Manifestazions atuales

Data

25 de mei 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 25 de mei 2018
Temp lede
"I sucrëc dl bosch"
Duman sada ai 26.5. dala 10.00 te Val/Sëlva, cun Georg Kirchmaier, espert de pedagogia forestela. Ël cunterà cie che l bosch possa nes dé y di tesores che ël tën sucrët, y nvieia duc a jì tres l bosch y l scuvierjer da nuef cun uedli, urëdles y cuer davierc. Per fé pea iel da se scrì ite tla "Butëiga dl Mond" a Urtijëi mo ncuei 25.5.. L ie da tò pea velch da bever y da maië, ajache la dura nchin la 4 domesdì.
Jita cun la roda
Ncuei vënderdi ai 25.5, per l'ucajion dl'Enes dla Familia, mët l club Rodes Gherdëina a jì na jita cun la roda per genitores cun si mutons da 7 ani insù. N se urterà dala 17.00 pra la stazion dla furnadoia de Mont de Sëuc per furné su y jì da iló inant cun la roda.
Sëira de Fox
Ncuei vënderdi ai 25.5. dala 20.30 tla sala Raiffeisen te cësa de chemun a S. Cristina, cun la Grupa de Bal populer S. Cristina/Sëlva. La grupa de bal nvieia de cuer duc i balarins jëuni, manco jëuni y restei jëuni, a na sëira de fox. Tulëde pea bona ueia y unide a balé cun nëus.
Di dla roda tl zënter de Urtijëi
Duman sada ai 26.5. dala 9.30 inant. L sarà n di dedicà ala roda a lectrisc. Duc arà la ucajion de purvé ora debant na e-bike y de fé pea la jites pitedes dai mprësć de rodes de Urtijëi. Per i mutons vëniel njenià sun Plaza S. Antone n percurs da fé cun la roda da mont. Dala 11.30 purveràn oradechël de se mëter adum tla majera lingia de e-bikes dla Dolomites.
36. Oswald von Wolkenstein-Ritt a Fie
N dumënia ai 27.5. vëniel inò a s'l dé la raiteda plu spetaculera de Südtirol cun 36 scuadres, che garejea a Ciastel y Sëuc cun la garejedes fineles y plu faszinëntes a Fie. La festa scumëncia bele n vënderdi ai 25.5. y va inant n sada ai 26.5. tl luech de Fie. Na defileda, mujiga dal vif y de bona roba da maië y da bever garantësc n bon devertimënt. Nfurmazions plu avisa sot a www.ovwritt.com.
Trix: sëira de juesc da mëisa per jëuni
N vënderdi ai 1.6. dala 20.30 ala 24.00 tl local di jëuni "Saut" a Urtijëi. Sce ëis ueia de ve devertì te na blòta cumpania, unide ala sëira de juesc da mëisa, ulache l vën pità juesc da mëisa per uniun. I juesc vën cunsiei y spieghei dai cumëmbri dla lia Trix.
Vijité n mesc plën de cultures, de richëza y abundanza
N dumënia ai 3.6. dala 13.30 ala 17.30 ti cialons plu avisa a n luech da paur a Albeins, Musberg, ulache union acumpaniei a cialé cie che crësc ti ciamps, prei y verzons y sentì legrëza y pascion per la natura. L ie da apusté danora la pitla marënda, cherdan su Brunhilde dla Lia Sanynton al 3331079990.
"Nchin a ti cunfins"
Risk to trust, cun i pedagogs de esperienzes B. Egger y D. Laner Leiter. I jëuni ie nviei a fé pea n domesdì pedagogich d'aventura. Deberieda cun na persona adulta possi abadé ulache ie si cunfins, avëi crëta un al auter y mparé truep de nuef. Chësc n sada ai 9.6. dala 13.00 inant dan l parch Emozion Col de Flam a Urtijëi. Jëuni da 10 ani insù ie nviei a se scrì ite nchin n juebia ai 31.5. tl ufize dla NJG, 0471 799006. L puderà mé fé pea 10 pèr.
Stories por mitans y mituns dai 2 ai 5 agn
En jöbia ai 31 de ma é mitans y mituns dai 2 ai 5 agn inviá da gní dales 15:00 te biblioteca da La Val. Al gnará cunté de beles stories. Organisaziun. Biblioteca Sas dla Crusc.

