoziaziun Turistica da Corvara/Calfosch, sciöche bëgngnü a düc i sciori dl'Alta Badia y salüt ala jënt dl post. Sce al ess da ester bur' tëmp, vëgn l'iluminaziun y le conzert spostá ala sabeda ai 19 d'agost.

"Jöbia de Corvara" dedicada ai mituns
Le sesto apuntamënt dla "Jöbia de Corvara", ai 17 d'agost, i vëgn dediché ai mituns: laborators creatifs, animaziun, de vigni sort de jüc y scoltöres de palés da soflé sö
Dales 17:15 ales 19:15 y do cëna dales 21:15 ales 22:00 sarál animadus che porta tröp devertimënt y bona löna fora por la zona pedonala dl paisc, y i mituns á ince la poscibilité da se lascé depënje sö le müs. En ocajiun de vigni jöbia de Corvara vëgn la strada prinzipala da Corvara stlüta al trafich dales 17:00 ales 22:30. Ara se trata de na bona ocajiun por mituns y families da sté adöm y passé n domisdé cun tröp devertimënt. L'ultim apuntamënt dla Jöbia de Corvara gnará tigní l'edema dedô, ai 24 d'agost, cun deplü artisć de strada.

Al Plan: Olimpiades di mituns
En mertesc ai 16 d'agost inviëia l'Assoziaziun Turistica d'Al Plan/San Martin al terzo y ultim apuntamënt de chësc isté cun les Olimpiades di mituns
Les Olimpiades é por mitans y mituns da 6 a 12 agn. Al vëgn fat scuadres da 4 porsones, che ará da se mosoré tratan döt le domisdé te na linia de jüc y proes de devertimënt y savëi. Ala fin gnarál sambëgn premié cun copes y medaies les mius scuadres. Les Olimpiades mët man dales 14.00, tl raiun dai jüc che Chi Pësc Pësc a Al Plan. Les iscriziuns vëgn tutes sö iló y costa 5,00€ a ce cun Holidaypass y 7,00€ a ce zënza cherta. L'ultim apuntamënt de chësc isté é por en mertesc ai 16 d'agost.

Segra da Paur a La VAL
Tl paisc da La Val vëgnel tigní la tradizionala Segra da Paur, en domënia ai 13 d'agost
Dales 9.30 inant pón pié ia dal zënter dl paisc, fajon na roda fora por les fraziuns de Tolpëi, Ciablun, Runch, Biëi, Ciampëi y Cians, olache al ti vëgn mostré ai ghesć y ala jënt dl post les usanzes da paur da inlaôta y d'aldedaincö. Pro i lüsc de Ciablun, Biëi y Cians, sciöche ince a Tolpëi, vëgnel dé fora spezialités gastronomiches locales, sciöche tutres, cajincí arestis, bales, fortaies, crafuns mori y d'atres duciaries. Sambëgn ne manciarál nia pro les staziuns intratignimënt musical da pert de deplü grups locai. Les escurjiuns pëia ia dan l'assoziaziun turistica da La Val dales 9:30, 10:00 y dales 11:00.

Le some de Dolasila sön Fanes
Ai 12 d'agost dales 14 ales 18 gnarál metü da jí n conzert-evënt itinerant danter les üties de Fanes, Lavarella, le Le Vërt y le Parlamënt dles muntagnoles
Pro chësc evënt gnará la liënda de Fanes presentada artisticamënter en simbiosa cun i corusc primordiai dla natöra dles munts, da olache al é l'ambientaziun dla cuntia. Susy Rottonara ciantará y sonará al clavier süa musiga premiada a livel internazional fora dal spetacul multimedial "Le some de Dolasila", tl cheder dla presentaziun dla cuntia mitica da pert dla Lia Culturala Fanes. La pert musicala i pitará al publich na incuntada danter l'avëi cultural antich dles liëndes ladines y la tradiziun operistica, cun la cuntia interpretada dal punt d'odüda dla protagonista Dolasila. Le focus dla presentaziun sará chël da porté dant al publich les tematiches classiches che vëgn dant tla liënda y che é particolarmënter atuales. En particolar é un di obietifs dl proiet "Le some de Dolasila" chël da sotrissé la potenzialité dla musiga y dl'ert por porté a na reflesciun sön l'importanza di sentimënc, dla pésc y dl vire en armonia cun la natöra pian ia da na cuntia mitica. Ince le conzet de belëza ciafa na lerch importanta tl proiet, cun la ambientaziun naturala dla liënda che porta le publich a se vire ite deplëgn tla atmosfera afascinanta dla cuntia. Al gnará ince porté dant l'ativité dla Lia Culturala Fanes, che da passa 10 agn incá se dá jö cun la promoziun dles liëndes ladines tres l'organisaziun de ativités culturales desvalies.

