Manifestazions atuales speziales

Data

06 de messel 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 06 de messel
Vënerdi 13
Giaurida dla mostra dla Lia Artejanat Artistich de Sëlva n vënderdi ai 13.7. dala 20.00 te Tublà da Nives
La Lia Artejanat Artistich de Sëlva à cris ora per la mostra da chëst ann la tematica "vënderdi 13". Aldò de vel'uni iel n di che porta desfertuna, per d'autri iel n di coche uni auter. I artisć che se à dat ju cun chësc argumënt y meterà ora si lëures ie Roland Perathoner, Patrick Senoner, Sigmund Linder, Otto Piazza, Samuel Perathoner, Leo Ferdinando Demetz, Ivan Lardschneider, Adolf Vinatzer, Hubert Mussner, Hugo Senoner, Hannes Mussner y Jonas Senoner. Oradechël iesi tl lëur de fé deberieda n gran lëur de 5 metri de autëza, che sarà ënghe da udëi te Tublà da Nives.
La mostra, che unirà giaurida ai 13 de lugio resterà davierta nchin ai 5 de agost, uni di dala 16.00-19.00, de dumënia, merdi, mierculdi y vënderdi nce dala 20.30-22.30. Ai 15.7. iela davierta tresora dala 10.00-19.00

Segra cun i Destudafuech de Urtijëi
A Urtijëi vëniel fat festa sun Plaza Sant Antone ai 7 y 8 de lugio
Scumencià vëniel bele n sada ai 7.7. dala 12.00, ulache l unirà dat ora da bever y da maië. Dala 2 domesdì inant suneràl i "Südtiroler Mander" y dala 8 da sëira inant i "Tiroler Alpenklang".
N dumënia ai 9.7., di dla segra de Urtijëi, saràl do la Gran Mëssa la defileda di guanc dala gherdëina cun dla Mujiga de Urtijëi nchin ju n Plaza S. Antone, ulache la Mujiga tenirà dala 12 si cunzert dla segra.
Dala 3 domesdì suneràl i "Raschötzer" y dala 6 da sëira inant i "Südtiroler Hoderlumpm".
Coche da tradizion saràl nce na ola dla fertuna cun de biei pesć y sciche prim pest saràl da vëncer na e-bike.
I Destudafuech de Urtijëi se ncunforta sun Vosc unì.

Sëira dl vin tl raion da jì a pe Bënunì a Santa Cristina
Festa dl luech n vënderdi sëira ai 13.7. dala 19.30 inant pra na cërcia de vins, velch de bon da maië y de bela mujiga tl raion da jì a pe a S. Cristina
Na bela cumpëida de ciuleies dal vin de gran inuem de Südtirol piterà da ciarcë chësc vënderdi sëira na vela de vins de gran cualità, sun l tepich cueciun tl raion da jì a pe a S. Cristina.
Leprò saràl nce mesun se maië vel' bon bucon servì pra plu stonc sun ëur de streda. Sambën unirà dut adum acumpanià da de bela mujiga suneda y cianteda dala grupes "The Jam'son" y "Half Past Twelfe".
Ve aspiton a S. Cristina n vënderdi sëira ai 13 de lugio!

"Accents" cun le Trio les Finés
Badiamusica deura le Festival cun le conzert "Accents", en vëndres ai 13 de messé dales 21:00, tl salf dl Istitut Ladin a San Martin de Tor
Cun chësc program proa le trio de i dé ala musiga da ciamena val' azënt nü. Les composiziuns originales vá dal impressionism cina ala musiga minimalista de Peterson. Na gran impresciun fej la fujiun y la parité di sonns danter i trëi stromënc y la moscedaziun de sonorités vies y elastiches.
Sön paladina son Michéle Schladebach al clavier, Angela Palfrader ala vidora y Esther Videsott al saxofon. Al sará da aldí de Mark Eychenne (*1933) la "Cantilene et Danse (for alto saxophone, violin and piano)", de Russel Peterson (*1969) le Tribute Trio "Trio 2", de Jean-Luc Defontaine (*1965) i "Couleurs d'un Rêve".

"summit Bach 1"
Festival Badiamusica: conzert de orghe de dlijia cun Gustav Auzinger, en lönesc ai 16 de messé dales 21:15, tla dlijia de Badia
Le conzert pîta n iade dala perioda classica vieneja a sü scolars y al gran maester instës, ala colma dla musiga por orghe: a Johann Sebastian Bach. Lapró sarál da aldí pro "summit Bach 1" tla dlijia de Badia composiziuns de Johann Christian Kittel, Joseph Haydn, Johann Ludwig Krebs y Carl Philipp Emanuel Bach.
L'orghelist Gustav Auzinger á ciafé so pröm insegnamënt d'orghe da Peter Planyavsky y á spo fat le diplom ala Wiener Musikhochschule (musiga de dlijia, pedagogia musicala y orghe da conzert pro Michael Radulescu). D'atri stüdi ál fat tla Talia, tla Svizra y tl'Olanda. Dal 1978 incá é Gustav Auzinger diretur dla Landesmusikschule Rohrbach y insëgna al Conservatore dla diozeja de Linz. Al sona sciöche orghelist te deplü dlijies (Stadtpfarrkirche Rohrbach, St. Anna/Steinbruch y Schlosskapelle Neuhaus), y sciöche mëmber dla comisciun di orghi de dlijia dla diozeja de Linz se dál jö cun tröpes costruziuns de orghi nüs y cun restauraziuns de orghi vedli.

