Manifestazions atuales

Data

01 de jugn 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 01 de jugn
Dotors y Apoteches
Dotors
L dutor de servisc te Gherdëina da n vënderdi 1.6. dala 8.00 daduman nchin la 8.00 daduman de n lunesc ai 4.6. ie l dutor Michael Trocker de Urtijëi, tel. 388 2580002 (ex-ambulatuere dutor Insam tla streda Promeneda).
Doturs Val Badia: Le dotur en sorvisc ti cin' comuns dla Val Badia, tl fin dl'edema di 2 y 3 de jügn, é le dotur Luca Galiazzo, tel. 342/5181295.
Apoteches
L'apoteca che ie de servisc per Gherdëina, ora dl orar ordiner de giaurida, da n vënderdi ai 1.6. nchin n vënderdi ai 8.6. ie chëla de S. Cristina, tel. 0471/792106 o 333/1776615 (orar de giaurida 8.00-12.00/15.00-19.00).
L'apoteca en sorvisc tla Val Badia, fora dl orar ordinar, dal vëndres al 1. de jügn dales 19.00 al vëndres ai 8 de jügn ales 19.00, é chëra da Corvara, tel. 0471/830237.

Chino
Al chino de Tieser
Insnet, vender al prum de jugn h 17.00 l'é l saggio de la scola de bal de Tieser e h 21.15 vegn moscià "Deadpool 2". Chest film vegn dat ence en sabeda ai 2 e en domenia ai 3 de jugn h 21.15 e h 17.00 vegn moscià "Solo – A star wars story"; en mercol ai 6 h 21.15 se pel veder "Loro 1", en jebia ai 7 h 21.15 e en vender ai 8 h 21.15 en 3D l'é "Jurassic World". Info: www.cinematesero.com

Religion
Vita y Vaniele dialoghea deberieda
N merdi ai 5.6. dala 20.30 tla cësa de cultura a Urtijëi prejentea l Cunsëi de Pluania y i Patri misciuneres l'ena dla miscions te nosta pluania. L titul dla sëira ie: Vita y Vaniele dialoghea deberieda. Ce resultat pòssen pa se aspité? Vië a scuté su la prupostes che on da te pité!

Avisc
L Museum Gherdëina inò daviert
L Museum a Urtijëi ie daviert dal lunesc al vënderdi, dala 10.00-12.30 y 14.00-18.00. L pieta n cheder unich dl'arpejon culturela de nosc raion cun na culezion prijeda de minerei, fossii, reperc archeologics dl raion de Gherdëina y nce na culezion d'ert, de artejanant y de vedla chiena de Gherdëina a scumencé dal XVII centené.
Mo lerch pra n valguna ativiteies dl SAKL
La Nëus Jëuni Gherdëina fej a l savëi che l ie mo lerch pra l'enes criatives coche chëla dl cujiné y ciarcë deberieda, chëla dl'ert cun i artejans jëuni y si lia nueva "La Vëta", l'ena de teater cun Hanenn Huber y chëla dla geologia cun l Museum Gherdëina. Lerch iel nce per i dis sun la Plose y la "Fahrt ins Ungewisse" per i sculeies dla 1. y 2. tlasses dla scoles autes. Per infos passé tl ufize dla NJG o cherdé su l 0471 799006.
Udiënzes dla Uniun di Ostis
La Uniun di Ostis HGV tëgn udiënzes ince tla Val Badia, vigni secundo y cuarto lönesc dl mëis, dales 16.00 ales 17.00 tla ciasa de Comun a Badia.
L'Ofize de "Ëres dëida Ëres"
L'ofize a Bornech é da ciafé tla str. Paul von Sternbach nr. 6, info.bruneck@frauenhelfenfrauen.it. Al é davert dal lönesc al vëndres dales 8.30 ales 11.30. Fora de chësc orar, vëgnel tut sö termins sön prenotaziun. Tel. 0474/410303.
Per miorèr l'energìa vitala
La Kinesiologa-Naturopata Biotranier Irene Deflorian endreza via per dut istà scontrèdes a l'averta de 1 ora con prateghes de Qi Gong per armonisèr l'energìa vitala mioran la sanità de cef e corp. De mercol h. 6.30 sun Pianac e de jebia h. 17.30 vejin a l'Agritur Soreie a Vich. Info: 349.3264800, info@irenedeflorian.it.
Prejentazion del liber de don Edy
Insnet, vender da les 20.30 te gejia de Pera, vegn prejentà l liber "Ricordando don Edy" (1902-1988) – na comunanza viva, n preve datol. Duc é envié de cher.

