Manifestazions atuales speziales

Data

10 de agost 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 10 de agost
Orizonc cun le duo "Da Chara"
Tla cornisc dl Festival Badiamusica sarál n conzert tla scora de musiga a Al Plan, indoman sabeda ai 11 d'agost dales 21:00, sot al titul "horizons"
Cun vidora y chitara presentëia le duo "Da Chara" n program rich de corusc, cun composiziuns europeiches y südamericanes. Ai presentará sü "orizonc" danter Europa y America Latina: tango plëgns de füch, Bossa Nova plëna de melodia y ince musiga folk irlandeja dëida cherié n'atmosfera da d'isté y dala buna löna.
Le duo "Da Chara" (gaelich, che ó dí "dui amisc") é David Arroyabe ala vidora y Caroline Preißl ala chitara. Ai fej dal 2009 incá musiga deboriada y interpretëia duos classics por vidora y chitara, sciöche ince composiziuns de ispiraziuns folcloristica da plü raiuns dl monn, mo ince musiga nöia, composiziuns apostades y aranjamënc fac instësc.

"Standards" cun la Lautten Compagney Berlin
Le coliamënt danter musiga baroca y sonns moderns, en jöbia ai 23 d'agost dales 21:15, tla Ciasa J. B. Runcher a San Linert
La Lautten Compagney é n sinonim de programs inovatifs, aranjamënc nia convenzionai y humor: ai liëia adöm la musica antica cun composiziuns d'aldedaincö. Christina Scheicher (clavier), Birgit Schnurpfeil (vidora) y Mathias Kiesling (fabló traversal) é trëi musizisć dla Lautten Compagney Berlin. Cun n'impulsivité interpretativa y conzec inovatifs vá l'ensemble sura i confins fora y chir l'indunada cun sonns nüs. Danter l'ater por chëstes cualités él dl 2010 gnü premié cun l'ECHO Klassik. Al porta dant composiziuns de de gran maestri de epoches desvalies: Johann Sebastian Bach, Johann Heinrich Schmelzer, Astor Piazzolla, Georg Friedrich Händel, Katia Tschemberdji, Georg Philipp Telemann, Philipp Glass.

Angels on Ice - Spetacul sön la dlacia
En mertesc ai 14 d'agost vëgnel tigní tl stade dala dlacia a Corvara n spetacul de jadiné artistich cun atlec jogn, mo che á bele arjunt a süa eté de boniscimi plazamënc
La manifestaziun mët man dales 21:15. Dlungia i atri interprec, ne pól sambëgn nia mancé les jones y i jogn jadinadus dl Ice Club Alta Badia sciöche ince le grup de jadiné sincronisé dl post "Ice Angels" y le grup da Trënt "Ice on Fire". Le publich podará amiré l'esibiziun dl atlet da Balsan Gabriele Frangipani, che á iniann davagné le titul de campiun nazional tla categoria Junior a Milan. La jadinadëssa da Trënt Ester Schwarz, che á iniann davagné le pröm pest ai campionac taliagn elite di jogn tla categoria advanced novice feminila, mostrará sües capazités artistiches sciöche ince tecniches cun deplü salc. Les chertes por tó pert al spetacul pón cumpré ti ofizi turistics de Corvara, Calfosch y La Ila y la sëra dl spetacul pro le stade dala dlacia al prisc de 7,00€ por adulc y mituns dai 10 agn insö, deperpo che mituns cina 10 agn pó ite debann.

Premiera tl ander de Conturines
Pröma assoluta de "Tempo separato", composiziun de Eduard Demetz y esecuziun musicala da pert dl grup "conTakt", tl ander de Conturines a 2.750 m.
Le Museum Ladin, en colaboraziun cun l'Ofize Parcs Naturai Fanes-Senes-Braies y l'Assoziaziun Turistica Badia, á le plajëi da Ves invié ala pröma assoluta de "Tempo Separato", na composiziun de Eduard Demetz cun l'esecuziun musicala da pert de "conTakt" percussion group, tl ander de Conturines a 2.750 m. La manifestaziun sará en sabeda ai 11 de agost. I s'incuntun a San Ciascian ite dala "Capanna Alpina" dales 8.00 da doman. N colaboradú dl Parch Natural gnará cun nos cina sö dal ander de Conturines . Info y prenotaziun obligatora cina ai 10 d'agost dales 18.00 tl ofize turistich a San Ciascian, al nr. 0471/849422. Sce al ess da ester bur' tëmp, gnará le conzert sburlé ai 12/08 o ai 15/09. Gnide tröc, i Ves aspetun.