"divertimento & lamento"
Chësc le titul dl conzert en gaujiun dl Festival Badiamusica, che gnará tigní en mercui ai 18 de messé dales 21:15, te dlijia da Corvara. Al sará da aldí l'ensemble QuinTirol
L'ensemble QuinTirol é metü adöm da Gertraud Frank al clarinet, Ingrid Gantioler al fagot, Michael Cede al fabló, Lukas Runggaldier al'oboa y Egon Lardschneider al corn. A Corvara presentëiai na paleta ampla de composiziuns dër desvalies. La cornisc vëgn formada dal "divertimento n. 1" de Joseph Haydn cun le „Chorale St. Antoni" o indere le cuintet vital "Op. 56 n. 2" de Franz Danzi. Ti toc "Trois Pièces Brèves" di agn 1930 aldon tan bun che Jacques Ibert sá da traté i sonns di stromënc a fle de lëgn te na manira lisiera, da corusc y virtuosa da stil franzesc. Le contrast ne podess nia ester maiú che cun "Music for a Deceased Friend" (musiga por n amich defunt) de Peteris Vasks. Le compositur contemporan letonich mët a d'espresciun plüra y dolur cun na musiga mistica religiosa de gran espressivité. Sciöche da n ater planet vëgn ala fin l'odüda umorista dla musiga popolara tiroleja da pert de Werner Pirchner te so "Streichquartett für Bläserquartett", le cuartet por archëc a fle.

"for ever modern"
Festival Badiamusica: conzert cun le posaunist Mikael Rudolfsson y la pianista Valentine Buttard, en jöbia ai 19 de messé dales 21:15, tla Ciasa J. B. Runcher a Badia
Rudolfsson y Buttard vá al'archirida dla gran sonorité y s'indüna danter le vedl y le nü, inrësc sön desvalianzes y somëies danter toc dal romantizism y toc de compositurs d'aldedaincö. Le program "for ever modern" pîta composiziuns de Robert Schumann, Leoš Janàček, Bent Sørensen, Philippe Gaubert, Frank Martin, Philippe Hersant, György Kurtàg. Incoroné vëgn le program dala composiziun "Spiegel im Spiegel de Arvo Pärt."
Mikael Rudolfsson (*1987 a Stockholm) é gnü invié dai festivals plü importanc dl monn, insciö dai Donaueschinger Musiktage, da Wien Modern o ince dal Festival Internacional Cervantino. Sciöche solist ál soné cun orchestres y ensembles tla Germania, Slovenia, Russia, Messico, Norvegia y Svezia. Dal 2017 incá él mëmber dl Klangforum Wien.
Valentine Buttard (*1986 a Belfort/Francia) s'impegnëia da plü agn incá por la musiga contemparana. Ara á ciafé so insegnamënt de clavier da Rena Shereshevskaya a Colmar y á studié dal 2005 al 2014 ala Hochschule für Musik, Theater und Medien de Hannover. Intant ára deplü diploms sciöche solista y pedagoga y tëgn conzerc tla Francia, Germania y Svizra.

La cëna sot les stëres
Na gran mësa fora por le zënter da San Linert é la carateristica dla manifestaziun "La cëna sot les stëres". La jöbia ai 12 de messé él la secunda ediziun
Te chësta ocajiun gnará la strada da San Linert stlüta al trafich y iluminada da ciandëres y chentli. Deplü coghi de restoranc y hotí de Badia arjigna ca por chësta sëra n menü spezial cun produc locai. La cëna mët man dales 19:00 cun i antipasć arjigná ca dal hotel Serena y dala pension Runcac, por jí inant cun i pröms dl hotel Melodia del Bosco y Gran Ander. Le hotel Cavallino y San Leonardo se crüzia di secundi y le dessert gnará presenté dala pastizaria I Dolci di Ricky. Tratan la sëra podarán se gode les spezialités gastronomiches y la musiga dal ví cun Laura Willeit y Hubert Dorigatti, mo dantadöt amiré l'inrosadöra sön le Sas dla Crusc y plü tert le cil plëgn de stëres. Les prenotaziuns pó gní fates ti ofizi turistics de Badia, La Ila y San Ciascian y i posć sará limitá. Sce al é bur' tëmp, vëgn la cëna sot les stëres sburlada al de do.