Temp lede
Trix: sëira de juesc da mëisa per jëuni
Ncuei vënderdi ai 1.6. dala 20.30 ala 24.00 tl local di jëuni "Saut" a Urtijëi. Sce ëis ueia de ve devertì te na blòta cumpania, unide ala sëira de juesc, ulache l vën pità juesc da mëisa per uniun. I juesc vën cunsiei y spieghei dai cumëmbri dla lia Trix.
Vijité n mesc plën de cultures, de richëza y abundanza
N dumënia ai 3.6. dala 13.30 ala 17.30 jons a ti cialé a n luech da paur a Albeins, ulache union acumpaniei a cialé cie che crësc ti prei y verzons y a sentì legrëza per la natura. L ie da se nuté su danora pervia dla pitla marënda, cherdan su Brunhilde dla Lia Sanynton al 3331079990. N muev te Sëlva dala 13.30 cun auti privac.
Jita te Ncisles cun gran batadù
N sada ai 9.6. se ancónten dala 13.00 pra la stazion japé dla furnadoia de Col Raiser o dala 14.00 te Ncisles. N KVW nvieia duc a unì a fé pea.
Ancunteda dla Lies da Mont dla valedes ladines
N sada ai 16.6. pra la utia Sëurasas, cun santa mëssa dala 11.00 y dopro marënda y aurela curta cun la Böhmische de S. Cristina.
Maratona por escurjionisć "Tru di pra" a La Val
En sabeda ai 2 de jügn. An pëia ia dales 09:00 dal zënter dl paisc por fá la roda de 23km cina a La Crusc y zoruch. Sön tru sarál deplü staziuns cun val' da mangé y da bëre, sciöche ince intratignimënt. Le de se stlüj jö cun le conzert de "Me and Marie" dales 21:00 a La Val. Por tó pert ala maratona mësson se scrí ite al prisc de 45,00€ pro l'Assoziaziun Turistica da La Val.

Sport
A Pera 1° Krampus soccer
En sabeda ai 2 de jugn aló dal parch di jeghes de Piciocaa a Pera con scomenz da les 10, i Krampus da Poza endreza l prum Krampus soccer, n tornoi de balon a 5 dedicà ai desvalives gropes de Krampus avert a 16 squadres. La finala é da les 17, dò Aperitikrampus con dj Dany e h 20.30 premiazion. Info: Norman 346 6235373, Fabio 340 2155128.
Alenamënc per la Hero
Nchin ai 3.6. pòssen purvé ora i percursc de garejeda dla Hero, acumpaniei dai istrutëures de mountain bike, mparan nsci a ti vester ai ërc y a furné juvier y co se astilé te situazions defrëntes. Per nfurmazions y per se scrì ite pòssen cherdé su l 0471 777999 o mandé na email a active-events@valgardena.it.
Tornoi de balon a Soraga
Dai 11 de jugn sul ciamp de balon de Soraga vegn endrezà la 2^ edizion de "Soraga League" n tornoi de balon a 5 con music bar. Iscrizions dant de en lunesc ai 4 de jugn da Kevin 340 1422461, Damiano 347 7585125, Roberto 334 6835736.

