Manifestazions atuales speziales

Data

07 de setember 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 7 de setember
Fotografies de Janpaul Irsara
Proieziun de fotos de Janpaul Irsara: en jöbia ai 13 de setëmber dales 20.30, tl Istitut Ladin "Micurá de Rü" a San Martin de Tor
Le Fotoclub Val Badia á le plajёi da invié a na proieziun de fotografies dl fotograf Janpaul Irsara. La proieziun sará partida sö te döes perts. Tla pröma sarál al zënter le monn dles Dolomites, tla secunda pert gnarál mostré fotografies de n iade ti Paisc Basc y tl Belgio.
La tematica sará dër interessanta, deache an pëia ia cun les munts chiló da nos y an rovará tl Paisc Basc che é ince sot le livel dl mer; insciö podarán odëi n gran contrast de corusc y de sciöche la contrada pó cambié.
Janpaul Irsara é n jonn de 21 agn che se dá jö cun la fotografia cun gran pasciun y creativité, y á bele mostré sües fotografies tla Val Badia.

Rock tl Saj.un
1.st.friday.live.session@SaJ.un - Incö vëndres ai 7 de setëmberdales 21:00 éra indô tan inant. Tl Saj.un a La Ila n conzert rock de livel alt cun i Velvet Radio da Cortina y le grup conesciü de Südtirol LOUD! tibute ai AC/DC
Velvet Radio: Le grup da Cortina é nasciü dl 2015 y sona toc de grups conesciüs dai agn 50 cina aldedaincö, passan por Stevie Wonder, Sting, Phil Collins, Jeff Beck, Rush y Queen, Alan Parsons Project, Robben Ford, Kansas - zënza desmentié inoms contemporans sciöche Bruno Mars, Gnarls Barkley, Adele y Spice Girls.
Loud!: Tl ann 2004 é la formaziun gnüda fondada da 5 sostegnidus di AC/DC. Le grup é gnü conesciü por süa pasciun y sü spetacui sön palch y á tigní conzerc tla Talia y foradecá, dantadöt tl'Austria, Germania. Lapró él Raini (usc), Toen (percusciuns, chitarra y usc), Uli (bateria), Rolli (bass y usc), Max (chitarra elettrica y usc)
Düc, de vigni generaziun, é bel inviá da gní tl Zënter Cultural SaJ.un a La Ila a s'ascuté de bela musiga.

Conzert dla Orchestra Val Badia
Endoman sabeda, ai 8 de setëmber, se lascia aldí l'Orchestra Val Badia deboriada cun n grup de stromënc a fle te n conzert cun musiga de stil pop y rock. Le tema é "Take Five"
"Take Five" ó dí por i musizisć dl'Orchestra Val Badia s'incunté, sté deboriada y fá musiga te bela compagnia. Le program porté dant tol ite musiga strumentala por orchestra de archëc y percusciuns: p. ej. „Forever Joyful" de B. Balmages o „Legionary" de C. Thomas.
Pro valgügn toc, sciöche „My Shot" de Lin-Manuel Miranda o „Rolling in the Deep" de Adele, pón ince aldí les beles usc de ciantarines dla valada.
Le conzert é söl program endoman sabeda, ai 8 de setëmber dales 20:00, tl salf dl Istitut Micurá de Rü a San Martin de Tor.
L'Orchestra sará sot la direziun de Bruno Rives y le conzert vëgn organisé en colaboraziun cun BadiaMusica. Düc i apascioná de musiga é bel inviá da gní a d'ascuté sö.

Segra d'Al Plan
Ai 8 y ai 9 de setëmber 2018 sot le tendun tl zënter de paisc
La festa mët man endoman sabeda cun l'intratenimënt musi-cal da pert dl comples Dreirad.
En domënia él spo do mëssa dales 11:00 la mantiné cun la Musiga d'La Val, dales 14:00 inant conzert cun la Musiga da San Scimun, dales 16:00 inant conzert cun la Musiga d'La Pli y dales 18:30 inant musiga da bal y aurela cörta cun i Klausberga. Organisaziun: Musiga Catarina Lanz.

Segra de Badia
Les uniuns de Badia inviëia ai 15 y 16 de setëmber düc canc ales manifestaziuns („Green event") organisades en ocajiun dla segra de Badia
Le program mondann dla Segra vëgn organisé tl tendun dlungia la Ciasa dles Uniuns J.B. Runcher de Badia. La festa vëgn daurida la sabeda dales 15:00, olache al vëgn alzé le lëgn dla segra por gragn y pici. Dales 16:30 scomëncel le conzert dla Müjiga di Jogn dl Alta Badia. Dales 18:00 mëtel man la festa cun musiga y plö tert dales 21:00 vál inant la party cun DJ Saimon b2b y DJ ELF; tratan él ince la poscibilité da ciafé val' de bun da mangé y da bëre.
Importanza ón ince ti dé ala pert sacrala dla festa, porchël vëgnel zelebré la domënia dales 9:00 la gran mëssa te dlijia cun la partezipaziun dl Cor de Dlijia y dla Müjiga de Badia. Dedô é düc dër bel inviá ala matiné cun la „Böhmische de Badia" y a na bona marëna. Ince dl divertimënt di mituns vëgnel fistidié.
Dales 13:00 vëgnel incoroné la „Regina dl Fëgn", tratan che la musiga da Vahrn tin so conzert. Incër les 15:00 aspeton i paurs che vëgn de munt cun so bestiam. La festa jará inant cun le grup „Die Volkspartie".

