Manifestazions atuales speziales

Data

18 de mei 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 18 de mei
Rumon su nosc luech
L Chemun de Sëlva deberieda cun la Lia per l Turism nvieia nce chëst ann a fé pea pra l di ecologich n sada, ai 26 de mei 2018. N se anconta te Sëlva, dan la Cësa de Cultura "Oswald von Wolkenstein" dala 8.00 daduman
Tlo saràl i destudafuech y i stradins de Chemun, che cuordinerà l'azion, metan adum la grupes y les destinan ai ridli. Ëi partirà ora a duc chëi che vën a fé pea, sac, manëces y n gurmel (che l Chemun à lascià fé aposta per chësta azion), dan che n pierà ora per l luech a tlupé su l refudam lascià ncantëur.
Duta la lies, assoziazions y duta la jënt de Sëlva ie drët bel nvieda a judé pea a rumé su nosta Sëlva!

Ganes - "an cunta che" live
En jöbia ai 24 de ma, dales 20.00 tl Vinzentinum a Porsenú
Inier. Incö. Indoman. Les Ganes soga cun le tëmp. Tres plü personal, tres plü madü devënta l'univers de sonns dles trëi ëres. Ares mostra tler che tradiziun y modernité pó vire adöm. Ares pó se uní y deventé öna na cossa sora. Ducejin, mo epich. Serius y ligherzin tl medemo momënt.
Le conzert vëgn organisé dala fondaziun "Vinzentinum pro futuro".
Entrada debann.
Spënores de buna man i röia sot a forma de stipendiums a scolars dl Vinzentinum, che vëgn fora da families cun situaziuns finanziares malsigüdes.

"bekleiden"
La Lia Mostra d'Ert nvieia ala giaurida dla mostra de Martin Pöll, ncuei vënderdi 18.5. dala 20.30 tla sala dla Lia a Urtijëi sun Plaza S. Antone
L artista nstës spiega nsci si mostra: „La mostra "bekleiden - tré sëura" pieta na udleda a coche l vën a s'l dé mi lëures atuei. L prozes de fé n lëur ie na pert mpurtanta de mi opres, p.ej. jì a crì reja o pleces, che giapa pona si forma. Ie me feje marueia dla cualiteies y variazion dla natura, coche la tol ite la lerch te plu manieres desferëntes. L titul "tré sëura" reprejënta la ntraunides dla natura che se spidlea te mi lëures, ajache cun materiai desferënc se làscel dessenië do i mudamënc dla natura."
La mostra de Martin Pöll sarà da udëi nchin ai 1. de juni uni di dala 10.00 - 12.00 y dala 16.00 - 19.00, de lunesc réstela stluta.

"I sucrëc dl bosch"
N sada ai 26 de mei te Val, te Sëlva
Viver la natura cun cë, cuer y man; chësc ie l pensier zentrel de na manifestazion alalergia cun Georg Kirchmaier, n espert de pedagogia forestela. Ël cunterà de cie che l bosch possa nes dé a nëus persones y de si tesores che l tën sucrët y nvieia duc a jì tres l bosch y l scuvierjer da nuef cun uedli, urëdles y cuer davierc.
Per fé pea iel da se scrì su tla "Butëiga dl Mond" a Urtijëi, danter i 22 y 25 de mei (max. 20 persones dai 6 ani insù). Da tò pea iel velch da bever y da maië.
Duc i nteressei, pitli y granc, ie nviei a unì n sada ai 26 de mei da 10.00 te Val te Sëlva (nchin la 4 domesdì).
La manifestazion toma ite tl proiet "Ti dé tëmp al tëmp" y vën metuda a jì dala Lia per Natura y Usanzes. Nfurmazions dl proiet ie da giaté sun www.manif.it y www.facebook.com/furmaziongherdeina sciche nce sun de plu stampac.