Cursc
Café leterer per tudësch
N merdi ai 5.6. y n juebia ai 7.6. dala 9.30 nchin la 11.00 tla Bibliotech San Durich a Urtijëi. S'la ciaculé per tudësch pra n tòch de tëurta y n bon café, cun Ivana Peristi. N ne n'à nia drë de se lascé nuté su, l basta passé te bibliotech y fé pea.
Curs de jì a crëp cun i mëinacrëp
La Lia da Mont de Gherdëina mët a jì chësc curs n sada y dumënia 16. y 17.6.2018. N vënderdi ai 15.6. vëniel mo dant tenì na sëira de teoria. N possa se scrì ite dai 4. ai 13.6. da Ciofs Inge a Urtijëi, Activ Sport a S. Cristina y da Sport Bruno Riffeser te Sëlva. Per nfurmazions plu avisa cherdé su Romana al 338 8988620.
Curs per se njenië ca a parturì
Per ëiles che aspieta y genitores dl daunì, che à l terminn de agost/setëmber 2018. L'ancuntedes sarà tla palestra dla cësa de paussa a Urtijëi, dai 25.6. ai 30.7. uni lunesc dala 16.00 ala 18.00/19.00. Iscrizions: CUPP tel. 0471/457457, 8.00-16.00 dal lunesc al vënderdi; email vormerkungen.bz@sabes.it; ëifoma 0471/797778, assistënta sanitera 0471/794290.

Sozial
Deberieda: Jita sun Renon
Ncuei vënderdi ai 1.6. dala 14.00 se ancónten dan la Cësa de Paussa a Urtijëi per furné de viers dl Renon, ulache n fajerà na pitla jita furnan nce cun la ferata dl Renon. "Deberieda" ie na grupa per se ancunté danter persones che à problems psichics o de sozialisazion cun ulenteres. Per nfurmazions tel. 0471 798015. (Respunsabla dla manifestazion: Annemarie Mair).
Cena per Emergency
En mercol ai 6 de jugn da les 20.30 al restorant La Cantinetta de Varena vegn endrezà na cena a sostegn de Emergency. L cost l'é de 30 euro, de chisc 5 euro va per l Zenter de maternità de Anabah te l'Afghanistan. Preotazions a Franca 329 7417911

Radio y Televijio
RADIO
"LADINIA LIVE": Microfons davierc sun atualità y cultura
La trasmiscion ie da audì uni merdi y mierculdi dala 13:45 ala 14:00 sun la frecuenzes de RAI LADINIA
Mierculdi 6 de juni - Baiè n bun ladin mpede anuzè parores furestes
Ghest te studio: Daria Valentin. Moderaziun: Alessandro Dapunt.
La trasmiscion "DAI CRËPS DL SELA" ie da audì uni di dala 19:05 ala 19:30 sun la frecuënzes de RAI LADINIA
Vënderdi 1 de juni - Agorà: scrì per gherdëina (1a pert)
Deberieda cun Sofia Stuflesser, nsenianta de ladin te scola auta a Urtijëi, vëniel tëut ca nosta rujeneda te duta si sfumadures, cialan ulache la vën tan adurveda y coche la rujeneda vën "rujeneda" ti setores plu desfrënc. Program de Ivan Senoner.
Dumënia 3 de juni - "La chitara, mi plu bel strumënt"
Tl Tublà da Nives te Sëlva iel unì metù a jì na sëira dedicheda al bel sonn dla chitara. L fin fova chël de ti mëter a disposizion l palch a duc chëi che sona gën la chitara, n palch liede ulache l ne vën nia dat dant regules, ma uni un y uni una pudova suné y lascé audì ciche ti plajova a d'ëi nstësc. Program de Georg Mussner.
Lunesc 4 de juni - Cuartet leterer – Mauro Corona
L cuartet leterer de RAI Ladinia, metù adum da Rut Bernardi, Ingrid Runggaldier, Roland Verra y Mateo Taibon rejona ncuei dl roman de Mauro Corona, Il volo della martora.
Program de Leo Senoner.
Mierculdi 6 de juni - L'Ual a n crousc de via?
Te Fascia l'é crepà fora la campagna per la litazions de chest uton, tel biteboi de chisc dis l conseier provinzièl de l'UAL Beppe Detomas à dit che no l se candidarà più. Bilanz e perspetives de l'Union Autonomista Ladina. Program de Anna Mazzel.
TELEVIJION
Merdi 5 de mei dala 20:50 - Turism tla Ladinia: obietives e endesfides
L turism te nosc raion: obietives e endesfides N reportage che fèsc lum su coche vegn fata la promozion turistica te la provinzies de Trent e de Busan. Na reflescion averta su cheche se é dò a fèr, sui obietives per l davegnir e su la endesfides che se pel tor sù per meter en esser n nef conzet de turism che ponta semper de più a la valorisazion del teritorie e a la calità. Program de Cinzia Pistoia, camera e tai Fulvio De Martin, a cura de Anna Mazzel.
Mierculdi 6 de juni dala 20:50 - Personajes dl temp passé: Angel Morlang
Siur Angel Morlang é nasciü tl 1918 a La Plí de Mareo y é mort tl 2005 a San Martin de Tor. Al é sté n prou, che s'á ince dé jö dër tröp cun la cultura y l'ert. Al á depënt dër tröc chedri y al á scrit cunties, dui romans y valgügn teatri, sciöche "Fanes da zacan", che é gnü rapresenté tl 1951 alaleria sön plaza de dlijia a La Val. Por so mirit él gnü metü sö l'Ert por i Ladins y dal 1962 inant âl publiché le "Calënder Ladin", che é ciamó aldedaincö na publicaziun importanta por la Val Badia. N program de Erika Castlunger, camera y tai de Fulvio de Martin, a cura de Anna Mazzel.
Juebia 7 de juni dala 20:50 - Vies de comunicazion dla valedes ladines – Sun troies mitics
Ciuni fova pa i prims troies tla valedes ladines? Jiva pa la jënt bele zacan de viac a crì respostes ala dumandes dla vita? Co ie pa nasciuda la pruzescion sun Jevun? Ve tulon pea de viac sun i troies mitics dla valedes ladines. Program de Elisabeth Kostner, produzion de Mediaart, a cura de Anna Mazzel.

