Manifestazions atuales speziales

Data

05 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 5 de otober
Curs de fitness a La Ila
La U.S La Ila/seziun Fitness mët da jí sëgn d'altonn 2 cursc de fitness a La Ila, adöm cun l'istrutur Thomas Valentini
I 2 cursc mët man ai 11 d'otober y jará inant vigni jöbia por indöt 8 iadi, tres te palestra grana a La Ila.
Curs de Step Aero-bica: Dales 19:30 ales 20:30. Prenotaziuns al 339/1433016 cun SMS, don dant "Curs Step + inom y cognom".
Total Body Tune Up: Dales 20:30 ales 21:30. N bun alenamënt por döt le corp: al vëgn lauré sön le fle, sön la agilité y potenzié i muscui dles iames y la pert alta dl corp, cun eserzizi de cross fitness y functional training. Les prenotaziuns gnará tutes sö pro la pröma incuntada te palestra.

Fotoworkshop cun Radomir Jakubowski
Le Fotoclub Val Badia y la lia di fotografs dla natöra Strix inviëia a n workshop de fotografia cun n fotograf che á davagné concursc a livel internazional
I sёis dёr bel inviá al fotoworkshop cun Radomir Jakubowski, ai 13.10,2018 dales 9:00 ales 12:00, tl Istitut Ladin "Micurá de Rü" a San Martin de Tor (an pó ince prenoté la marëna). La manifestaziun vёgn organisada dal Fotoclub Val Badia adöm cun le Fotoclub "Strix". Por düc i interessá al monn dla fotografia él na bela ocajiun da odёi tla Val Badia i laurs de n fotograf che á davagné concursc a livel internazional. Sües fotos pón odëi te internet sot a https://naturfotocamp.de/home. Pro le workshop gnarál dé consëis da fá jö y i partezipanc pó cina ai 9 d'otober mené ite 4 retrac (WeTransfer a info@strixnaturfoto.org - SRGB, lunghëza 1920 pixel) che gnará analisá da Radomir Jakubowski.
Ai 12.10.2018 dales 20:30, sarál Radomir Jakubowski che tignará n referat tla scora alta taliana, tla strada Schwesternau a Porsenú, dal titul "De tiers y löm; mi punt de odüda dla fotografia di tiers". Informaziuns y iscriziuns al workshop al numer 0474/565177 (info@strixnaturfoto.org).

La Ila: film por mituns
Ai 12 d'otober vëgnel mostré le film "Wonder"
Le Consëi Cultural de Badia inviëia da gní a ti ciaré al film "Wonder", en vëndres ai 12 d'otober dales 17:00, tla Ciasa dla Cultura a La Ila. Le film insëgna da n'avëi nia preiudizi sce valgügn ciara fora atramënter.

Musiga dal ví tl Saj.un
Pröm vëndres d'otober, incö ai 5 dales 21:00 inant, musiga dal vi adöm cun Hubert Dorigatti y Queen Laurin, tl Zënter Cultural SaJ.un a La Ila. Inviada é döta la popolaziun, nia ma la jonëza
Chësta sëra é tla pröma pert sot al moto "Early down home blues". Da canche al á davagné le concurs nazional por la "International Blues Challange" a Memphis, fej Hubert Dorigatti pert dl olimp dl blues. Insciö alda le musizist da Bornech ofizialmënter pro l'elite te chësc stil de musiga. Por Dorigatti é chësc le secundo conzert tl SaJ.un a La Ila, do che al á bele soné da d'altonn 2017 adöm cun Adrian Kirchler.
I Queen Laurin ti dij a süa musiga "minimal rhythm'n'roll" y indichëia cun chësc che le stil de musiga é dër ri da descrí. Les cianties de so repertore vëgn en gran pert da grups che n'á degüna data de scadënza, sciöche i ZZ Top, The Doors, Elvis, Rolling Stones, Eric Clapton, Rory Gallegher y Canned Heat.
"Queen Laurin" ne vá indere nia le tru tradizional, deache ai ne sona nia te na fomaziun rock, mo cun percusciuns (Erwin), piano (Lisa) y chitara acustica (Klaus).
Düc é dër bel inviá da gní a se gode na sëra cun de bela musiga.