"Flistres", poejies de Roland Verra
Prejentazion n vënderdi ai 25.5. dala 18.00 a Urtijëi tla sala dla Lia Mostra d'Ert/Circolo
L Istitut Ladin Micurà de Rü nvieia ala prejentazion dl liber de poejies cun Marco Forni y l autor nstës Roland Verra. Danterite saràl nce da audì vel' pez de mujiga sunà da Viktor Canins.
Tla paroles danora scrij l autor: „Chësc liber ie l resultat de na nrescida poetica de plu ani. É cris la forma curta per cundensé miec chël che ulësse dì, davia che ove bele fat esperienzes artistiches de plu sortes y ne ulove nia resté pra formes espressives che ove bele purvà ora tl passà.
L ne ie nia saurì dì n curt, te mé cin' risses, n pensier, n sentimënt, na sensazion... ma suvënz ne juda massa paroles nia y les possa vester te troi, sce n uel vester senzieres cun sé nstësc y cun i lijëures."

Conzert de Pasca de Ma
La Musiga d'La Pli inviëia a so 25ejim conzert te salf ai 20 de ma 2018 dales 20:30
Tl program de chësc 25ejim Conzert de Pasca de Ma sot la direziun de Andrea Daverda él toc desvalis che dess rapresenté n pü' la storia di conzerc de Pasca de Ma a La Pli.

"Architetöra tla Ladinia y fora por le monn"
Chësc é le tema dl concurs fotografich 2018, metü da jí dal Fotoclub Val Badia
Le Fotoclub Val Badia mët da jí ince tl 2018 le concurs de fotografia davert a düc, cun le tema "Architetöra tla Ladinia y fora por le monn".
Pro chësc tema tomel ite düc i retrac olach'al vëgn dant l'architetöra, te na forma prevalënta o ince ma te detais dl retrat. I partezipanc vёgn inviá da dé jö fotografies dla Ladinia y de iadi fora por le monn.
Les 30 plü beles fotografies gnará metüdes fora te na mostra da d'altonn y les 10 plü beles, chirides fora da na juria, gnará premiades cun la soma de 250, 150 y 100 euro por i pröms trëi posć y de 25 euro dal 4. al 10. post.
Vigni partezipant al concurs pó dé jö alplü 5 fotografies, meton pro vigni fotografia l'inom dl fotograf y n titul o descriziun.
Les fotografies pó gní dades jö sön CD/DVD, usb-stick o cun le sistem de trasmetüda de dac www.wetransfer.com ala mail fotoclubvalbadia@rolmail.net.
Le format mëss ester jpg y mëss avëi almanco 5 mega pixel. Les fotografies sön CD/DVD o stick mëss gní menades te na busta stlüta al: Fotoclub Val Badia, Str. Pares 10, 39030 La Val. Al vёgn recordé che i partezipanc dl concurs dess mené n file Word cun inom, misciun y mail al Fotoclub, por podëi gní contatá sce ai á davagné. L'ultim termin por dé jö les fotos é i 16 de setёmber.

La cultura ozidentala y chëra indigena dles Andes
Ci liëia pa chëstes döes cultures? Ci é pa le sciamanesim y ci pó pa nes dé le savëi y la vijiun dl monn di popui originars dl'America? De chësc baiarán te na serada a Badia
En lönesc ai 21 de ma dales 20:00, sarál tla Ciasa J. B. Runcher a Badia na incuntada cun Enzo M. Trosso, varidú peruvian de 45 agn, nasciü da n pere piemontesc y chersciü sö tl Perú, instës pere de 4 mituns. Al á studié sciënzes politiches y economiches tl'Inghiltera y ti Stac Unis. Cun 25 agn ál metü man da conësce damí les cultures di popui originars dl'America y da s'avijiné al Füch Sacher de Itzachitatlan, deventan portadú de Chanua y balarin dl Sorëdl y dl Spirit.
Tl 2005 ál metü man da conësce la naziun di Q'eros, n popul dles Andes de incër 300 families che á suravit por 500 agn cun sües tradiziuns culturales intates, despartis dal rest dl monn cina tl 1955, mantignin le savëi tradizional pre-colombian.
Enzo Trosso nes dëida capí le contribut che la cultura di popui originars dl'America pó nes dé por vire damí te nüsc tëmps. La serada vëgn organisada dal Consëi de Formaziun dl comun de Badia.

