Manifestazions atuales speziales

Data

17 de agost 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 17 de agost
”Standards” cun la Lautten Compagney Berlin 
Le coliamënt danter musiga baroca y sonns moderns, en jöbia ai 23 d’agost dales 21:15, tla Ciasa J. B. Runcher a San Linert
La Lautten Compagney é n sinonim de programs inovatifs, aranjamënc nia convenzionai y humor: ai liëia adöm la musica antica cun composiziuns d’aldedaincö. Christina Scheicher (clavier), Birgit Schnurpfeil (vidora) y Mathias Kiesling (fabló traversal) é trëi musizisć dla Lautten Compagney Berlin. Cun n’impulsivité interpretativa y conzec inovatifs vá l’ensemble sura i confins fora y chir l’indunada cun sonns nüs. Danter l’ater por chëstes cualités él dl 2010 gnü premié cun l’ECHO Klassik. Al porta dant composiziuns de de gran maestri de epoches desvalies: Johann Sebastian Bach, Johann Heinrich Schmelzer, Astor Piazzolla, Georg Friedrich Händel, Katia Tschemberdji, Georg Philipp Telemann, Philipp Glass.

“summit Bach 3” 
Festival Badiamusica: en lönesc ai 27 d’agost dales 21:15 él te dlijia da San Linert n conzert de orghe de dlijia cun Jürg Brunner
Jürg Brunner vir a Bern, olach’al é dal 2003 al 2012 sté orghelist dla Heiliggeistkirche y á metü en pé na vita musicala dër via. Bele tratan sü agn de scora a St. Gallen êl sté orghelist y pianist. Do i diploms d’insegnamënt por clavier y orghe al conservatore de Winterthur, ál studié orghe da conzert pro Eduard Müller a Basel. Por bun 20 agn ál fistidié dla musiga de dlijia dla cité de St. Gallen. Implü él sté dozënt por improvisaziun ala Musikhochschule Luzern. Aldedaincö él musizist free lance, consulënt por orghi, acompagnadú por iadi d‘orghe y d‘ater. 
Tl conzert “summit Bach 3”, che al tëgn ai 27 d’agost dales 21:15 tla dlijia de Badia, sona Brunner composiziuns de Johann Sebastian Bach, Willy Burkhard, Conrad Beck, Paul Müller y Louis Vierne.

”Gusto italiano 1716 - 2007”
Festival Badiamusica: en mertesc ai 28 d’agost dales 21:15 él da aldí tl salf dles manifestaziuns da Corvara le ”Ludus Quartett”
Le cuartet é metü adöm da Ivo Crepaldi y Andrea Ferroni ala vidora, Alexander Monteverde ala viola y Ivo Brigadoi al cello. L’ensemble é nasciü dl 2001 y l’ann do ál tut pert al’Academia Europeica por archëc a Fiesole. Le repertore tol ite composiziuns classiches, romantiches y contemporanes. Dër a cör ti stá al "Ludus Quartett" l’esecuziun de composiziuns de epoches stilistiches desvalies che vëgn portades dant püch (y a tort) ti salfs da conzert. L’apuntamënt é por en mertesc ai 28 d’agost dales 21:15, tl salf dles manifestaziuns da Corvara.

”Schubert’s winter journey”
Le Festival Badiamusica vá a piz la jöbia ai 30 d’agost dales 21.15 tla ciasa Runcher a San Linert, cun n conzert dl duo Sabina Willeit - sopran y Giorgio Fasciolo al clavier
Sabina Willeit é nasciüda a Balsan da na familia ladina y s’á diplomé te cianté cun la nota plü alta. Tl 2001 ára davagné le concurs As.Li.Co. a Milan. Ara á interpreté plü de 25 perts da protagonista te operes liriches che vá dal classizism ala musiga moderna te festivai talians y europeics y te teatri de prestisc, adöm cun direturs conesciüs a livel internazional. Sabina Willeit tëgn ince tröc conzerc sciöche liederista y cianta regolarmënter sciöche solista cun l’orchestra. 
Giorgio Fasciolo s’á cherié ti agn n repertore personal de inrescida, ponsan fora programs da conzert che liëia la musiga cun le test. Al á interpreté cun l’orghe l’opera omnia de J. S. Bach. Cun le clavier ál soné i maius ziclus di lieder. Al müda jö l’ativité sciöche solista cun chëra da componist y diretur d’orchestra.