Segra da Lungiarü
Tl fin dl'edema di 13 y 14 d'otober tl gran tendun, cun n bel program de cornisc
Lungiarü inviëia ala segra dl paisc, ai 13 y 14 d'otober. La festa mët man bele la sabeda ai 13 d'otober, olache al sará dales 21:00 inant festa tl tendun cun DJ Rudyru y DJ Pives. Al gnará ince pité na lounge dla bira cun spezialités de bira. La domënia ai 14 él spo dales 8:15 la santa mëssa te dlijia, dales 10:30 matinée tl tendun cun musiga dal ví y dales 11:30 inant arán la poscibilité da joré cun le joler. Dales 13:00 gnarál daurí le ciantun da se depënje sö por i mituns y al sonará la musiga da Unterdarching (Paiern), dales 15:00 musiga dal ví cun Oswald y dales 16:30 sona la band Vollgas. Por spëisa y boanda vëgnel sambëgn fistidié y an ciafará danter l'ater ince spezialités de pësc.

"I Ladins dles Dolomites", cun Simon Kostner
Trëi serades a Badia, San Martin y Corvara, te chëres che le cabaretist y joblere cunta nosta storia te na manira particolara
Sön iniziativa di Consëis de Formaziun dla Val Badia, vëgnel metü da jí tla Val Badia deplü serades cun le cabaretist y joblere Simon Kostner, sot al titul "I Ladins dles Dolomites - Simon Kostner cunta la storia de na identité". Al é ciamó trëi apuntamënc: incö vëndres ai 5 d'otober dales 20:00, tla Ciasa J. B. Runcher a Badia; en mercui ai 24 d'otober dales 20:00 tl salf dl Istitut Ladin a San Martin de Tor; en jöbia ai 25 d'otober dales 20:00, tl salf dles manifestaziuns da Corvara.

"La guerra dei calzini"
Chësc é le titul dl teater por mituns che vëgn jobelné a La Ila
En mercui ai 10 d'otober dales 17:00 él da odëi tla Ciasa dla Cultura a La Ila le teater por talian "La guerra dei Calzini" cun Sabrina Fraterali.
Chësc teater por mitans y mituns dla scolina y dla scora elementara cunta de döes cialzines che ne se vëgn nia y che impara da s'azeté. Organisaziun: Aterteater y Uniun Teater La Ila.

"Instant Acts - cuntra la violënza y le razism" tla Val Badia
Le Sorvisc ai Jogn Val Badia adöm cun les scores altes da La Ila, mët da jí le proiet "Instant Acts - cuntra la violënza y le razism", en mercui ai 17 d'otober
"Instant Acts - cuntra la violënza y le razism" é n proiet teatral internazional dla formaziun culturala di jogn, che mët da jí dal 1993 inant da iade a iade da d'altonn dis de proiet dandadöt ti pici paisc de nosta provinzia. Dl ensemble internazional de Instant Acts fej pert 13 artisć jogn, che vëgn chiris fora sura döt le monn. Iniann é lapró p.ej. Mushegh dl'Armenia, Matylda dla Polonia, Yacine dl'Algeria, Larissa dal Brasil, Isabella dla Cina o Ambra dla Talia. Ëi laurará danmisdé diretamënter cun i 119 studënc, olache al sará workshops, p.ej de breakdance, beatbox, body-percussion, capoeira y cotán d'atri.
Dales 14:00 i tóchera spo ai artisć intësc. Ëi portará dant döt so savëi te na performance de za. 80 menüc, tla palestra grana da La Ila. A chësta inviunse düc i interessá da tó pert. L'entrada é debann y al n'ó ester degöna prenotaziun.