Show söi schi, amez isté
Ince iniann vëgnel a s'l dé a La Ila "The Summer Ski Show", cun le ghest spezial Davide Simoncelli
En jöbia ai 17 d'agost él i maestri dla Scora de schi y snowboard La Ila che tëgn na desmostraziun sön la nëi, tl parch dlungia la scora de schi tl zënter dl paisc. La "Summer Ski Show" mët man dales 21:15 y vëgn tignida sön nëi dl'ultima sajun da d'invern, conservada te n post frësch sot a n linzó spezial.
Tratan l'esibiziun mostrará i maestri de schi la storia y l'evoluziun dl jí cun i schi, tres i recorc di pioniers dla scora de schi da La Ila. Ghest d'onur é iniann le campiun de schi Davide Simoncelli, che á dl 2003 davagné le gigant sön la Gran Risa. L'esibiziun vëgn arichida dai salc y dales acrobazies dl grup freestyle "The Pirates", sciöche ince da intratignimënt musical dl DJ y tröpes löms. Te na te' ocajiun ne pó sambëgn nia mancé n aprés-ski, olache la festa jará inant do le spetacul. La manifestaziun vëgn metüda da jí dala scora de schi da La Ila y dal'Assoziaziun Turistica Badia, en colaboraziun cun la sozieté di implanc Skicarosello.

Referat sön l'ander dl Cenote
Le descuridú dl maiú ander dles Dolomites, le prof. Francesco Sauro, tëgn n referat a San Ciascian
Le Museum Ladin Ursus ladinicus a San Ciascian inviëia al referat dl prof. Francesco Sauro, che baiará dla descurida demorvëia dl ander dl Cenote, ciafé sö danter Piz de Conturines y Piz de Lavarela. Ara se trata dl maiú ander dles Dolomites, 287 metri sot, cun n funz feter tan gran co n ciamp dal palé y olache al ess lerch na catedrala.
Le referat vëgn tigní en vëndres ai 18 d'agost dales 21.15, tla Ciasa J.B. Rinna a San Ciascian, olache an podará dedô ince vijité la mostra "Le monn demorvëia di andri dles Dolomites". Chësta restará daverta cina ai 10 d'otober.

Sing! Cunzerc dla grupa Hosianna
Cinch ie i cunzerc alalergia tl mëns de agost dla grupa Hosianna. Trëi ie bele stac, doi ie mo chëst'ena che vën, ai 17 de agost dala 21.00 a Bulsan y ai 18 de agost dala 21.00 te Sëlva
Cun n program de cianties mparedes ite dutes nueves, rock y pop, da plu da giut y nce i ultimi hits, saràl da audì pec cunesciui de Bon Jovi, Abba, Michael Jackson, Queen y trueps d'autri. Na sëira de mujiga, emuzions y spetacul da ne se lascé nia mucé. Y chëst ann cun na nuvità: l sarà per l prim iede da audì nce cumposizions ciantedes a cater o plu ujes, da ëiles y ëi!
Sëis duc nviei de cuer ai doi cunzerc che ie ai 17 de agost a Bulsan y ai 18 de agost te Sëlva, tramedoi dala 21.00! Ve aspiton!