A cëna cun la laurs
Le Museum Ladin Ursus ladinicus a San Ciascian i fej da cornisc ala manifestaziun “A cëna cun la laurs”, en vëndres ai 24 d’agost
Dales 19:00 inant podarán tó pert a na cëna gourmet, arjignada ca da sis coghi de restoranc, hotí y üties dl’Alta Badia, deperpo che an pó amiré i reperc dla laurs metüs fora tl museum. La cëna mët man cun i antipasć dl restorant St. Hubertus dl hotel Rosa Alpina y dl restorant La Gana dl hotel Cristallo, por passé ala pröma derzada, che gnará cujinada dal restorant La Stüa de Michil dl hotel La Perla. Le hotel Gran Ander y le hotel Diana se cruziará da cujiné les secundes derzades y ala fin podará i plü golusc se gode la spezialité ducia dla ütia Edelweiss. Tratan cëna á i partezipanc la poscibilité da vijité le museum adöm cun geologs y storics, che spliga les carateristiches dles Dolomites y dl Ursus ladinicus. Le cost dla cëna gourmet é de 75,00€ a porsona, boandes lapró. Les iscriziuns pón fá pro l’Assoziaziun Turistica da La Ila y San Ciascian.

”Emoziuns sö alalt”
Alpinisć conesciüs a livel internazional cunta de sües esperiënzes tles munts. Ai 21 d’agost baia Paolo Franceschini, ai 28 d’agost Hervé Barmasse y ai 10 de setëmber Ines Papert
I referac dla linia “Emoziuns sö alalt” vá inant ince d’agost y setëmber. Ai 21 d’agost a La Ila sarál Paolo Franceschini che cunta te na manira comica süa pröma esperiënza pro na gara dla roda. Al á tut pert ala “Himalayan Highest MTB Race”, che é la gara a tapes plü alalt dl monn y vëgn metüda da jí tl Tibet. Ai 28 d’agost podarán incunté l’alpinist talian dër conesciü Hervé Barmasse, tres a La Ila. Barmasse á arpé da so pere la pasciun dl jí a crëp y en chësta sëra cuntarál dl raport cun la munt, che mëss gní respetada y capida, a na moda che vignun pois la anuzé. L’ultim apuntamënt é preodü ai 10 de setëmber a Corvara cun l’alpinista Ines Papert. Tratan la serada ”Riders on the storm” presentarára de sües aventöres fora por les munts y sön i parëis plü ërc dl monn. Les prömes döes incuntades (por talian) mët man dales 21:15 y vëgn tignides tl salf dles manifestaziuns da La Ila. Le referat cun l’alpinista Papert (por todësch) gnará tigní dales 21:00 a Corvara.

Musical ”Cater da coraje”
Le Sorvisc ai Jogn Val Badia inviëia indô a n musical cun mituns, cun n musical scrit do na storia conesciüda di fredesc Grimm. Incö ai 17 la premiera
”Cater da coraje” é le musical te cater lingac cun mituns dla Val Badia, che gnará presenté iniann tres le Sorvisc ai Jogn. Le musical é gnü scrit da Barbara R. Comploi, do la storia di fredesc Grimm, cun musiga di Beatles cun tesć de André Comploi. La direziun musicala é de Sofia Pisching, la rejia y coreografia de Barbara R. Comploi, i costüms y la grafica de Maria Frenner, l’assistënza é de Nadia Gerstl y la coordinaziun dl proiet é de Stefanie Kaneider. Le musical gnará presenté incö vëndres ai 17 d’agost dales 20:00, la sabeda ai 18 dales 15:00 y dales 20:00, la domënia ai 19 d’agost dales 18:00, dagnora te salf dles manifestaziuns d’Al Plan. Les prenotaziuns vëgn tutes sö dai 13 d’agost inant, dales 9:00 ales 13:00 al numer 328/5759851. La cherta por adulc costa 12,00€, mituns cina 12 agn paia 7,00€, chi cina 2 agn pó ite debann.

Animaziun por mituns pro la “Jöbia de Corvara”
La Jöbia de Corvara en program ai 23 d’agost ti vëgn dedicada deplëgn ai mituns, cun de vigni sort de intratignimënt
Dales 17:15 ales 19:15 y dales 21:00 ales 22:15 podará i mituns tó pert a deplü jüc y se devertí. Animadus y clowns fajará de vigni sort de spetacui y portará tröp devertimënt y bona lüna fora por la zona pedonala dl paisc, che gnará abelida dala musiga dl Sextet Quartet y cater mituns cun i orghi da man. Implü á i mituns ince la poscibilité da se lascé depënje sö le müs. 
En ocajiun de vigni Jöbia de Corvara vëgn la strada prinzipala da Corvara stlüta al trafich dales 17:00 ales 22:30. Ar se trata de na bona ocajiun por mituns y families da sté adöm y passé n domisdé cun tröp devertimënt.

