Manifestazions atuales speziales

Data

13 de auril 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 13 de auril
20 ani Cor di Jëuni S. Cristina
Cunzert ncuei vënderdi 13.4. y duman sada ai 14.4. tla cësa de cultura O.v. Wolkenstein te Sëlva
Per chësc anuel à l Cor di Jëuni de S. Cristina mparà ite la cianties per cor scrites per l musical "Naledi – an African Journey", cun mujiga y storia de Franco Prinsloo. Naledi ie n musical african particuler che nterpretea la mitologia y l folclor sudafrican te na maniera cuntemporana, de nosc tëmps.
L Cor di Jëuni de S. Cristina nvieia duc a unì a scuté su l cunzert per i 20 ani da canche l ie unì metù su, ncuei vënderdi ai 13.4. dala 20.30 o duman sada ai 14.4. dala 18.00 tla cësa de cultura de Sëlva.

Curs de jadiné y balé cun devertimënt
De lugio y d'agost de chëst ann mët l Eisclub Gherdëina a jì trëi cursc de sport y devertimënt per mutons
Tl "Kids dance - Ice Skating - Fun Camp" possa mutans y mutons danter 5 y 10 ani unì a se devertì, fajan sport. Te na cumbinazion de lezions de jadiné sun dlacia y lezions de bal possa i mutons mparé truepa abiliteies de cuordinazion, de balanz, de flescibltà y de stabiltà dl corp. L program de alenamënt unirà acumpanià da ativiteies d'uni sort y dantaldut truep devertimënt. Al team de prufesciunisć dl "camp" ti stàl a cuer n acumpaniamënt cualificà di mutons.
L vën pità trëi cursc:
Prim curs: 16 - 20 de lugio
Segondo curs: 20 - 24 de agost
Terzo curs: 27 - 31 de agost
L curs dura for dala 9 nchin la 15.00 y costa 160 euro. N possa se scrì ite nchin ai 10 de mei, cherdan su l numer 333 2578392 o passan tla butëiga Nero Fluido a Urtijëi.

Liams danter storia y modernité
Ai 19 d'aurí a La Ila: na serada cun Danila Serafini sot al titul "Intreciamënt y influënzes anter ert, sciënza y tecnologia dal 1300 cina incö"
Tratan la sëra de formaziun culturala, sarál l'esperta d'ert dott.sa Danila Serafini che portará dant valutaziuns y pinsiers interessanc che reverda l'ert, la sciënza y la tecnologia dal 1300 inant cina incö. Cun l'aiüt de foto de operes d'ert, Ves daidará la referënta capí i coliamënc nanter la storia y la modernité. Al gnará fat n aprofondimënt sön deplü aspec soziai che l'ert spidlëia te sües operes tles epoches desvalies.
Le referat vëgn tigní en jöbia ai 19 d'aurí dales 20.00, te biblioteca da La Ila. Organisaziun: Consëi de Formaziun Badia.

"Familiars fej le guern a ciasa"
Sot a chësc titul vëgnel tigní ai 16 y 18 d'aurí döes serades cun esperc, te Raiun Sozial a Picolin
Tl cërtl dles incuntades por le curs "Familiars fej le guern a ciasa" él dui apuntamënc en lönesc ai 16 y en mercui ai 18 d'aurí dales 20.00. Gregorio Rungger, neurologh tl spitol da Bornech, baiará le lönesc dl bot al ce (Schlaganfall), la terza gauja de mort ti paisc industrialisá y la gauja prinzipala d'invalidité. Al baiará de sintoms, terapia y ince de prevenziun.
Anton Huber, psicologh tl spitol da Bornech, baiará le mercui de "Tëmes y depresciun tla terza eté". Propi canche an vëgn vedli él de gran cambiamënc che influësc sön la cualité de vita sides fisica co psichica. Al paia la mëia da ti ciaré plü avisa a na moda che an pois capí che ara vá da prevení tëmes y depresciuns y avëi impó na terza eté plëna de ligrëza y contentëza. Ël dará consëis y indicaziuns sön co mantigní na bona sanité psichica, ince te chësta pert dla vita. Les serades é davertes a dötes y a düc, al n'ó nia ester na prenotaziun. Ares mët man dales 20:00.