Conzert sacral a San Martin
En domënia ai 12 d'agost dales 21:00, tla dlijia da San Martin
Le Cor de Dlijia da San Martin de Tor, sot la direziun de Rosamunde Videsott, inviëia dër bel a n conzert sacral, che gnará tigní chësta domënia ai 12 d'agost dales 21:00, tla dlijia da San Martin.
Al gnará porté dant toc de Gastoldi, Aichinger, Händel, Gluck, Mozart, Mendelssohn, Franck, Iarone Chizzali y d'atri. Le Cor gnará acompagné al orghe de dlijia da Iarone Chizzali.

"Ferragosto" a La Ila
En mercui ai 15 d'agost dales 11.00 inant festa tl zënter dl paisc y dales 14.30 sarál la gran defilada dal tema "La moda tla Ladinia"
Sciöche da tradiziun, gnarál tigní ince chësc ann la festa de Santa Maria dal Ciüf tl paisc da La Ila, en mercui ai 15 de agost dales 11:00 inant. La Müjiga da La Ila deura la festa cun so conzert y dales 13:00 podarán ti ciaré al'esibiziun di platleri dla Val Badia. I Stödafüch y la Müjiga da La Ila fistidiará fora döt le de da dé fora de vigni sort de spezialités ala grilia sciöche ince tutres. Dales 14:30 podarán amiré la defilada fora por le zënter da La Ila, en chësc ann caraterisada dal tema "La moda tla Ladinia". Da odëi sarál de vigni sort de ciars y de costüms che mostra le svilup dla moda, pian ia dai guanc da zacan cina aldédaincö. Dedô jará la festa inant cun deplü sorts de jüc por pici y gragn y cun le conzert dla Musiga da La Val. Da sëra gnarále pité musiga da bal cun le grup "Vollgas".
La segra da La Ila gnará spo metüda da jí la domënia ai 26 d'agost. Dales 12:00 sonará la Müjiga da La Ila y dales 14:30 la Müjiga di Jogn Alta Badia. Dedô intratignimënt musical cun le grup "Edelblech" y da sëra i "Verspielten".

"Jöbia de Corvara" cun i artisć de strada
L'apuntamënt di 16 d'agost cun la Jöbia de Corvara ti vëgn dediché ai artisć de strada y sües esibiziuns
Fora por la zona pedonala, che vëgn stlüta al trafich dales 17:00 ales 22:30, sarál animaziun y tröp devertimënt cun artisć y animadus che fej esibiziuns spetacolares cun aní, vëtes y de vigni sort de injins da zircus, sciöche ince spodafüch. Al ne manciará sambëgn nia musiga dal ví cun le grup "Passepartout". L'animaziun fora por le zënter dl paisc da Corvara vëgn tignida dales 17:15 ales 19:15 y do cëna dales 21:00 ales 22:15. Pici y gragn é dër bel inviá da tó pert a chësta jöbia de Corvara.

"Il libro nella roccia" - libri por mituns
Les presentaziuns de libri por mituns "Il libro nella roccia" vá inant ai 14 d'agost a Badia y ai 22 d'agost tl museum ladin a San Ciascian
En mertesc ai 14 d'agost sarál Fabian Negrin che presentëia so liber "Dov'è la casa dell'aquila?" sön paiun de Badia. Do la presentaziun, che mët man dales 17:00, pó i mituns tó pert al laboratore creatif cun Roberta Segata, olache al gnará pastelné figöres che vignun pó se tó a ciasa. L'ultim apuntamënt cun l'iniziativa leterara vëgn tigní en mercui ai 22 d'agost tl Museum Ladin Ursus ladinicus a San Ciascian, en ocajiun dl "Paisc in festa". "Ander - le gigant dles Dolomites" é le titul presenté dal'auturia Giuliana Correa y dal ilustradú badiot Emil Valentini. Tl laboratore dal titul "Bun de Ander!" podarán descurí les carateristiches dl Ursus ladinicus, protagonist dl liber tla figöra dla laurs Ander. Chësta incuntada vëgn tignida dales 17:30. L'iniziativa "Il libro nella roccia", ideada da Orietta Berlanda, é metüda da jí da Alta Badia Brand adöm cun la Facolté de Sciënzes dla Formaziun dla Université de Balsan.