Saûs dl bosch
En mertesc ai 21 d’agost vëgnel metü da jí la manifestaziun gastronomica ”Saûs dl bosch”, tla cornisc particolara tl parch dai tiers a Calfosch
Ot strotöres dl post - le Berghotel Ladinia, le bar Altrove, le Sporthotel Panorama, la pension Garden, i restoranc Stria, Salvan, Mesoles y Matthiaskeller - arjigna ca de vigni sort de spezialités gastronomiches locales dales 11:30 ales 17:00. Le duo Lois & Bruno y le "Fingerhuat Duo" se cruziará dl intratignimënt musical dales 12:00 ales 14:00 y dedô sonará le duo "Vic & Daniel" y le grup "Louis & the space travellers". I amanc dla munt y dla gastronomia á la poscibilité da passé n domisdé n pü’ atramënter, fajon na roda fora por le parch dai tiers y ciarcian les spezialités gastronomiches pro les pices üties. I plü pici podará se devertí tla ciasa di mituns cun deplü jüc, sön les tors de lëgn y ince da ti fá aicia ai tiers tl parch.

Mostra de Mussner y Rabanser
Dui artisć de Urtijëi, Carlo Mussner y Hans Rabanser, é i protagonisć dla secunda mostra da d‘isté organisada dal Istitut Ladin Micurá de Rü, che gnará inaugurada incö vëndres ai 17 d‘agost dales 18.00 te Istitut
Carlo Mussner é nasciü dl 1938, Hans Rabanser dl 1948. Trami dui a Urtijëi. I complianns toronns di dui artisć de Gherdëna án orü festejé cun na bela mostra, che gnará inaugurada incö vëndres ai 17 d’agost tl Istitut Ladin Micurá de Rü a San Martin de Tor.

Do avëi frecuenté la scora s’á Rabanser spezialisé tl’ert tradizionala de Gherdëna, la scoltöra, Mussner tla pitöra, ert che al á imparé tres i insegnamënc de Milli Schmalzl. Mussner á spo imparé da moler y da indoradú de scoltöres pro Stina Walpoth tla berstot de Lenert y spo ál fat le moler pro Gottfried Moroder. Dal 1954 fejel pert dl Circolo, de chël che al é sté presidënt dal ’65 al ’69. Al á rodé tröp, tla Talia y foradecá, y á vijité tröc museums, mostres y d’atri posć d’interes artistich. Sües operes é metüdes fora te deplü mostres personales y coletives te cités talianes y europeiches. 

Les operes metüdes fora, é gnüdes partides sö por temesc. Te sü depënc rafigurëia Mussner sogec y temesc desvalis, realisan ince operes astrates. Danter l’ater rafigurëiel sogec fora dla Bibia, dantadöt dl Vedl Testamënt, paesaji che vëgn cun le tëmp tres plü astrac y figöres umanes fora dla vita de paisc, sciöche p.ej. döes ëres che ciacolëia y iudichëia sön porta de dlijia, o socodiëntes che ciara do porsones vedles y sores. I chedri de Mussner é realisá scialdi cun corusc a öre. Al é operes ponsades che respidlëia le stil personal y la vijiun dl artist, che ne vëgn nia influenzé da modes che passa o da gusć che müda.

Hans Rabanser é n scoltur. Sües scoltöres nasc - sciöche al dij instës - ”spontaneamënter, sciöche n lëgn che crësc y che se fej tres le tëmp.” Al ti é jü do ai insegnamënc di plü gragn maestri, sciöche Adolf Vallazza, y do avëi dé sö l’ativité artistica por tröc agn, ál indô metü man di agn Setanta, tolon pert a mostres personales y coletives tla Talia, tl’Europa y tl’Africa. Tla mostra sarál da odëi set de sües scoltöres che rapresentëia n soget su: le corp bluder, de ëi y dantadöt de ëres. I corps che Rabanser ziplëia ti vá do ales formes naturales dl lignan, dles taies che l’artist chir fora personalmënter. Ara se trata de operes sensuales, erotiches y datrai ince provocantes che ne vëgn nia depëntes, mo che se mostra cun i corusc y les sfomadöres naturales dl lëgn. 

La mostra sará da odëi tl salf bas ite dl Istitut Ladin Micurá de Rü cina ai 2 de setëmber, dales 10:00 ales 12:00 y dales 15:00 ales 19:00. Por deplü informaziuns: 0474 - 523110 o info@micura.it

Festa dla Musiga
A La Pli de Mareo ai 18 y 19 d’agost 2018
La Festa dla Musiga d’La Pli de Mareo mët man la sabeda sëra dales 19:00 cun musiga d’aorela cörta y da bal sonada dal grup “Die Kufsteiner” y jará inant le de do, domënia ai 19 d’agost, do mëssa cun na matiné pitada dai “Hartl 2” y domisdé dales 16:00 inant cun le conzert dla Musiga Catarina Lanz d’Al Plan. Dales 18:00 inant inviará i Verspielten a bal.