Referac
La marueies dla migrazion di uciei
N juebia ai 31.5. dala 20.00 tla Biblioteca Anda Malia da Cudan, tla Cësa di Ladins a Urtijëi. Segonda pert dl referat cun l ornitologh Iacun Prugger. N sada ai 2.6. dala 9.00 ti prei dl'Arnaria a Runcadic puderàn vester leprò pra l anelamënt di uciei, ulache l unirà stlarì coche l vën fat y coche n recunësc la sortes defrëntes de uciei.
La geologia dla Dolomites
Ncuei vënderdi ai 25.5. dala 20.15 tla pitla sala dla Cësa de Cultura a Urtijëi. La Lia da Mont de Gherdëina mët a jì na sëira cun l gheologh dr. Herwig Prinoth, che cunterà dla geologia dla Dolomites.
Referat: I archifs dles Ploanies
Incö vëndres ai 25 de ma dales 20:00 él te Ciasa dles Uniuns da La Pli n referat sön i archifs dles Ploanies. Le referënt Philipp Tolloi laora tl archif provinzial da Balsan y á scrit sö i documënc de oramai düc i archifs dles ploanies dla Val Badia y podará cunté dl proiet porté inant da Provinzia y Diozeja.. Al jará ince ite plü avisa sön la maiú archif dla valada, chël dla Ploania d'La Pli. Organisaziun: Consëi de Formaziun y Ploania d'La Pli.
Fotografies de nuet tla Dolomites
Ai 25.5. dala 20.00 tl local "Saut" a Urtijëi sun Plaza S. Antone, tla Cësa di Jëuni, Ert y Cultura. L Fotoclub Gherdëina nvieia a na sëira de fotografies fates dal jëunn Fabian Dalpiaz.
L ie de plu sistems de fé cumpost per cësa y verzon
N sada ai 2.6. dala 16.00 tla sënta dla Lia Sanynton, str. La Sëlva 101. L vën spiegà co fé cumpost cun ejëmpli pratics. N giapa nfurmazions saurides da mëter n droa, ora dla filosofia dla permacultura, sibe per la cësa che per l verzon. Da dedò pòssen mo mpue s'la ciaculé pra na pitla marënda.

Mujiga
Conzert de la Musega da Poza
Doman, sabeda ai 26 de mé, da les 20.30 te tendon de Poza, la Musega da Poza porta dant sie "Conzert d'aisciuda", n nef scomenz che l la portarà a tor pèrt a "I Sons de la Dolomites" ai 29 de messèl sun Roda de Vael. Duc é envié.
Conzert de conclujiun dla Scora de Musiga Val Badia
La Scora de Musiga inviëia düc dër bel al conzert de conclujiun, en mercui ai 6 de jügn dales 18:00, tl salf dles manifestaziuns "F. A. Rottonara" a Corvara.
Al sará da aldí melodies y toc musicai portá dant dales scolares y dai scolars dla scora de musiga.
Conzert col Pentagramma
Insnet, vender ai 25 de mé da les 20.30, te sala Tisti de Molina, l'é l conzert di Pentagramma Young Singers e del Cor "Note Blu".
Cunzert dl Cor di Jëuni Gherdëina
N juebia ai 31.5. dala 19.30 tla dlieja de Badia, n vënderdi ai 1.6. dala 19.30 tla dlieja de Laion y n sada ai 2.6. dala 20.30 tla dlieja de S. Cristina. L Cor, iust unit de reviers dal cuncors nternaziunel a Budapest, se ncunforta a cianté dan a cumpanies y cunescënc tl cunzert dal titul "Colors of music" cun cianties d'uni sort, dal pez pop True Colors de Tom Kelly al pez sacral Ave Maria de Claudio Kerschbaumer.
Corvara: conzert d'aisciöda
La Müjiga Calfosch-Corvara tëgn incö vëndres ai 25 de ma dales 20:30, so tradizional conzert d'aisciöda, tl salf dles manifestaziuns da Corvara.
Conzert de musiga sacra
En sabeda ai 26 de ma dales 20:00 sarál Angela Palfrader, Simon Brandlechner y Renzo Huber che portará dant te dlijia d'Al Plan trëi cantates dal tëmp da Pasca por usc, vidora y clavicembalo de G. Ph. Telemann y na sonata por vidora y clavicembalo de G. Fr. Händel.
Badia: Conzert dl Cor di Jëuni Gherdëina
En jöbia al 31 de ma dales 19.30, él te dlijia de Badia n conzert dl Cor di Jëuni Gherdëina. Organisaziun: Consëi de Formaziun Badia.