La chëuta di vedli mutons
Teater te Sëlva duman sada ai 6.10. dala 20.30, n dumënia bele dala 17.00 y pona mo doi reprejentazions via per l'ena, te cësa de cultura de Sëlva
La doi veteranes dl Teater de Sëlva, Wally Mussner y Bernardette Senoner, à sëurantëut per l prim iede la regia dl pez che la grupa de teater à mparà ite per chësc autonn. L ie n teater da paur coche n dij, de Walter Kalkus, repurtà tl gherdëina da Lidia Delazer.
Se traté se tràtela tlo de scioldi. Duc i vedli mutons ie cherdei a paië na chëuta nueva, la chëuta di vedli mutons. Ma nce tlo iel ezezions; mé chëi che possa mustré su de avëi giapà almanco "trëi cestons" ne muessa nia paië. Trëi cumpanies drët maladëc, Moz, Piere vulpon y Tita, sambën dut vedli mutons, prova śën a uni maniera de abiné ca da vel'ëila n tel ceston. Ma ala fin vàla sambën dut autramënter de coche i se nmaginova... y vel' una uel se maridé, a duc i cosć...
L fej pea bën set atëures coche Emanuel Demetz, Ingrid Mussner, Evi Perathoner, Ivan Senoner, Juri Demetz y i doi atëures nueves Vera Mussner y Simon Bernardi, che ie pra si prima esperienza sun palch.
Dla paladina se cruzia Thomas Mussner, Igor Demetz, Alex Runggaldier y Werner Senoner, mascra de Laura Lussardi, fotograf ie Ivan Mahlknecht, frisera ie Laura Senoner, di recuisic se cruzia Helga Kerschbamer y nia da desmincë Lidia Delazer che dij ite.
L teater ie mo da udëi:
n sada ai 6.10. dala 20.30,
n dumënia ai 7.10. dala 17.00,
n mierculdi 10.10. dala 20.30 y
n sada ai 13.10. dala 20.30
for te cësa de cultura de Sëlva.
Chertes danora pòssen apusté tla butëiga Minishop de Rudi Avi te Sëlva o cherdan su l numer dla butëiga 0471 794085.

"Nosta vita nes dà dant la streda"
Ncuei vënderdi ai 5 de utober te sala de Calonia a Urtijëi
L pruiet "Ti dé tëmp al tëmp", che vën metù a jì dal Cunsëi furmazion
Gherdëina deberieda cun i cunsëies de furmazion dla valeda, va inant śën d'autonn cun la proscima manifestazion, che ie n vënderdi ai 5.10.2018 dala 20.30 te calonia a Urtijëi.
L KVW de Urtijëi mët a jì na mëisa turonda sot al moto: „Nosta vita nes dà dant la streda". La esperienzes de vita de uniun de nëus, lascia udëi da n pont de ududa defrënt l senificat dl tëmp y de co l nuzé per la cosses che nes sà l plu mpurtantes. N chësta sëira jirons plu sot tl argumënt y cialeron de se fé n valgun pensieres. I ghesć ie persones che viv y lëura tla valeda (te ciamps defrënc) y che conta de si esperienzes de vita y coche cërta ntraunides à mudà si cunzet dl tëmp. Prejëntes sarà: Lydia Kostner Mussner dla Cësa Bruma, Irina Thaler Peristi, Armin Kasslatter de S. Cristina, Helmar Demetz da Uridl, l psicologh dut. Edmund Senoner, Claudia Insam Obletter y Peter Kostner da Stlujuc. Moderadëur dla sëira ie Leo Senoner. Duc ie nviei de cuer a unì a scuté su!

Luis Piazza y Raimund Mureda
Giaurida dla mostra n sada ai 6.10. dala 11.00 tla Cësa de Cultura a Urtijëi
L Museum Gherdëina nvieia de cuer ala giaurida dla mostra speziela per i 110 ani dala nasciuda di doi artisć y per i 60 ani dala fundazion dla Lia dl Museum.
Velch deplù dla mostra y di artisć saverà da cunté la diretëura dl Museum Paulina Moroder, la esperta de storia dl'ert Danila Serafini y sambën i cumëmbri de familia, che sarà nce prejënc ntan i dis che la mostra ie davierta.
La presidënta dl Museum Marie Theres Thaler y l ambolt de Urtijëi Tobia Moroder purterà si saluc, y do n valgun pec sunei dala "Grödner Geigenmusig" ie duc mo nviei a fé na viva.
La mostra resterà davierta nchin ai 28.10. da lunesc nchin vënderdi dala 15.00 - 18.00 y de sada y dumënia dala 10.00 - 12.30.