I fonguns - n monn da descurí
La ciasa dl Parch natural de Fanes-Senes-Braies inviëia a na escurjiun y a n referat sön i fonguns te nüsc bosc
I fonguns n’é nia ma bogn te taí, mo na pert essenziala y integranta de tröc ecosistems. Ai pormët na simbiosa danter plantes y tiers che ne podess nia mancé. Insciö unse ponsé da se fá conësce damí chisc organisms cun l’aiüt de esperc: l’espert micologh Claudio Rossi se acompagnará tl’escurjiun y tignará ince n referat.
Escurjiun: en mertesc ai 21 d’agost dales 14:00 als 17:30 sön Jú (San Martin). An mëss se prenoté anter les 18:00 dl de denant, tla ciasa dl parch natural Fanes-Senes-Braies (al 0474/506120), la partezipaziun é debann. Tratan l’escurjiun gnarál ciaré plü da daimpró y splighé i fonguns che an ciafa te nüsc bosc.

Referat: en vëndres ai 24 d’agost dales 21:00, tla ciasa dl parch natural Fanes-Senes-Braies, en colaboraziun cun l’assoziaziun micologica ”Bresadola”. Tl referat por talian gnarál baié dantadöt de fonguns che an pó mangé y di fonguns da tosser, mo ince de co che i fonguns vëgn adorá tla medejina.

Cunzert Sonoton: n viac tla Boemia
N merdi ai 28.8. y n mierculdi ai 29.8. iel tla palestra dla scola elementera de Urtijëi l cunzert de mujiga tlassica dl’Orchestra Sonoton
L’Orchestra Sonoton prejënta n cunzert de mujiga tlassica, un di truep ponc de forza, do che la à sunà truepa mujiga da film, musicals, mujiga de videogames y monce rock. 
Chëst ann nes fajerà l’Orchestra Sonoton fé n viac tla Boemia, cun doi opres de cumpusidëures dl raion storich dla Republica Ceca: “Dal mond nuef”, na sinfonia de Antonin Dvorak suneda per l prim iede tl 1893, y “La Moldau”, opra dl 1874 de Bedřich Smetana dedicheda al ruf cunescù y che passa nce tres Praga.
I cunzerc, sot ala bachëta de Matthäus Crepaz, ie da udëi y scuté su n merdi ai 28.8. y n mierculdi ai 29.8. tla palestra dla scola elementera de Urtijëi.
La sëires unirà prejentedes da Martina Rier.
Chertes danora giàpen da cumpré ti ufizies dla Lies dl Turism de Gherdëina.
Sambën ie duc y dutes nviei a unì a scuté su!

Ert, leteratöra y musiga
En vëndres ai 24 d’agost dales 19:00 a Longega te Mareo
Tl atelier dl artist Fabian Feichter a Longega gnaral splighé le “Longega Project” (ciasa por y cun artisć),y metü da jí la presentaziun dl liber nü de Paul Zardini “Ti dé stöp”, la presentaziun dl liber digital "Gedichte an Daniela" de Simon Rubatscher, l’escriziun dl Pest de poesies Angelo Trebo y musiga cun “Martina Iori Blues - Origami” y la “kunststoffwerkstatt” da Minca/München.
L’EPL-Ert por i Ladins inviëia a chësta serada particolara te n post particolar, a Longega.
L’entrada ala manifestaziun é debann y daverta a düc!

Gran cunzert te dlieja de Urtijëi
L Cor di Jëuni dl Nordrhein-Wesfalen ie da audì te n bel cunzert tla dlieja de Urtijëi n juebia ai 23 d’agost dala 21.00
L Cor de Dlieja y l Cor di Jëuni de Urtijëi nvieia de cuer duc y dutes a n bel cunzert dl Cor di Jëuni dl Nordrhein-Wesfalen n juebia ai 23.8. dala 21.00 te dlieja de Urtijëi. 
L se trata de n cor de bën setanta jëuni y jëunes danter i chindesc y i vintot ani. L vën purtà dant pec de Schütz, Bach y Mendelsohn. Sëuraprò iel nce da audì de bela cianties y meludies dla Ruscia, dla Scandinavia y dl’America. 
La ntreda ie debant. Duc y dutes ie nviei de cuer.

San Berto sö La Crusc a Badia
Por le pröm iade rovará ince le Vësco Ivo Muser sö La Crusc en ocajiun dla Festa de San Berto
En vëndres ai 24 de agost vëgnel tigní sö La Crusc a Badia, sciöche vigni ann, la festa en onur de San Berto. La prozesciun pëia demez dala dlijia da San Linert dales 7:30 tl vers dl santuar de La Crusc. La Santa Mëssa tla dlijia da La Crusc vëgn zelebrada dales 9:30, cun la partezipaziun dl Vësco. Dedô saral la prozesciun eucaristica incër dlijia, sot al Sas dla Crusc, cun dui vangei.