Destudafuech y "Vinorosso"
N merdi ai 14 y n mierculdi ai 15 de agost iel sun Plaza de Chemun te Sëlva la festa dla lies n ucajion di 125 ani di Destudafuech de Sëlva. Do la gran defileda storica iel da scuté su la grupa scialdi cunesciuda de reggae "Vinorosso", cun cianties ciantedes per dialet tudësch
Coche da tradizion d'agost iel la bela gran festa dla Cumenanza dla Lies de Sëlva che se anconta, chëst ann n ucajion di 125 ani di Destudafuech de Sëlva. L ie bele da plu ani incà tradizion de mëter a jì chësc bel evënt ntan la sajon turistica plu auta. Nscila se anconta duc y dutes ntan na manifestazion che vën piteda a patins y jënt da tlo.
N nvit ala jënt de duta Gherdëina y dla Ladinia!
Bele ti ani passei àn pudù saludé te Sëlva nce la jënt da tlo de duta la valeda; i urganisadëures rengrazia bele danora duc chiche unirà ala festa, de Sëlva, ma nce di autri luesc de Gherdëina y de duta la Ladinia.
Dolomix y spetacul d'ega di Destudafuech ai 14.08
N merdi ai 14 de agost iel dala 18.00 mujiga dal vif cun "Dolomix", dala 20.30 mujiga cun DJ Simon, dala 21.30 spetacul d'ega cun i Destudafuech de Sëlva tl Pra da Nives.
Cunzerc y gran defileda de plu grupes de Destudafuech ai 15.08
N mierculdi ai 15 de agost iel dala 10.00 l cunzert dla Mujiga de Bula; for dala 10.00 iel sun Pra da Nives da pastelné acuilons per mutons y mutans. Dala 12.00 iel l cunzert dla Mujiga de S. Piere, dala 14.00 dla Mujiga de Auer. Dala 16.00 iel la gran defileda storica de de plu grupes de Destudafuech de Tirol y Südtirol.
"Vinorosso": mujiga dal vif cun la stars dl mumënt
For ai 15 de agost iel dala 16.30 iel l cunzert dla Mujiga de Sëlva. Dala 18.30 iel na ejibizion dla doi grupes Country Girls y Country Whispers. Dala 20.30 iel mujiga dal vif cun la grupa "Vinorosso".
Sambën ie duc y dutes nviei a unì a sté n cumpania cun zeche de bon da maië y da bever.

Spetacul sun dlacia cun Carolina Kostner
N dumënia ai 12.8. dala 21.15 iel tl stadio Pranives de Sëlva l gran spetacul sun dlacia cun Carolina Kostner y trueps d'autri y d'autra jadinadëures
N dumënia ai 12.8. dala 21.15 vëniel tl stadio Pranives de Sëlva a s'l dé l spetacul urmei tradiziunel sun dlacia cun Carolina Kostner. Cun ëila nce trueps d'autri y d'autra jadinadëures, coche Matteo Rizzo, Anna Cappellini y Luca Lanotte, Nicole delle Monica y Matteo Guarise.
Na bela ucajion per udëi i biei muvimënc sun dlacia y per sté n cumpania!
Chertes danora pòssen giapé pra la Lia dl Turism de Sëlva o sun shop.valgardena.it. La ntreda ie debant per mutons y mutans nchin ai 6 ani, 18 euro per chëi y chëles danter 6 y 16 ani. 30 euro per majeri y majeres.
La Lia dl Turism de Sëlva nvieia de cuer duc y dutes a unì a cialé pro!

Festa cun olimpiades
L'Uniun Sport Amatoriala da La Val organisëia en domënia ai 12 de agost n de de sport y devertimënt por pici y gragn, sön la plaza dl sport "Plans" a La Val.
Le program mët bele man dales 12:00 cun la griliada, che jará inant por döt le domisdé. Dales 13:00 ales 15:00 él sön le program les mini olimpiades a copies, formades da n genitur y n möt o na möta. De vigni sort de competiziuns metará ala proa la conzentraziun y les abilités di atlec. Al ves aspeta de bi pesć! Atira dedô, dales 15:00, vëgnel soghé na partida particolara anter les umes y i mituns dla U8 y dedô sarál i peri che se mosöra cuntra i mituns dla U9!
Por le mangé, le bëre y la musiga vëgnel sambëgn fistidié tratan döt le de. Düc é dër bel inviá da tó pert. Le devertimënt é assiguré!