Sozial
Deberieda: Jita sun Renon
N vënderdi ai 1.6. dala 14.00 se ancónten dan la Cësa de Paussa a Urtijëi per furné de viers dl Renon, ulache n fajerà na pitla jita furnan nce cun la ferata dl Renon. "Deberieda" ie na grupa per se ancunté danter persones che à problems psichics o de sozialisazion cun ulenteres. Per nfurmazions tel. 0471 798015. (Respunsabla dla manifestazion: Annemarie Mair).

Teater
A Cianacei a teater
Doman, sabeda ai 26 de mé da les 21.00 te chino Marmolèda de Cianacei, vegn portà dant l spetacol "L'inventore del cavallo" éjit del laboratorie "Ragazzi in scena" sostegnù da La Risola, con la regìa de Michela Marangoni e Davide Baldrati.

Publizistica
"Flistres", poejies de Roland Verra
L Istitut Ladin Micurà de Rü nvieia, ncuei vënderdi ai 25.5. dala 18.00 tla sala dla Lia Mostra d'Ert a Urtijëi sun Plaza S. Antone Circolo, ala prejentazion dl liber de poejies cun Marco Forni y l autor nstës Roland Verra. Danterite saràl nce da audì vel' pez de mujiga sunà da Viktor Canins.

Radio y Televijio
Programazion ladina sul canal 642 e TV Ladina
Sul canal de la mendranzes linguistiches TML (642) ogne sabeda taca la neva programazion ladina de la setemèna, organisèda te bloches de zirca 3 ores che se enterza a la programazion per mochen e cimbro e la pea via con chisc oraries: de sabeda h. 7.00 e 17.15; de domenia h. 10.30 e 21.00; de lunesc e de jebia h. 14.00 e 21.00; de mèrtesc e vender h. 10.30 e 17.30; de mercol h. 7.00 e 14.00.
Duc i dis da les 7.00 per mesora l'é programes per ladin col TG Ladin, l program istituzionèl del Comun general "Da Fascia en curt" e dapò i spezièi curc da l'Aisciuda Ladina 2017 e la neves da La Usc di Ladins.
Da les 7.45 l'é l program per i bec con la contìes animèdes de Pororo e l Contacontìes per endrez de l'Istitut Cultural Ladin; da les 9.00 l'é i TG per ladin, mochen e cimbro; da les 12.30 l'é "Da Fascia en curt" e dò n curt spezièl sui bai di Schuhplattler e amò l TG Ladin; h. 14.00 l'é amò i spezièi curc su l'Aisciuda Ladina 2017 e dò i dessegnes animé de Pororo; h. 17.15 Contacontìes e Pororo e h. 19.30 endò TG Ladin, Contacontìes, Pororo, Da Fascia en curt e h. 22.30 amò l TG Ladin.
Te la trei ores de programazion duta fascèna coi oraries scric de sora se pel veder l rotocalch setemanèl Pedies, che va fora ogne setemèna con na trasmiscion neva: de sabeda h. 8.00 e 20.00, de domenia h. 12.00 e 22.00 e dapò fora per duta la setemèna; sobito dò l'é la rubrica de sport "Finalzil" e amò spezièi curc. Apede a dut chest l'é semper i programes culturai de "L Cianton de l'Istitut" e "L Cianton de la musega" e dapò l teater de "Vic e Ac", l program didatich per bec "Ocio" e de etres spezièi. La maor pèrt di programes é da poder veder ence su Youtube, TV Ladina. Se pel domanèr l palinsest a l'Ofize servijes linguistics del Comun general de Fascia (luciana.detomas@comungeneraldefascia.tn.it) o a l'Union di Ladins (union@ladinsdefascia.it).