Informaziuns plü menüdes söi programs radio y televijion de RAI Ladinia pôn ciafè sön www.raibz.rai.it – Sun l medem sit i programes TV sarà da vedei sota "Mediateca" y les trasmiscions radio sota "Podcast".

Referac
Anelamënt di uciei
Duman sada ai 2.6. dala 9.00 ti prei dl'Arnaria a Runcadic puderàn vester leprò pra l anelamënt di uciei, ulache l ornitologh Iacun Prugger stlarirà coche l vën fat y coche n recunësc la sortes defrëntes de uciei.
Spëisa sana ti fej bon al cuer y al cervel
N juebia ai 7.6. dala 20.30 tla sala Raiffeisen te cësa de chemun a S. Cristina, cun la esperta de alimentazion Ivonne Daurù, che spiega cun ejëmpli cuncrec ciuna spëisa, sëures y ciun grasc che ti fej bon al cuer y ala zirculazion. L unirà mustrà ciuna sustanzes che à na bona fazion y coche n possa les tò a cujiné uni di.
"Mia esperiënza de volontariat tl Zambia"
En mercui ai 6 de jügn dales 20:00, él tl salf dles manifestaziuns da Calfosch na serada cun Verena Clara, che cunta de süa esperiënza de volontariat tl Zambia. Organisaziun: Grup Caritas.
Se fá instësc coltöra bio y sostanzes por renforzé les plantes
Le KVW da Calfosch mët da jí en jöbia ai 7 de jügn dales 20.00 te salf dles manifestaziuns da Calfosch n referat cun Alexander Huber, dal titul "Biodünger und Pflanzenstärkungsmittel selber herstellen". Informaziuns y prenotaziuns pro Marlene al 347/2440080.

Iadi, jites y escurscions
Jita cun via fereda sun l Ifinger
N sada ai 9.6 cun la Lia da Mont de Gherdëina. N furnea a Maran y su a Folzeben per jì inant sun l troi nchin pra la via fereda "Heini Holzer", che ruva sun l Ifinger. Deslivel de za. 1000 m y zirca 3,5 ëura da jì suvier. N possa se scrì ite dai 4. ai 7.6. tla butëighës sciche zënza. Infos da Benno al 338 7257909.