Mostra de Mussner y Rabanser
Dui artisć de Urtijëi, Carlo Mussner y Hans Rabanser, é i protagonisć dla secunda mostra da d'isté organisada dal Istitut Ladin Micurá de Rü, che gnará inaugurada en vëndres ai 17 d'agost dales 18.00 te Istitut
Carlo Mussner é nasciü dl 1938, Hans Rabanser dl 1948. Trami dui a Urtijëi. I complianns toronns di dui artisć de Gherdëna án orü festejé cun na bela mostra, che gnará inaugurada en vëndres ai 17 d'agost tl Istitut Ladin Micurá de Rü a San Martin de Tor.
Do avëi frecuenté la scora s'á Rabanser spezialisé tl'ert tradizionala de Gherdëna, la scoltöra, Mussner tla pitöra, ert che al á imparé tres i insegnamënc de Milli Schmalzl. Mussner á spo imparé da moler y da indoradú de scoltöres pro Stina Walpoth tla berstot de Lenert y spo ál fat le moler pro Gottfried Moroder. Dal 1954 fejel pert dl Circolo, de chël che al é sté presidënt dal '65 al '69. Al á rodé tröp, tla Talia y foradecá, y á vijité tröc museums, mostres y d'atri posć d'interes artistich. Sües operes é metüdes fora te deplü mostres personales y coletives te cités talianes y europeiches.
Les operes metüdes fora, é gnüdes partides sö por temesc. Te sü depënc rafigurëia Mussner sogec y temesc desvalis, realisan ince operes astrates. Danter l'ater rafigurëiel sogec fora dla Bibia, dantadöt dl Vedl Testamënt, paesaji che vëgn cun le tëmp tres plü astrac y figöres umanes fora dla vita de paisc, sciöche p.ej. döes ëres che ciacolëia y iudichëia sön porta de dlijia, o socodiëntes che ciara do porsones vedles y sores. I chedri de Mussner é realisá scialdi cun corusc a öre. Al é operes ponsades che respidlëia le stil personal y la vijiun dl artist, che ne vëgn nia influenzé da modes che passa o da gusć che müda.
Hans Rabanser é n scoltur. Sües scoltöres nasc - sciöche al dij instës - "spontaneamënter, sciöche n lëgn che crësc y che se fej tres le tëmp." Al ti é jü do ai insegnamënc di plü gragn maestri, sciöche Adolf Vallazza, y do avëi dé sö l'ativité artistica por tröc agn, ál indô metü man di agn Setanta, tolon pert a mostres personales y coletives tla Talia, tl'Europa y tl'Africa. Tla mostra sarál da odëi set de sües scoltöres che rapresentëia n soget su: le corp bluder, de ëi y dantadöt de ëres. I corps che Rabanser ziplëia ti vá do ales formes naturales dl lignan, dles taies che l'artist chir fora personalmënter. Ara se trata de operes sensuales, erotiches y datrai ince provocantes che ne vëgn nia depëntes, mo che se mostra cun i corusc y les sfomadöres naturales dl lëgn.
La mostra sará da odëi tl salf bas ite dl Istitut Ladin Micurá de Rü cina ai 2 de setëmber, dales 10:00 ales 12:00 y dales 15:00 ales 19:00. Por deplü informaziuns: 0474 - 523110 o info@micura.it

Le gran hockey a Corvara
Ai 12 d'agost sarál na partida de hockey danter le HC Balsan cuntra la scuadra ruscia Vityaz Podolsk
Tl stade dala dlacia Albert Pezzei a Corvara vëgnel metü da jí en domënia ai 12 d'agost na partida de hockey cun sogadus profescionisć. Sön la dlacia podarán odëi i "foxes" - sogadus dl HC Balsan - cuntra la scuadra ruscia dl Vityaz Podolsk, formaziun che soga tl campionat rus KHL. La scuadra da Balsan á davagné tl'ultima sajun da d'invern por le secundo iade le campionat de hockey dl'Austria EBEL, baton le Red Bull Salzburg. Le capitan nü Anton Bernard y sü compagns porvará da bate chësta sëra i sogadus rusc. La partida mët man dales 21:00; les chertes pón cumpré online, tl ofize turistich da Corvara y en chë sëra diretamënter pro le stade dala dlacia al prisc de 20,00€ por i adulc, de 10,00€ por i mituns dai 6 ai 16 agn y 1,00 € por mituns cina 6 agn y porsones cun invalidité.