RADIO
"LADINIA LIVE": Microfons davierc sun atualità y cultura
La trasmiscion ie da audì uni merdi y mierculdi dala 13:45 ala 14:00 sun la frecuenzes de RAI LADINIA
Merdi 29 de mei - Lege Detomas e reforma Statut de Autonomia de la Region
N ejit storich é vegnù definì l'aproazion de la lege regionèla de defendura e promozion de la mendranzes linguistiches ladina, mochena e zimbra che recognosc anter l'auter la funzion de la "lia di Comuns Ladins" e l Comun General de Fascia. De chest e di ejic di lurierer per la revision del Statut rejon co l assessor regionèl a la mendranzes linguistiches Beppe Detomas, moderazion Anna Mazzel.
La trasmiscion "DAI CRËPS DL SELA"
ie da audì uni di dala 19:05 ala 19:30 sun la frecuënzes de RAI LADINIA
Vender 25 de mei - Blanch y Fosch: L hotel Miramonti
Te Sëlva iel inò n patat fiers che fej rujené y ntan chësta trasmiscion de "Blanch y Fosch" van mpue plu sot tla cuestion y analisé - tres deplu ntervistes ai ghesc te studio - coche la stà cun la cubatura dl Hotel Miramonti sun Plan de Gralba - che ie bel unì zarà ju y ulache l Chemun de Sëlva mët sën al incant la cubatura. L se trata tlo de 3200 cubich che vën vendui pian via da n priesc de basa de 1.200.000 euro. Program de Simon Moroder
Sada 26 de mei - Momënc de vita – intervista a Franca Ghedina Broca
N program de Erika Castlunger.
Domenia 27 de mei - Nicho De Biasio: La pascion de fé mujiga
Nicho De Biasio "in arte" NDPC ie n jëun che fej l D.J. ma che à nce scumencià a scri nstës mujiga. Cun la ciantia "Day Light" àl bele abù n prim suzes, nfati iel stat plu de na milion de "plays" sun Spotify". Ël nes conta de coche ie l mestier de D.J. y n generel l "business" dla mujiga moderna. Program de Simon Moroder
Lunesc 28 de mei - Museum de Gherdëina – liber nuef
Program de Leo Senoner.
Mierculdi 30 de mei - I bachec storc : n brevet fat a Moena
Program de Anna Mazzel.
TELEVIJION
Merdi 29 de mei dala 20:50 - Pizes dla Ladinia – Fennberg
Program de Manfred Stuffer y Hans Peter Karbon, a cura de Alessandro Dapunt.
Mierculdi 30 de mei dala 20:50 - Paisc dla Ladinia – Ciadin, Anpezo
Le paisc de Ciadin é a nord dla valada de Ampëz, a 1300 metri sura le livel dl mer, olache al é na picera dlijia fata sö ala fin dl 1800. Te chësc paisc él ince un di püc paurs, che é romagnüs te Ampëz, y la jënt che vir a Ciadin aprijëia scialdi la bela posiziun panoramica dl paisc, la pesc y le contat cun la natöra. N program de Erika Castlunger, camera y tai de Hans Peter Karbon.
Juebia 31 de mei dala 20:50 - Euro – magazin d'economia
Program de economia dles valades ladines de Diego Clara y Hartmann Mairhofer, produziun de ZAK Multimedia, a cura de Leo Senoner.

Informaziuns plü menüdes söi programs radio y televijion de RAI Ladinia pôn ciafè sön www.raibz.rai.it – Sun l medem sit i programes TV sarà da vedei sota "Mediateca" y les trasmiscions radio sota "Podcast".