Mostres y Ert
Mostra de Matthias Sieff e Dario Bosin
Enscin ai 24 de jugn al Museo d'èrt contemporana de Ciavaleis, se pel veder la mostra de la III edizion de Art Box Avisio con i artisć Matthias Sieff e Dario Bosin. La é averta de vender h 21.00-23.00, de sabeda e domenia h 15.30-19.00. En vender ai 8 de jugn h. 21.00 enconter coi artisć.
„Sbrec y zeres" de Wilhelm Senoner
N ucajion di 100 ani dala fin dla Prima Viera y dla ancunteda di nëubli dla families di Habsburg y Savoia, ie l artista de Urtijëi unì nvià a fé pea a Schio pra la manifestazion de nteres storich, cun na mostra de si lëures. La manifestazion sarà ai 9.6. cun na zeremonia de giaurida dala 15.30 tl palazzo Fogazzaro tla str. Pasini 44.
Montes astrates de Helmar Demetz
"Astrattismi" linies y culëures di crëps de Gherdëina. Sun nvit dla sezion dl CAI de Scandicci tla Toscana mët l artista de S. Cristina ora si pitures tla sala Camilli – CNA Scandicci, n ucajion de na manifestazion sun la Dolomites.
"bekleiden" mostra de Martin Pöll
Da udëi tla sala dla Lia Mostra d'Ert a Urtijëi sun Plaza S. Antone nchin ai 1. de juni. La mostra ie davierta uni di dala 10-12 y 16-19. Ti lëures de Pöll se spitlea i mudamënc dla natura, desseniei do cun de plu materiai.
"Autarchia" de Aron Demetz
N vënderdi ai 8.6. dala 17.00, tl MANN Museo Archeologico Nazionale di Napoli, saràl la giaurida dla mostra persunela dl artista de Sëlva Aron Demetz, cureda da Alessandro Romanini. I lëures ie unic realisei aldò de n proiet de nstalazion che ie tl dialogh cun la culezions dl museum y sarà da udëi nchin ai 29 de lugio.
Mostra de fotografies de Lois Hechenblaikner
Do la montes - Hinter den Bergen, ie l titul dla mostra dl fotograf cunesciù per si maniera critica de udëi i raions da mont. La mostra tl Museum dla zità de Tluses ie da udëi nchin ai 23.6. da merdi nchin sada dala 9.30-12.00 y 15.30-18.00 (ai 2.6. saràla stluta).

Mujiga
Cunzert dl Cor di Jëuni Gherdëina
Ncuei vënderdi ai 1.6. dala 19.30 tla dlieja de Laion y duman sada ai 2.6. dala 20.30 tla dlieja de S. Cristina. L Cor, iust unit de reviers dal cuncors nternaziunel a Budapest, se ncunforta a cianté dan a cumpanies y cunescënc tl cunzert dal titul "Colors of music" cun cianties d'uni sort, dal pez pop True Colors de Tom Kelly al pez sacral Ave Maria de Claudio Kerschbaumer.
Trus - conzerc cun "cantus iuvenis"
Le cor da Viena "cantus iuvenis" - sot ala direziun de André Comploi - röia indô te Südtirol. I ciantarins jogn se presentëia cun n conzert dal titul "Trus", incö vëndres al 1. de jügn dales 19:30 tla Ciasa Ragen a Bornech y indoman sabeda ai 2 de jügn dales 20:00 tla Ciasa J. B Runcher a Badia. An podará ince aldí la premiera dl toch "Le lisció" cun parores de Iaco Rigo y musiga de Iarone Chizzali.
Wisetime & Pëufla tl Saj.un
Tla cornisc dl "1.st.friday.live.session@SaJ.un" sonará incö vëndres al 1. de jügn dales 21:00 i grups "Wisetime" y "Pëufla". An s'incunta tl zënter dla jonëza y dla cultura Saj.un a La Ila.
Conzert de conclujiun dla Scora de Musiga Val Badia
La Scora de Musiga inviëia düc dër bel al conzert de conclujiun, en mercui ai 6 de jügn dales 18:00, tl salf dles manifestaziuns "F. A. Rottonara" a Corvara. Al sará da aldí melodies y toc musicai portá dant dales scolares y dai scolars dla scora de musiga.

Galaria retrac