Corvara: conzert d'aisciöda
La Müjiga Calfosch-Corvara tëgn en vëindres ai 25 de ma so tradizional conzert d'aisciöda, sot ala bachëta dl dirighënt Gerhard Mohr
Le conzert mët man dales 20:30 tl salf dles manifestaziuns Franz A. Rottonara a Corvara, cun le toch "Festmusik der Stadt Wien", por passé spo ala composiziun "Dolomites Unesco World Heritage". Tratan le toch, scrit dal componist südtirolesc Hansjörg Mutschlechner por la protlamaziun dles Dolomites sciöche patrimone Unesco, podarán odëi fotografies de nostes munts fates da Josef Hackhofer y d'atri fotografs. "Born4Horn" é le titul dl toch che gnará porté dant dala Musiga adöm cun n grup de corns dles musighes dla Val Badia, denanche aldí la ciantia "Nessaja" fora dl musical "Tabaluga", ciantada da Johanna Dapoz y Maximilian Mohr. La musiga lasciará aldí tla secunda pert le toch "Alte Kameraden", na seleziun de melodies fora dal musical "Les Misérables", sciöche ince musiga da film de Hans Zimmer, y por stlü jö le conzert le marsc "Kaiserin Sissi". Düc i amanc dla musiga é dër bel inviá da gní a ascuté sö le conzert y passé na serada.

"Oceania" a La Ila
Proieziun dl film animé Disney, ai 25 de ma
Le Consëi Cultural tl Comun de Badia inviëia mitans y mituns da gní a ti ciaré al film d'animaziun dla Walt Disney "Oceania". Al gnará mostré en vëndres ai 25 de ma dales 17:00, tla Ciasa dla Cultura a La Ila.

Olimpiades dles Families te Mareo
N de de devertimënt, jüc a scuadres y alegria, la sabeda ai 26 de ma pro le ciamp dal sport d'Al Plan
En sabeda ai 26 de ma dales 9:00 danmisdé gnarál metü da jí pro le ciamp dal sport d'Al Plan de Mareo les Olimpiades dles Families 2018. Al pó tó pert mitans y mituns dles elementares y dla mesana dl comun de Mareo. Al é da se scrí ite a copies, dagnora n scolar o na scolara deboriada cun n genitur o n parenté che á complí i 18 agn. Soghé sogarán te scuadres da 4 porsones (dui scolars y dui gragn), che gnará trates fora en chël de. Iscriziuns cina la jöbia ai 24 de ma pro Pablo Palfrader al 333/4762010 (Ince mené n SMS o Whatsapp, don dant inom, cognom y paisc di partezipanc, sciöche ince la classa de scora che le möt fej).
Cost: 15,00€ a copia (da paié ite en chël de); lapró él la marëna cun na boanda y n früt. Por i mëndri vëgnel pité intratignimënt a pert cun i "Kinderfreunde". Infos plü menüdes pro Helga al 333/2181049 o Pablo al 333/4762010.

Wisetime&Pëufla tl Saj.un
Tla cornisc dl "1.st.friday.live.session@SaJ.un" sonará en vëndres al 1. de jügn dales 21:00 i grups "Wisetime" y "Pëufla"
Le grup "Wisetime" é incö n grup de sis jogn, metü sö ti pröms mëisc dl 2011 da, "Guz" Gustav Mangutsch y "Tepo" Stefan Piccolruaz de Badia, che â bele da plü tëmp le dejidere da mëte adöm n grup nü 'cover', por i dé indô vita a de vedles cianties rock y oldies nia plü tan ascutades o ince jüdes a perde cun le passé di agn. Le grup é defata gnü conesciü tla Val Badia y á ciafé tröpes ofertes da soné te locai y pro festes alaleria.
I Pëufla é n grup rock - pop dër aprijé de Gherdëna, atif da passa 23 agn. La band, metüda adöm da 5 mëmbri, sona cianties por inglesc, talian, todësch y ladin componüdes da ëi instësc y cover de d'atri grups. Ai se presentëia cun usc, tastiera, chitara, bas y percusciuns.