Sport
Festa del Fascia Balon
En domenia ai 27 de mé l Fascia Balon festeja 40 egn de atività. Aló dal ciamp de balon de Cotura h. 10 tornoes di pìcoi jiadores, h. 11 messa, h. 12 marena e trates de la veia glories, h. 14.30 descorsc e premiazion di atlec più meritegoi, h. 16 partida de la Pruma categorìa contra l Spormaggiore.
Gares de roda da mont
En sabeda ai 26 de mé a Pardac con scomenz da les 13.30 l'é la Minicycling, garejèda de rodes da mont per i bec fin ai 16 egn. En domenia ai 27 de mé, semper da Pardac, ponta via la Marcialonga Craft che se spartesc sul percors più curt de 80 km e chel più lonch de 135 km.
Reunion Generela dl FC Gherdëina
N merdi ai 5.6. dala 20.00 tla sala dl Chemun a S. Cristina. Daujin ala relazions fajeràn nce rëndicont dl'atività fata cun duta la scuadres. N cialerà al program per l daunì y n arà ucajion de purté dant prupostes y critiches. Chëst ann saràl nce la vela dl cunsëi nuef y duc chëi che uel mo se mëter a despusizion per la vela ie bënunii.

Religion
Ciodí é pa Gejú gnü mazé söla crusc dala jënt?
Chësta é la domanda che an mët sön mësa pro n referat cun siur Sepl Granruaz, incö vëndres ai 25 de ma dales 20:00, tla Ciasa J. B. Runcher a Badia. Organisaziun: Consëi de Cöra de Badia.
Mostré corú sciöche cristian
En lönesc ai 28 de ma dales 20.30 él tl salf dles manifestaziuns da La Val n referat cun siur Paolo Renner, dal titul "Christen, die Farbe bekennen in einer bunten Welt". Organisaziun: Consëi de Cöra.

Cursc
Curs per se njenië ca a parturì
Per ëiles che aspieta y genitores dl daunì, che à l terminn de agost/setëmber 2018. L'ancuntedes sarà tla palestra dla cësa de paussa a Urtijëi, dai 25.6. ai 30.7. uni lunesc dala 16.00 ala 18.00/19.00. Iscrizions: CUPP tel. 0471/457457, 8.00-16.00 dal lunesc al vënderdi; email vormerkungen.bz@sabes.it; ëifoma 0471/797778, assistënta sanitera 0471/794290.

Avisc
Marcià da baraté guant per jëuni
Ncuei vënderdi ai 25.5. dala 17.00 ala 19.00 a Urtijëi tla sënta dla Nëus Jëuni a Urtijëi sun Plaza S. Antone. Uniun possa tò pea da trëi a diesc pec de guant nët y de bona cualità y s'l baraté cun i autri. L guant nia baratà ie inò da tò pea a cësa. Metù a jì dala Nëus Jëuni Gherdëina cun la Butëiga dl Mond n ucajion dl'Enes dla Familia.
L Museum Gherdëina inò daviert
L Museum a Urtijëi ie daviert dal lunesc al vënderdi, dala 10.00-12.30 y 14.00-18.00. L pieta n cheder unich dl'arpejon culturela de nosc raion cun na culezion prijeda de minerei, fossii, reperc archeologics dl raion de Gherdëina y nce na culezion d'ert, de artejanant y de vedla chiena de Gherdëina a scumencé dal XVII centené.
L Museum Gherdëina daviert n sada
N sada ai 26.5., per l'ucajion dla prejentazion dl liber nuef dl Museum Gherdëina "Eine Reise durch die Zeit - Un viaggio nel tempo", ie l Museum tla Cësa di Ladins daviert dala 14.00 nchin la 16.30. La ntreda ie debant.
Mo lerch pra n valguna ativiteies dl SAKL
La Nëus Jëuni Gherdëina fej a l savëi che l ie mo lerch pra l'enes criatives coche chëla dl cujiné y ciarcë deberieda, chëla dl'ert cun i artejans jëuni y si lia nueva "La Vëta", l'ena de teater cun Hanenn Huber y chëla dla geologia cun l Museum Gherdëina. Lerch iel nce per i dis sun la Plose y la "Fahrt ins Ungewisse" per i sculeies dla 1. y 2. tlasses dla scoles autes. Per infos passé tl ufize dla NJG o cherdé su l 0471 799006.
Udiënzes dla Uniun di Ostis
La Uniun di Ostis HGV tëgn udiënzes ince tla Val Badia, vigni secundo y cuarto lönesc dl mëis, dales 16.00 ales 17.00 tla ciasa de Comun a Badia.
L'Ofize de "Ëres dëida Ëres"
L'ofize a Bornech é da ciafé tla str. Paul von Sternbach nr. 6, info.bruneck@frauenhelfenfrauen.it. Al é davert dal lönesc al vëndres dales 8.30 ales 11.30. Fora de chësc orar, vëgnel tut sö termins sön prenotaziun. Tel. 0474/410303.
Orars tl zënter sozio-sanitar a Picolin
L'ofize dla portina por l'assistënza y cura é tl'alzada tera söla man ciampa. Ara é daverta ma plü dui iadi al'edema: lönesc dales 13:30 ales 16:00 y jöbia dales 9:30 ales 12:00. Tel al 0474/586123 te chisc orars.
La portina da tó jö sanch é daverta lönesc, mercui y vëndres dales 7:45 ales 8:30. La repartiziun prestaziuns (ex Krankenkasse) é daverta lönesc, mercui y vëndres dales 9:30 ales 12:45, mertesc y jöbia dales 8:00 ales 12:45.
Consei General de Fascia
En lunesc ai 28 de mé da les 20.30 te senta del Comun general de Fascia vegn chiamà ite l Consei General. La sescion é publica e duc pel tor pèrt.
Cors per animatores
Doman, sabeda ai 26 de mé da les 14.00 a les 17.00 l'é la terza e ultima scontrèda del cors per animatores endrezà dal Comun general de Fascia. Vegnarà rejonà de stories e lejendes di paìjes de Fascia. Info: Lisa 346 5333057 e Matteo 349 4390720.
Per miorèr l'energìa vitala
La Kinesiologa-Naturopata Biotranier Irene Deflorian endreza via per dut istà scontrèdes a l'averta de 1 ora con prateghes de Qi Gong per armonisèr l'energìa vitala mioran la sanità de cef e corp. De mercol h. 6.30 sun Pianac e de jebia h. 17.30 vejin a l'Agritur Soreie a Vich. Info: 349.3264800, info@irenedeflorian.it.
Radunanza Ski Team Fascia
L Ski Team Fascia endreza l'assemblea di sozi en mercol ai 30 de mé da les 20.00 te Oratorie de Poza. Vegn portà dant la relazion finanziaria e vegn renovà la encèries.
Scontrèda su sport e educazion
L Conseier de procura al sport del Comun general de Fascia Matteo Iori endreza insnet, vender ai 25 de mé da les 20.30 te Sorastanza de la Scola, na scontrèda averta a duc con l psicologh del sport Dario Carloni dal tìtol "Sport e educazion: canche la comunicazion fèsc la desferenza."