Nodé y atletica por mituns
Badiasport organisëia indô n curs da nodé por prinzipianc, por i mituns dala 1a ala 4a classa elementara y alenamënc da nodé y atletica por mituns dala 3a tlassa elementara cina ala 3a mesana.
Curs da nodé por prinzipianc: dala 1a ala 4a classa elementara
Le curs vëgn tigní vigni jöbia domisdé (grup gragn 16:00-17:00, grup pici 17:00-18:00) tla nodadoia da La Ila por la spana otober cina ma. Al é dé la poscibilité por i plö bogn da passé tl grup de alenamënt do n pü' de tëmp. Iscriziuns online pro www.badiasport.org
Alenamënć da nodé y de atletica lesiera: dala 3a classa elementara ala 3a mesana
Al vëgn insigné i stii lëde y spiné, sciöche ince la basa di stii arosch y delfin. Le training de altetica lisiera alza fora les capazités de coordinaziun y de condiziun, al vëgn ince insigné les formes de basa dles singoles disciplines de atletica lisiera. Nodé vëgn tigní vigni lönesc tla nodadoia da La Ila, l'atletica lisiera vigni jöbia tla palestra dla scora mesana da La Ila por la spana otober cina ma. Iscriziuns online pro www.badiasport.org
Nodé por adulc
Cun otober mët indô man "Nodé deboriada - nodé por adulc". Al vëgn insigné i 4 stii lëde, spiné, arosch y delfin, y mioré la coordinaziun y la condiziun. Le curs vëgn tigní tla nodadoia da La Ila vigni mertesc por la spana de tëmp otober cina ma: dales 19:30 ales 20:30 pröm grup, dales 20:30 ales 21:30 secundo grup.
Al ne se trata nia de n curs por prinzipianc, porchël vëgnel damané les capazités de basa dl nodé. Iscriziuns online pro www.badiasport.org

Pest de poejies ladines "Angelo Trebo": escrizion dla otava edizion
Termen per mané ite les poejies: 30 de november 2018
Al é n concurs de poejies davert a duc chi che scriv per ladin, metú su dl 1997 a San Martin de Tor. Con l'edizion dl 2012 é l pest trienal vegnú daurí a dutes les variantes ladines y i idioms ladins dl raion dles Dolomites, cie che á porté spo tles ultimes does edizions a na maioura partezipazion da pert de autores y autors. L'edizion nueva, segn daverta, é chela dl 2018. La premiazion é preveduda per d'aisciuda 2019.
Criters y condizions
Da prejenté él - ence en chest iade - anter trei y cinch poejies. I prums trei posć é ciariés con pesć monetars de 500,00, 300,00 respetivamenter 200,00 euro. Per tó pert él da paié ite sun l cont bancar IBAN IT41H 08010 58830 000 304000455 intesté a l'EPL-Ert por i Ladins la comiscion de partezipazion de 20,00 euro.
Vigni autor/a prejenteia les poejies te cater copies, les contrassegneia con n pseudonim y ajonta lapró te na mendra cuverta scluta si dac anagrafics y l'atestazion dl versament dla comiscion de partezipazion. Sun la mendra cuverta scrivel/ela su si pseudonim.
La miscion per mané ite o dé ju a man l material per tó pert al concurs - anter l 30 de november 2018 - é: EPL-Ert por i Ladins, Pest "Angelo Trebo", str. Stufles 20, 39030 San Martin de Tor/San Martino in Badia, BZ.

Schiclub y FC Gherdëina se anconta
Ancunteda de devertimënt y sport y sambën cun zeche de bon da maië dal grill. Unide dutes y duc, l sarà dessegur na gran hez! Y oradechël de beliscimi pesć da vëncer!
N dumënia ai 9 de setëmber mët l Schiclub Gherdëina deberieda cun l FC Gherdëina a jì na gran festa dal sport sun Ciandevaves/Pana. Ancunteda dala 10 daduman tl zënter da pudejé. Duc dëssa - o miec muessa! - fé pea! L sarà de blòtiscimi juesc de scuadres da 6 mescededes adum danter chëi dal schi y dala codla, y n puderà vëncer propi de beliscimi pesć, nce sce tl zënter dëssel resté la cumpania y l devertimënt! Da bever y da maië iel assé, oradechël a bon priesc, de gra ai sponsores che juda pea. Da paië ite iel 5 euro per uniun y uniuna che fej pea.