Marcià di libri adurvei de Segra Sacun
N lunesc ai 15.10. y n merdi ai 16.10. tla Cësa de Cultura a Urtijëi
Coche l ie bele tradizion meterà la trëi biblioteches publiches dla valeda (San Durich, Tresl Gruber y O.v. Wolkenstein) nce chëst ann a jì l marcià di libri adurvei de Segra Sacun.
I libri tëuc ora dala biblioteches (ajache danejei, laurei su o nia plu atuei) y chëi dunei da privac unirà vendui a 1 € per liber. I scioldi che vën trac ite unirà pona inò dac ora per l bën dla trëi biblioteches.
L marcià di libri ie a Urtijëi tla Cësa de Cultura dan l ufize dla Lia dl turism y scumëncia n lunesc ai 15 de utober dala 8 daduman y dura nchin la 6 da sëira. N merdì ai 16 de utober iel daviert dala 8 ala 12 da mesdì y dala 2 ala 6 da sëira.
La trëi biblioteches San Durich de Urtijëi, Tresl Gruber de S. Cristina y Oswald v. Wolkenstein de Sëlva nvieia duc a unì al marcià di libri y a se nuzé de chësta scumenciadiva y rengrazia i trëi Chemuns y duta la populazion de Gherdëina y da oradecà che à for sustenì y che sustenirà nce tl daunì la biblioteches dla valeda.

Na bona marënda per nosta jënt de tëmp
La Lia Sarëinn nvieia duta la jënt sëura i 60 ani de Gherdëina a se nuzé de chësc servisc nuef a Urtijëi, a S. Cristina y te Sëlva
Nviei ie duc chëi che à la residënza te Gherdëina y à passa 60 ani. Chësta scumenciadiva ne n'ie nia mé per i pueresc, ma per duc i seniores, che à ueia de se maië n bon cëif n cumpania.
Uni merdi possa la jënt de tëmp jì tla pitla sala dla Cësa de Cultura Luis Trenker a Urtijëi a maië da marënda.
For de merdi se anconta nce chëi de tëmp che uel jì a marënda a S. Cristina, iló vën l servisc pità tla sala Raiffeisen, te cësa de Chemun. Uni mierculdi se ùrten te Sëlva, for dala 12.00, te stua di seniores, sun calonia. L priesc dla marënda ie de 4,00 € per persona.
Chiche uel jì a marënda muessa se lascé scrì su almanco nchin al di dant do marënda, cherdan su: - per Urtijëi l numer 335 1031751 - per S. Cristina l numer 333 1499949 - per Sëlva l numer 335 6558633

Teater a S. Cristina
Nce chëst ann vëniel purtà dant te sala de chemun a S. Cristina n pez de teater da rì, chëst ann tla rujeneda tudëscia. La prima reprejentazion sarà da udëi n juebia ai 11.10. dala 20.30
L pez mparà ite dala Grupa de Teater de S. Cristina ie de Stefan Vögel y se tlama "Achtung Deutsch". Dla regia se à tëut sëura Erich Meraner.
De cie se tràtel pa?
Tres n fal burocratich vëniel purtà ite n cuatier n partides (WG) dl studënt multi-culti Stefan Ramoser sciche familia. Canche l vën adalerch l funzioner per cuntrulé sce la ie bën nsci, ne n'ie Stefan nia a cësa y n sirian, na franzëusa, n talian y un de Viena muessa fé finta de vester na bela familia sudtiroleja. Ma co devënten pa tan aslune de drë sudtirolesc? N curs de prëscia n cont dla cultura sudtiroleja dëssa judé. Sambën che la ne dura nia giut y dut garata sotsëura...
L pez ie da udëi:
n juebia ai 11 de utober dala 20.30
n dumënia ai 14 de utober dala 18.00
n mierculdi ai 17 de utober dala 20.30
n merdi ai 23 de utober dala 20.30
n sada ai 27 de utober dala 20.30
n dumënia ai 28 de utober dala 18.00
Chertes danora pòssen apusté tla butëiga "Boutique Parisienne", cherdan su l numer de telefonn 0471 793334

"Opas Diandl"
N juebia ai 11.10. dala 20.30 te Cësa de Cultura a Urtijëi scumëncia la 52ejima sajon de cunzerc di Jëuni de Mujiga de Gherdëina
La grupa de Südtirol ne n'à no n cunzet no n stil, Opas Diandl à carater. Si mujiga ie frëscia, spontana y ntan si cunzerc àuden y vëijen la gran energia y legrëza de suné di cin' musizisć. Leprò vëniel mo na gran variazion de strumënc y aranjamënc, scialdi deplù de chël che n possa se nmaginé. Sun palch vëniel iodelnà, ciantà a trëi-cater ujes, ma nce fat mujiga rock, tlacenà, n curt l spectrum dla mujiga ne pudëssa nia vester majer. For inò ie nce l publich damandà de fé pea y chësc ne se lascia suvënz nia damandé doi iedesc... Tl cunzert prejenterà Opas Diandl pec ora de si CD nuef dal titul "X".
I "Jëuni de Mujiga de Gherdëina" nvieia duc a unì a scuté su y sambën nce ai autri ot cunzerc che ie sun l prugram chëst ann. L abunamënt ie da giapé al priesc de 70 € y tlo giàpen chëst ann mo sëuraprò na cherta debant per un n cunzert da pudëi tò pea zachei a na bela sëira de mujiga.