Chino
"Oceania" a La Ila
Le Consëi Cultural tl Comun de Badia inviëia mitans y mituns da gní a ti ciaré al film d'animaziun dla Walt Disney "Oceania". Al gnará mostré incö vëndres ai 25 de ma dales 17:00, tla Ciasa dla Cultura a La Ila.
Al chino de Tieser
Insnet, vender ai 25 da les 20.30 e doman, sabeda ai 26, da les 17.00, l'é l spetacol final de Non solo danza "La bottega delle meraviglie"; en jebia ai 31 da les 20.30 e en vender al prum de jugn da les 17.00 l'é l saggio de la scola de bal de Tieser; en vender al prum, en sabeda ai 2 e en domenia ai 3 da les 21.15 se pel veder "Deadpool 2". Info: www.cinematesero.com
LiteraKino, ultima proiezion de n film per granc
Ncuei vënderdi ai 25.5. dala 20.30 tla Bibliotech San Durich a Urtijëi vëniel mustrà n film per granc tla rujeneda taliana per l'ucajion dl'Enes dla Familia. Per ntant fìnen via cun la lingia de films LiteraKino per granc, che jirà pona inò inant d'autonn.

Dotors y Apoteches
Apoteches
L'apoteca che ie de servisc per Gherdëina, ora dl orar ordiner de giaurida, da n vënderdi ai 25.5. nchin n vënderdi ai 01.06. ie chëla de Fie, tel. 0471/725373 (orar: 8.30-12.30/15.00-19.00, sada 8.30-12.30, stlut mierculdi domesdì. Turnus: sa. 8.30-12.30/16.00-19.00, du. 10.00-12.00).
L'apoteca en sorvisc tla Val Badia, fora dl orar ordinar, dal vëndres ai 25 de ma dales 19.00 al vëndres al 1. de jügn ales 19.00, é chëra d'Al Plan, tel. 0474/501240.
Dotors
L dutor de servisc te Gherdëina da n sada ai 26.5. dala 8.00 daduman nchin la 8.00 daduman de n lunesc ai 28.5. ie l dutor Valentin Tröbinger de Sëlva, tel. 0471/773073 o l 335 6844944.
Doturs Val Badia:
Le dotur en sorvisc ti cin' comuns dla Val Badia, tl fin dl'edema di 26 y 27 de ma, é le dotur Luca Galiazzo. Prëibel telefoné al numer 342/5181295.