Biz: Duman saràl bel tëmp
N juebia ai 13 de setëmber dala 20.00 tla sala Luis Trenker dla Cësa di Cungresc a Urtijëi iel la giaurida dla mostra de Fabrizio "Biz" Senoner da Rijeda. Performances, depënc y obiec. Y dantaldut iraziunalità
Da udëi tla mostra iel na lingia de chedri d'uni grandëza fac ti mënsc passei da Biz.
Per la gran pert ie i chedri a uele, pona nce n valguni cun spray.
Oradechël iel da udëi obiec depënc, na codla depënta o n tòch dl cubo che ie stat da udëi l ann passa pra l'Unika tl zënter de Urtijëi. Na particularità ie che l sarà nce na rampa da skate depënta tematicamënter, de bën cin' metri longia.
Biz n con dl spirt o dl cuntenut dla mostra: "L se trata de obiec zënza fundamënt, che ne uel dì nët nia. Almanco te na prima udleda. Mi pensier ie che te n mond super-raziunel uei mëter ora lëures che sibe finalmënter iraziunei."
La mostra ie davierta nchin a n mierculdi ai 26 de setëmber, da lunesc nchin de sada dala 10 nchin la 12 y dala 15 nchin la 19.
De dumënia iel l orar dala 10 ala 12.

Viktor Senoner da Luca - "capriz"
Giaurida dla mostra ncuei ai 7 de setëmber te Tublà da Nives te Sëlva
Viktor Senoner vën ora da na familia de scultëures. Ël ie ruvà a fé l mestier da moler de figures tres stredes ncrujedes. De capriz (ora de ëura) se àl for plu y pl dat ju cun l dessëni y la pitura do la natura y alalergia. I motifs abinòvel nia dalonc da si cësa. De gran mpurtanza fova per ël daniëura n bon raport „de amezizia" cun l motif che l depenjova. Perchël ne n'àl nce deguna prëscia a finé n cheder. Jan for inò tla medema luegia ti cialan, dessenian y depenjan l medemo motif se àl suvënz rendù cont dla nfinità de belëzes che la natura pieta. L ie sciche na esplujion de vitalità, de formes, dla gran varietà y vibrazion de culëures, de tofs, sonns y nce dl chiet. Chisc chedri uel purvé a repurté la belëzes che l à pudù udëi, sentì y viver sciche na ciantia de lauda.
La giaurida dla mostra "capriz" ie ncuei vënderdi ai 7 de setëmber dala 20.30 cun la ntroduzion artistica de Vinzenz Senoner. La mostra ie davierta nchin ai 30.9 uni di dala 16 nchin la 19; de vënderdi, sada y dumënia, sëuraprò nce danmesdì dala 10.00 nchin la 12.00. Nfurmazions nce tla plata internet www.tubladanives.it.

Segra y iubileum te Sëlva
N dumënia ai 23 de setëmber iel Segra te Sëlva. Festa nce per Sn. Pire Clara, Sn. Heinrich Perathoner y per l mëune Othmar Perathoner. N vënderdi ai 21.09 iel na defileda cun i chentli
N dumënia de Segra de Sëlva ai 23 de setëmber vëniel chëst ann nce festejà doi iubilares prevesc, Sn. Pluan de Sëlva Pire Clara per i 60 ani da preve y Sn. Heinrich Perathoner per si 50 ani da preve, ma nce Othmar Perathoner che ie stat truep ani alalongia mëune de Sëlva.
La festa scumëncia cun la defileda ite te dlieja dala 9.30. Do mëssa iel na pitla festa sun plaza de dlieja, cun la Mujiga de Sëlva che sona y ulache n possa sté deberieda pra n bon got. N vënderdi ai 21 de setëmber iel dala 20.00 na pruzescion cun i chentli, pian via dai ridli per jì de viers dla dlieja de Sëlva, ulache l sarà na funzion per rengrazië y per se perië ca la grazies. L Cunsëi de Pluania nvieia de cuer la jënt de Sëlva y de duta Gherdëina, ma nce dla Val Badia y de duta la valedes ladines, a festejé pea!

L film dl'Opera Dolomieu
N lunesc ai 10 de setëmber dala 20.30 vëniel tla gran sala dla Cësa di Cungresc mustrà l video dl'Opera mujighela "Dolomieu" de Sissa Micheli. Prejentazion dl Catalogh dla Bienela Gherdëina VI y ressumé dl proiet
N lunesc ai 10 de setëmber iel nscila l'ucajion per cialé de reviers a coche la Bienela da chëst ann à butà, nce cun l bel catalogh nuef. Oradechël iel la legrëza per la truepes y i trueps che à fat pea, ma sambën nce per duc i autri, de se udëi mo n iede sun l video dl'Opera mujighela "Dolomieu" de Sissa Micheli, che ova abù l'idea y scrit l libretto, cun la mujiga de Georg Malfertheiner, che à nce fat da dirighënt. L'Oprea ie unida nszeneda tl raion da jì a pe de Urtijëi, cun gran suzes.
Ai 14.09 saràl a Burnech la manifestazion Transart Dolomieu, ulache Sissa Micheli nszenea na verscion nueva, pruietan Dolomieu te n daunì dalonc.