Steinegg Live 2018
L miëur dla mujiga y cultura, dai 13 ai 27 de utober a Stanecia/Steinegg tla Cësa de Cultura
L festival Steinegg Live, che ie ntant cunesciù lonc y lerch, ruva chësta ann a si 22ejima edizion. Coche bele dai ani cëla i urganisadëures de pité n mescedoz de mujiga y cultura, ulache dut giapa mpue si lerch, sibe nterprec da tlo che musicisć cunesciui. Nsci iel mé per dì sun l program n teater de jëuni che n à scrit nstësc, virtuëusc de strumënc cabaretisć, ciantarins cunesciui dla Nghiltiera o musicisć de jazz y blues che se à fat n inuem ti USA, ciantautëures de Südtirol, n cumponist che vën ratà sciche piunier tl lië adum mujiga eletronica cun la tradizion tlassica. Sambën ne manceràl nce no grupes de nosc raions y la sëira dedicheda ai jëuni ciantarins y musiconc che vën docà y a chiche ie bele bënulù dal publich de cësa. Lascià ora ne vëniel nce no la mujiga populera cun strumënc a fla o da Oberkrainer, che ie daniëura da audì pra la festa che dura dut l di y ulache l vën nce pensà ai mutons y si devertimënt.
Chësc l programm 2018
Sa. 13.10. dala 16.00 Teater per mutons y jëuni cun la grupa de teater de Steinegg Live.
Ve. 19.10. dala 20.30 "Rising Stars & Local Heroes". Na sëira cun talënc jëuni y "heroes" de Stanecia y ntëurvia.
Du. 21.10. dala 10.30 inant "Festa Steinegg Live" cun lianies blances y pier de selin, bal dl domesdì y program per mutons, cun la "Südtiroler Tanzlmusig", i "Goldrieder" y "Bobby-Live".
Lu. 22.10. "Roberto Cacciapaglia - Quarto Tempo Tour 2018". L musicist cunesciù per si criazions de sonns, che lieia adum la mujiga eletronica cun chëla tlassica coche degun auter ne sà da fé. Do si Tour ti USA ie chësc l sëul cunzert te Europa.
Me. 23.10. "Brian Auger's Oblivion Express feat. Alex Ligertwood (UK)". Auger, l Guru dl Hammond che sona al mumënt l orgun eletronich per Zucchero, deberieda cun Alex Ligertwood (ciantarin di Santana) y si band per l prim iede da audì live te Südtirol. L ie la sëira Jazzrock-Fusion de Steinegg Live!
Mi. 24.10. "Igudesman & Joo" i doi artisć musicisć Aleksey Iguedesman y Hyung-ki Joo mët adum tlassica cun pop y teater. Na sëira de mujiga y matades coche n à dinrer udù.
Ju. 25.10. "Max von Milland" cun si band prejentea si album nuef "Bring mi hoam". Danora sónel mo la grupa Malù cun Lucia Kastlunger.
Ve. 26.10. "Joe Louis Walker" la lijënda dl US-Blues per l prim iede te Südtirol. L ie la nuet dl Blues de Steinegg Live cun ghesć coche Nik Lee & The Jingle Fellas, Marco Pandolfi y da dedò Blues-Jam Session.
Sa. 27.10. Sëira cun i VinoRosso, The Fonzies de Bulsan y DJ Peter dla ex Eule. Ala fin uniràl mo fat fest... cun bands de Südtirol y l miëur Sound ti tëmps passei.
Duta la manifestazion ie tla Cësa de Cultura de Stanecia y scumëncia dala 20.30 (sce nia scrit autramënter).

Nfurmazions plu avisa iel da giaté sot a www.steinegglive.com.
Chertes de ntreda per i cunzerc dai 22. ai 26.10. ie da giapé te duta la Casses Raiffeisen de Südtirol, tla butëighes Athesia y online sot a www.ticketone.it.