Iadi, jites y escurscions
Jita sun l Monte Cengio, autplan de Asiago
Duman sada ai 26.5. cun la grupa "Nëus jon pa bel plan" dla Lia da Mont de Gherdëina. N va sun troies nteressanc, tres cherzuei y galaries dla prima gran viera. Tla capela dei Granatieri iel n crist ziplà da Peter Moroder y a Asiago vàn a ti cialé al gran Sacrario di tumei. Jita saurida adateda per duc. L program avisa ie da giapé tla butëighes, ulache l ie da se scrì ite coche for.
Jita sa i "Muthöfe" y a ti cialé al mond dla orchidées
N merdi ai 29.5. mët la Lia dla Paures a jì chësta jita. N pierà via dala 7.45 te Sëlva, ferman damprò ora. Da Dorf Tirol furneràn cun la furnadoia sa i Muthöfe y de ëuta uniràn a pe. Do marënda jiràn a Gargazon a ti cialé ala "Orchideenwelt". Da se scrì ite iel nchin ai 27.5. da Isolde Grossrubatscher, tel. 333 6000191. Priesc: 30 € per bus, furnadoia y ntreda dala orchidées.

Mostres y Ert
Mostra de Matthias Sieff e Dario Bosin
En sabeda ai 26 de mé da les 17.30, al Museo d'èrt contemporana de Ciavaleis, vegn inaugurà la III edizion de Art Box Avisio con i artisć Matthias Sieff e Dario Bosin. La mostra resta averta fin ai 24 de jugn, de vender h 21-23, de sabeda e domenia h 15.30-19. En vender ai 8 de jugn h. 21.00 enconter coi artisć.
Montes astrates de Helmar Demetz
Duman sada ai 26.5. dala 21.00 a Scandicci tla Toscana saràl la giaurida dla mostra de pitures dal titul "Astrattismi" linies y culëures di crëps de Gherdëina. Sun nvit dla sezion dl CAI de Scandicci mët l artista de S. Cristina ora si pitures tla sala Camilli – CNA Scandicci, n ucajion de na manifestazion sun la Dolomites.
"bekleiden" mostra de Martin Pöll
Da udëi tla sala dla Lia Mostra d'Ert a Urtijëi sun Plaza S. Antone nchin ai 1. de juni. La mostra ie davierta uni di dala 10-12 y 16-19, de lunesc iela stluta. Ti lëures de Pöll se spitlea i mudamënc dla natura, desseniei do cun de plu materiai.
"Autarchia" de Aron Demetz
N vënderdi ai 8.6. dala 17.00, tl MANN Museo Archeologico Nazionale di Napoli, saràl la giaurida dla mostra persunela dl artista de Sëlva Aron Demetz, cureda da Alessandro Romanini. I lëures ie unic realisei aldò de n proiet de nstalazion che ie tl dialogh cun la culezions dl museum y sarà da udëi nchin ai 29 de lugio.
"Ode" de Sophie Eymond
La mostra de pitures dla artista franzëusa che viv y lëura da n pez incà a Urtijëi ie da udëi tl Café Surëdl a Urtijëi, streda Roma, da lunesc nchin sada dala 10.00 ala 19.00.
Mostra de fotografies de Lois Hechenblaikner
Do la montes - Hinter den Bergen, ie l titul dla mostra dl fotograf cunesciù per si maniera critica de udëi i raions da mont. La mostra tl Museum dla zità de Tluses ie da udëi nchin ai 23.6. da merdi nchin sada dala 9.30-12.00 y 15.30-18.00 (ai 2.6. saràla stluta).

Galaria retrac