Orchestra Sonoton: gran cunzerc de iubileum
Per i 25 ani dl'Orchestra Sonoton Gherdëina iel doi cunzerć cun mujiga da film: un ai 20 de agost y un n mierculdi ai 23 de agost, for dala 21.00, te palestra dla scola elementera de Urtijëi
Gherdëina ie na valeda cun na gran tradizion mujighela, ulache da for incà iel unì sunà te de majera grupes, coche orchestres de dlieja y Mujighes. Ala fin di ani otanta chersciova for deplù l bujën y la ueia di musiconteri dla valeda, de pudëi suné mujiga sinfonica. Nsci ova tl ann 1992 Gebhard Piccolruaz metù su l'Orchestra Sonoton Gherdëina. L'Orchestra Sonoton Gherdëina ie n'orchestra particulera, davia che si dirighënc à da for incà cris ora proiec cun mujiga sinfonica d'uni sort, dala tlassica al rock nchin ala mujiga per film. Cun chisc programs iela deventeda n gran pont de atrazion per i jëuni, sunadëures y chiche scota su. Coche bele da tradizion, y sambën per festejé i 25 ani, sunerà nce chëst instà l'Orchestra Sonoton Gherdëina n cunzert drët nteressant per Vo. L sarà da audì pec de Charlie Chaplin, John Williams, Ennio Morricone, Hans Zimmer, Ramin Djawadi y trueps d'autri. Chertes de ntreda pòssen giapé te duta la lies dl turism de Gherdëina. Per duc saràl zeche de nteressant leprò!

Ensemble Zefiro pra valgardenaMusika
L cunzert dl Ensemble Zefiro sarà da audì n juebia ai 17.08. dala 21.00 tla dlieja de S. Cristina
L Ensemble Zefiro ie unì metù su a Mantua tl ann 1989 da Alfredo Bernardini, Paolo Grazzi y Alberto Grazzi. Dala fundazion incà à la grupa sunà pra festivals de mujiga nternaziunei mpurtanc coche a Barcelona, Londra, Praga y nce te ziteies desferëntes dl Israel y Egit, ulache l à cun si program fat gran paruda y cun si mujiga faszinà spetadëures y stampa. L ensemble Zefiro ie ti ultimi ani deventà n pont de referimënt per l repertoire dla mujiga da camera dl' 700 y '800. L pieta na bela lingia de mujiga: cunzerc a 5 y per strumënc solisć de Vivaldi, mujiga de Händel, ouvertures y cantates de Bach y nce mësses de Haydn.
La grupa metuda adum da oboes, tlarinec, corni y fagoc sunerà pra chësc cunzert de Ludwig van Beethoven l pez Parthia op. 103 te Es-dur y Wolfgang Amadeus Mozart la Serenade te c-moll y pec dle "Nozze di Figaro".

"Mumënc" de Giuseppe Rumerio
Giaurida dla mostra n lunesc ai 14 de agost dala 18.00 tl Tublà da Nives. Da udëi nchin ai 3 de setëmber
L scultëur Rumerio de Urtijëi se à dedicà na vita ntiera ala scultura de tieres, chë ie oradechël nce deventeda mpue' si pascion, de viver da daujin la vivanda dla natura salvera, sentì la magia dl mond di tieres. Si lëures ie fac drët a puntin y dà inant na eleganza chel ie n plajëi a ti cialé. Oradechël à Rumerio na lesirëza tl manejé l lën, bront y i autri materiai che chësta natura nes manifestea. L ie opres che nes conta de n mond de chël che l'ert ie esprescion de na persona, che ie bona de ti purté inò plu daujin al usservadëur na natura desminceda. La ntroduzion ala mostra fajerà Vinzenz Senoner, danterite sona Ivan Rumerio (oboe) y Giulio Garbin (tlavier).
La mostra resta davierta nchin ai 3 de setëmber, uni di dala 10 nchin la 12 y dala 16 nchin la 19. De dumënia, merdi, mierculdi y vënderdi pòssen jì a ti cialé ala scultures nce dala 20.30 nchin la 22.30.