Cunzert cun la "Familia Schuen"
N lunesc ai 16.4. dala 20.30 tla Cësa de Cultura de Urtijëi
Per stlù ju la 51ejima sajon di cunzerc di Jëuni de Mujiga de Gherdëina nes aspietel na sëira, ulache ... "L rundenësc ora de de vedla cunties..."
N viac de mujiga tres l mond mistich dla lijëndes dla Dolomites! Andrè Schuen y Daniel Heide, la "Ganes" y la familia Schuen cianta cianties artistiches, populeres y pop y nes lascia scuvierjer dut l cosmos dla ciantia, dal jazz al pop ala ciantia populera.
L bariton Andrè Schuen y si acumpaniadëur Daniel Heide al tlavier, la grupa "Ganes" cun la surans de Andrè, Marlene y Elisabeth Schuen, coche nce pere Paul y l'oma Hilda ne conta nia mé dla lijëndes dl "Rëgn de Fanes", ma i ti dà nce n sotfonz mujighel cun cianties y meludies che vën ora da plu seculi.
Per i abunei ai Jëuni de Mujiga:
L vën prià bel de unì dan la 20:15 acioche n posse garantì n post da senté!

Matinee cun prejentazion dl liber "Die Entdeckung der Dolomiten"
N sada ai 21.4. dala 10.00 tl Museum Gherdëina a Urtijëi
L Museum Gherdëina nvieia a chësta matinee cun l curadëur Erwin Brunner y l mëinacrëp Othmar Prinoth, te na cunversazion cun Ingrid Runggaldier.
Dan plu de 150 ani ova doi gentlemen nglëisc y si fenans fat n viac tres n raion nia cunesciù: la Dolomites; cun marueia, plëns de ntujiasm, for inò, cun la calés, cun mui, suvënz a pe. Si liber de viac "The Dolomite Mountains" ie unit ora tl 1864 a Londra y à per l prim iede purtà a lum l mond di crëps majarei. Da ntlëuta ie la Dolomites n travert dejidrà tl cuer dla Elpes. L jurnalist Erwin Brunner à dat ora da nuef la prima traduzion de Gustav Adolf Zwanziger di ani 1865 y 1868 te na verscion laureda ora y scurteda.
Da dedò ie duc nviei a n pitl renfrësch tla sezion geo-paleontologica dl Museum.
La ntreda ie debant. La prejentazion ie tla rujeneda tudëscia.

"En monn de soms"
Conzert dl Cor Mosaic, indoman sabeda ai 14 d'aurí a Al Plan
Le Cor "Mosaic - Singers & Players" inviëia dër bel a so conzert sot al titul "En monn de soms - usc fines se lascia aldí". Le conzert vëgn tigní indoman sabeda ai 14 d'aurí dales 20.00, te salf dles manifestaziuns d'Al Plan.

Curs da nodé por chi dles elementares
Dai 18 d'aurí cina amez ma vëgnel tigní n curs, te nodadoia da La Ila
Te nodadoia da La Ila vëgnel tigní n curs da nodé por mitans y mituns dles scores elementares. Le curs mët man en mercui ai 18 d'aurí dales 16.00 y vá inant por indöt 8 leziuns, fina amez ma. Les iscriziuns vëgn tutes sö le pröm iade söl post. Informaziuns pro Ubi Valentini al 0471/839714 (da sëra). Chësc curs vëgn fat al post de chël da d'isté.

Fá ordin ti documënc de ciasa - Ci dificolté
Sot al titul "Ablage - eine Plage", vëgnel tigní en jöbia ai 19 d'aurí n curs por mëte ia i documënc sciöche al toca
Ince te nosta vita privata gnunse a contat cun tröc zetli. Chësc curs nes insëgna n sistem de co mëte ia documënc te na manira tlera y ch'an i á atira da tó ca.
Michaela Trompedeller nes dará consëis sön co cherié plü ordin ti documënc privac, tratan le danmisdé dla jöbia ai 19 d'aurí. Le curs vëgn tigní tla biblioteca a Badia dales 9.00. Organisaziun: Consëi de Formaziun de Badia.

Reuniun generala dla SEA
En jöbia ai 26 d'aurí dales 19.30, tl salf dl Istitut Ladin a San Martin de Tor
Pro la reuniun generala dla Sea - Sorvisc Energia Ambiënt, preodüda por la jöbia ai 26 d'aurí a San Martin, gnarál traté n ordin dl de de 3 punc: 1) Relaziun dl presidënt Martin Clara sön l'ativité dl 2017; 2) Aprovaziun dl bilanz di 31.12.2017 y destinaziun dl ütl (che é a desposiziun tl ofize dla SEA a San Martin o söla plata internet www.sea.bz.it); 3) Desvalies.