Summer Ski Show a La Ila
En vëndres ai 17 d'agost sarál i maestri dla scora de schi y snowboard da La Ila che tëgn por le terzo iade na desmostraziun tl parch dlungia la scora dai schi tl zënter dl paisc. Söla nëi amez isté
La manifestaziun mët man dales 21:15 y vëgn tignida söla nëi dl'ultima sajun da d'invern, conservada te n post frësch sot a n linzó spezial. Tratan l'esibiziun mostrará i maestri de schi la storia y l'evoluziun dl jí cui schi, sciöche ince dles ativités metüdes da jí dala scora de schi ti ultims agn. Ghesć d'onur é en chësc ann i campiuns de schi Manuela Mölgg, Chiara Costazza y Cristian Deville. En chësta sëra fajará i trëi profescionisć dai schi da juria por la competiziun anter veicui y schiadus, che se mosorará jö por pista y sura la nodadoia, che messará gní despassada cun i schi ti pîsc jödapé dla pista. L'esibiziun vëgn arichida dai salc y dales acrobazies dl grup freestyle "The Pirates", sciöche ince da intratignimënt musical dl DJ y tröpes löms. Mancé ne pó sambëgn nia te na te' ocajiun n aprés-ski, olache la festa jará inant do la show. La manifestaziun vëgn metüda da jí dala scora dai schi da La Ila y dal'Assoziaziun Turistica da Badia, en colaboraziun cun la sozieté di implanc Skicarosello.

Musical "Cater da coraje"
Le Sorvisc ai Jogn Val Badia inviëia indô a n musical cun mituns, cun n musical scrit do na storia conesciüda di fredesc Grimm
"Cater da coraje" é le musical te cater lingac cun mituns dla Val Badia, che gnará presenté iniann tres le Sorvisc ai Jogn. Le musical é gnü scrit da Barbara R. Comploi, do la storia di fredesc Grimm, cun musiga di Beatles cun tesć de André Comploi. La direziun musicala é de Sofia Pisching, la rejia y coreografia de Barbara R. Comploi, i costüms y la grafica de Maria Frenner, l'assistënza é de Nadia Gerstl y la coordinaziun dl proiet é de Stefanie Kaneider. Le musical gnará presenté en vëndres ai 17 d'agost dales 20:00, la sabeda ai 18 dales 15:00 y dales 20:00, la domënia ai 19 d'agost dales 18:00, dagnora te salf dles manifestaziuns d'Al Plan. Les prenotaziuns vëgn tutes sö dai 13 d'agost inant, dales 9:00 ales 13:00 al numer 328/5759851. La cherta por adulc costa 12,00€, mituns cina 12 agn paia 7,00€, chi cina 2 agn pó ite debann.

Notes de San Laurënz
Ai 11 d'agost é düc inviá da gní a ti ciaré ales stëres tomëntes ti pra dlungia la Capanna Alpina, cun l'acompagnamënt musical de Alessandro Trebo
La nöt de San Laurënz che vëgn festejada ai 10 d'agost é conesciüda sura düt le monn por la sëra dles stëres tomëntes. La jënt se incunta te plazes, pra o sön val' col por amiré les stëres che toma y podëi pronunzié n dejider. Tl'Alta Badia podarán amiré le cil plëgn de stëres y cun n pü' de fortüna ince val'stëra tomënta en sabeda ai 11 d'agost ti pra dlungia la Capanna Alpina a San Ciascian, sön porta dl parch natural Fanes-Senes-Braies. La serada "Notes de San Laurënz" gnará animada dales 21:15 inant dal sonn fin y lisier dl clavier, soné dal musizist Alessandro Trebo da San Martin. Düc é dër bel inviá da tó pert a chësta sëra alaleria y amiré le spetacul che la natöra amesa les Dolomites se scinca.