Gherdëina, n viac ti tëmps passei
N sada ai 26.5. dala 17.00 tla Cësa de Cultura a Urtijëi, prejentazion dla publicazion nueva
L Museum Gherdëina à dat ora n liber nuef (Edition Raetia) che conta la storia de Gherdëina, dai milions de ani de evoluzion dla Tiera ai milesc de ani de preustoria dla valeda nchin ai catercënt ani de tradizion tl'ert. N viac tl tëmp, che se stiza sun la culezion dl Museum a Urtijëi. La prejentazion unirà fata dala diretëura dl Museum, Paulina Moroder, che à nce curà la publicazion cun la cunlaurazion de Gretl Senoner. I tesć ie unic scric da de plu autores esperc dla culezions y di esponac defrënc. Chisc autores sarà prejënc y rujenerà tl cuntest dla moderazion de Roland Verra.
La parola arà nce de plu autoriteies y danterite puderàn audì la grupa "Chëifree Jazz"; daldò ie duc nviëi a fé na viva.
Per l'ucajion ie l Museum tla Cësa di Ladins daviert dala 14.00 nchin la 16.30; la ntreda ie debant. Chësta manifestazion fej per dl proiet "Ti dé tëmp al tëmp".

Montes astrates de Helmar Demetz
Mostra de pitures a Scandicci tla Toscana dai 28.5. ai 16.06.2018
N sada ai 26 de mei dala 21.00 saràl la giaurida dla mostra de pitures dal titul "Astrattismi" linies y culëures di crëps de Gherdëina. Sun nvit dla sezion dl CAI de Scandicci mët l artista de S. Cristina ora si opres d'ert tla sala Camilli – CNA Scandicci, n ucajion de na manifestazion sun la Dolomites.
Cun la mostra, che à la montes sciche pont zentrel, vëniel mustrà su l liam sterch dla jënt da mont, te chësc cajo di ladins, cun si crëps, che devënta belau n simbul de identificazion, coche mé per dì l Sela per duc i ladins o l Saslonch per chëi de Gherdëina. L artista cëla de renterpreté te si pitures, te na maniera astrata, linies y culëures di crëps, cun l stramudé dal cueciun rujënt al violet dla nrosadura ai culëures ndurei dl levé dl surëdl daduman y te si linies che ne n'ie mei la medemes.

Conzert d'aisciöda dla Musiga d'Al Plan
Indoman sabeda ai 19 de ma dales 20:00, tl salf dles manifestaziuns d'Al Plan
La Musiga "Catarina Lanz" d'Al Plan á le plajëi da invié a so conzert d'aisciöda, chësta sabeda ai 19 de ma dales 20:00, tl salf dles manifestaziuns d'Al Plan. Sot la bachëta dl dirighënt Georg Plazza gnarál pité n program de 8 toc. Danter chisc ince le toch "Lieder die wie Brücken sind" aranjé da Thorsten Reinau, che gnará porté dant deboriada cun le cor di mituns dla elementara y mesana. Danter la pröma y secunda pert sarál l'ocajiun da surandé n valögnes onoranzes. Düc é bel inviá.

"I ciafi mia balanza, danter alc y basc!"
Referat cun Susanne Steidl, en jöbia ai 24 de ma dales 15:30, te Raiun Sozial Val Badia a Picolin
Le Raiun Sozial Val Badia organisëia n referat dal titul "I ciafi mia balanza, danter alc y basc", cun la referënta conesciüda Susanne Steidl da San Laurënz. Tratan chësc domisdé este tö tl zënter y to bëgnsté. Tla vita n'él nia dagnora ma bel tëmp. Al é dis o ince momënc lunc rî, pesoc, olach'an ne se stá nia saurí. Te impares co fá cun i alc y basc tla vita, co ciaré de te instës/sa, da ciafé tëmp por te sté damí, da te relassé y ciafé forza da jí inant. Le resultat é na vita plü armonica y relassada. Te ciafarás impulsc y consëis, al gnará fat ince eserzizi de relassamënt.
Le referat vëgn organisé tl cheder dles incuntades dl grup de autoaiüt "Atmosfera", te Raiun Sozial a Picolin, en jöbia ai 24 de ma dales 15:30. Al é da s'anunzié anter i 23 dema al 0474/524552. Al é ma 15 posć a desposiziun.