Cursc da jadiné
L'Ice Club Alta Badia organisëia cursc da jadiné por prinzipianc y progredis
En lönesc ai 23 de messé mët man i cursc da jadiné por mituns y mitans dai 4 agn insö, pitá dal Ice Club Alta Badia por prinzipianc y por progredis. I cursc jará inant cina ala fin de agost. Le curs por prinzipianc (che n'á ciamó mai tut pert a n curs o á fat un n curs) sará n iade al'edema, vigni lönesc dales 16:00 ales 16:45. Le curs por progredis (che á bele fat plü co un n curs) sará vigni lönesc dales 16:45 ales 17:30 y vigni mercui dales 16:00 ales 16:45.
Le cost dl curs por i prinzipianc é de 55,00€, por i progredis de 85,00€. Düc i mituns y dötes les mitans che à vëia da jadiné dess s'anunzié. Por informaziuns y prenotaziuns pón telefoné o scrí al 333/2930586, anter i 16 de messé.

"Paisc in festa" a San Ciascian
Le zënter da San Ciascian pita 5 iadi fora por l'isté n domisdé cun musiga, spezialités gastronomiches y devertimënt por mituns. Le pröm apuntamënt cun le "Paisc in festa" é en mercui ai 11 de messé
Ince iniann vëgnel metü da jí le "Paisc in festa" tl zënter da San Ciascian. La manifestaziun vëgn organisada cin' iadi tratan l'isté, dagnora de mercui: le pröm iade ai 11 y spo ciamó ai 18 de messé, sciöche ince ai 8, 22 y 29 d'agost.
Marcé tipich y laboratore didatich
Vigni iade vëgnel tigní dales 16.00 inant n pice marcé de produc tipics dl post y produc di artejans, abelí dal sonn di orghi da man. De vigni sort de bun patüc da mangé ciafon spo pro i stonc gastronomics dles uniuns dl paisc y de deplü hotí y eserzizi dl post. Ince por i mituns gnarál metü da jí n bel program de intratignimënt, cun laborators didactics. Adöm cun i colaboradus dl Parch Natural Fanes-Senes-Braies vëgnel organisé le domisdé "Tl rëgn di tiers", n laboratore creatif adöm cun Daksy y i verdaparch cunta de flora y fauna di parcs naturai. Pici y gragn dai 6 agn insö é inviá da tó pert, dales 16:00 ales 19:00.
Sön les pedies dla laurs
Implü á i mituns dai 5 ai 12 agn la poscibilité da fá para dales 16:45 ales 18:30 pro le domisdé "Sön les pedies dla laurs preistorica", cun vijita al Museum Ladin Ursus ladinicus, jüc y d'atres ativités. I mituns é periá da se scrí ite pro l'Assoziaziun Turistica da San Ciascian anter les 16:00.
Liber y musiga dal ví
En ocajiun dl apuntamënt dl "Paisc in festa" ai 22 d'agost, vëgnel tigní dales 17:30 inant la presentaziun dl liber por mituns "Il gigante delle Dolomiti" de Emil Valentini, tla plaza dan la scora elementara. Do la presentaziun, che fej pert dl'iniziativa leterara por mituns "Il libro nella roccia", vëgnel tigní n laborator por mituns.
Les serades tl zënter da San Ciascian gnará animades da de vigni sort de grups musicai. Pro le pröm apuntamënt ai 11 de messé él dales 17:00 inant Don Cravallo che abelësc l'atmosfera tl zënter de paisc, y dales 19:00 pón ascuté sö les beles melodies dl grup "The Fonzies".

Sommelier te ütia
Na iniziativa nöia abelësc l'isté tl'Alta Badia. Por le pröm iade vëgnel metü da jí le "Sommelier te ütia"
Ara se trata de n domisdé lié ai mius vins de Südtirol, che podará gní ciarciá a 2.000 metri. N sommelier ti spligará ai partezipanc les carateristiches di vins che gnará ciarciá y dará ince deplü informaziuns: te ci gote vëgnel pa juté sö na certa sort de vin, la temperatöra ideala por le vin, pro ci spëisa passenëia pa ci vin y i.i. Indöt sarál cin' apuntamënc de messé y agost. Ai 13 de messé pro la ütia de Bioch, ai 20 de messé tla ütia Club Moritzino, ai 3 d'agost tla ütia Piz Arlara, ai 10 d'agost tla ütia Pralongiá y l'ultim apuntamënt tla ütia I Tablá ai 17 de agost. An s'incunta vigni iade dales 14:30 tla ütia che tol pert al'iniziativa. Les prenotaziuns mëss gní fates te un di ofizi turistics dl'Alta Badia anter le de denant