Festa de giaurida dla plaza dal palé nueva
N dumënia ai 7.10. dala 2 domesdì inant a Urtijëi
L Chemun de Urtijëi nvieia de cuer ala giaurida dla plaza dal palé de ierba sintetica "Tresval", n dumënia ai 7 de utober 2018.
Scumencià vëniel dala 14.00 cun l tai dla pinta y la giaurida ufiziela.
Dala 15.00 passeràn bele via al sport dal palé cun n turnoi danter scuadres de reprejentanza y "vedla glories".
L unirà pità lianies y zeche da bever.
Duc ie nviei a unì!

Fazions de bënulëi
Giaurida dla mostra n merdi ai 9.10. dala 7 da sëira tla Galaria Doris Ghetta a Puntives
Philipp Messner de Urtijëi/Minca, Dejan Dukic de Viena, Julia Frank nasciuda a Glurns y Martina Steckholzer a Sterzing, meterà ora te na mostra cureda da Sabine Gamper si pitures dal titul "affective effects".
I cater artisć se à dat ju te na maniera nteressanta cun la idea dla materialità, dla tridimensciunalità y dla spesa tla pitura. Uniun di artisć à repurtà do si ntënder, te na maniera simbolica o iconica, l cheder sciche corp tridimensciunel. I se nuza de forba y pigmënc sciche elemënt materiel per ti dé ite l sot o auzé ora livei defrënc che semea nchinamei che se destachëssa dala spersa dl cheder nstës. La materialità dl culëur possa datrai vester plu da pië ite y datrai de manco, ma te n valgunes dla opres prejentedes se trasfurmea i chedri te de drë avenimënc perzetifs.
La mostra tla Galaria Ghetta a Puntives Sud 8 sarà da udëi nchin ai 30.11., da merdi nchin vënderdi dala 15.00 ala 18.00 o scenó cherdan su danora l numer 366 1500243.

Berstot criativa per mutons y mutans
Da n sada ai 20.10. inant per sies sades ndolauter tl Lizeum d'Ert a Urtijëi
Nvion i mutons y la mutans de duta Gherdëina dl'età dla scola mesana a fé pea na berstot criativa. L unirà dessenià, depënt y fat formes cun tecniches y materiai defrënc y crià opres d'ert persuneles.
Acumpaniei unirài dala prufessëures dl Lizeum d'Ert Sara Stuflesser, Medea Moroder y Christine Runggaldier.
La berstot criativa sarà tl Lizeum d'Ert Cademia a Urtijëi, da n sada ai 20 de utober inant per sies sades ndolauter, for dala 9.00 ala 11.00.
Nfurmazions y se lascé nuté su: nchin ai 13 de utober da Karin tl ufize dla Nëus Jëuni Gherdëina o cherdan su l 0471 799006.
Prion bel vo genitores, nëinesc y laves de ti l fé a l savëi ai mutons y ala mutans y ... a chëi che arà legrëza dajëi pea n gurmel!
Metù a jì dala lia La Vëta deberieda cun la Nëus Jëuni Gherdëina.

La politica y la jonëza
Lîtes provinziales 2018: sëra d'informaziun y discusciun cun i candidac ladins, sön tematiches de mituns y jogn
En gaujiun dles lîtes provinziales 2018, mët da jí le Sorvisc ai Jogn Val Badia en mertesc ai 16 d'otober dales 20:00 tl Zënter dla Jonëza y Cultura SaJ.un, na sëra costrutiva d'informaziun y discusciun cun i candidac ladins, sön tematiches che reverda i mituns y la jonëza, mo nia ma, sciöche: Sorvisc ai Jogn, strotöres por la jonëza, monn dl laur, frabiché-contribuc, uniuns dl sport, scora de musiga, volontariat, burocrazia y responsabilités tles uniuns, sorvisc zivil, sanité, viabilité...
La moderaziun é de Diego Clara. Inviada é döta la popolaziun!
Le Sorvisc ai Jogn Val Badia se vëiga sciöche istituziun por le sostëgn sussidiar ales porsones, ai grups, ales uniuns, ales assoziaziuns y istituziuns che se dá jö cun le laur por y cun i mituns y la jonëza de nosta Valada. Dlungia chësc rapresentunse i interesc dla sozieté y dla politica y fajun da interlocutur por les ghiranzes di mituns y di jogn.