Manifestazions atuales

Data

19 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 19 de otober
Sport
A Poza la Fascia Falcons Fest
Insnet, vender ai 19 de otober l'é la Fascia Falcons Fest. La festa scomenza da les 18.30 tel tendon de la manifestazions de Poza. Da les 19.00 vegn prejentà la squadres e dapodò sarà n pasta party per duc chi che tol pèrt.
Partida de hockey dl HC Gherdëina
N merdi ai 23.10. partida dl campiunat AHL, ulache l HC Gherdëina jugherà n cësa contra l KAC II de Klagenfurt, dala 20.30 tl stadio Pranives de Sëlva.
Garejeda de sauté tl luech
N dumënia ai 28.10. dala 11.00 tl zënter de Urtijëi mët i Gherdëina Runners a jì la ultima garejeda de paesc da chëst ann, dla lingia "VSS Stadt- und Dorfläufe". Pra la premiazion uniràl nce premià i miëures de duta la sajon. L se trata de na garejeda per mutons y per granc.

Teater
Rassegna de teater del Comun general de Fascia
En sabeda ai 27 de otober taca ite la rassegna de teater del Comun general de Fascia. Te chino de Cianacei da les 20.30 l grop "I batadoes de bron" met dant "La storia del sudà". Dant del scomenz del spetacol l'é la premiazion de "Kunst ladin". Vegn tout sù bonamans per la Cèsa de Paussa.
"Achtung Deutsch" a S. Cristina
L pez de teater da rì, chëst ann tla rujeneda tudëscia, mparà ite dala Grupa de Teater de S. Cristina sot ala regia de Erich Meraner, sarà mo da udëi n merdi ai 23.10. dala 20.30, n sada ai 27.10. dala 20.30 y n dumënia ai 28.10. dala 18.00 te sala de Chemun a S. Cristina. Chertes danora pòssen apusté tla Boutique Parisienne, tel. 0471 793334.

Chino
LiteraKino, proiezion de films per granc
Tla Bibliotech San Durich a Urtijëi vëniel mustrà ncuei vënderdi ai 19.10. dala 20.30 n film tla rujeneda taliana. N vënderdi ai 26.10. saràl da udëi n film per tudësch. L program plu avisa di films che unirà mustrei proscimamënter ie da udëi tla bibliotech, ulache l ie nce julantins da pudëi se tò pea.
La Ila: film por mituns
Le Consëi Cultural de Badia inviëia da gní a ti ciaré al film animé "Coco", incö vëndres ai 19 d'otober dales 17:00, tla Ciasa dla Cultura a La Ila. Miguel á na gran pasciun por la musiga y ince sce süa familia ti proibësc da fá musiga, ti vál do a süa gran pasciun y röia pro sü antenac che le daidará.

Radio y Televijion
Programazion ladina sul canal 642 e TV Ladina
Sul canal de la mendranzes linguistiches TML (642) ogne sabeda taca la neva programazion ladina de la setemèna, organisèda te bloches de zirca 3 ores che se enterza a la programazion per mochen e cimbro e la pea via con chisc oraries: de sabeda h. 7.00 e 17.15; de domenia h. 10.30 e 21.00; de lunesc e de jebia h. 14.00 e 21.00; de mèrtesc e vender h. 10.30 e 17.30; de mercol h. 7.00 e 14.00.
Duc i dis da les 7.00 per mesora l'é programes per ladin col TG Ladin, l program istituzionèl del Comun general "Da Fascia en curt" e dapò i spezièi de l'Aisciuda Ladina di egn passé e la neves da La Usc di Ladins.
Da les 7.45 l'é l program per i bec con la contìes animèdes de Pororo e l Contacontìes per endrez de l'Istitut Cultural Ladin; da les 9.00 l'é i TG per ladin, mochen e cimbro; da les 12.30 l'é "Da Fascia en curt" e dò n curt spezièl sui bai di Schuhplattler e amò l TG Ladin; h. 14.00 l'é amò i spezièi curc su l'Aisciuda Ladina e dò i dessegnes animé de Pororo; h. 17.15 Contacontìes e Pororo e h. 19.30 endò TG Ladin, Contacontìes, Pororo, Da Fascia en curt e h. 22.30 amò l TG Ladin.
Te la trei ores de programazion duta fascèna coi oraries scric de sora se pel veder l rotocalch setemanèl Pedies, che va fora ogne setemèna con na trasmiscion neva: de sabeda h. 8.00 e 20.00, de domenia h. 12.00 e 22.00 e dapò fora per duta la setemèna; sobito dò l'é la rubrica de sport "Finalzil" e amò spezièi curc. Apede a dut chest l'é semper i programes culturai de "L Cianton de l'Istitut" e "L Cianton de la musega" e dapò l teater de "Vic e Ac". Te la programazion l'é dapò ence l program didatich per bec "Ocio" e chi sul guant "Anter pult e cassabanch", l program de cojina "Te Fana", i filmac de "L'ambient te man", la sit comedy "Lesciva macèda" e de etres spezièi. La maor pèrt di programes é da poder veder ence su Youtube, TV Ladina. Se pel domanèr l palinsest a l'Ofize servijes linguistics del Comun general de Fascia (luciana.detomas@comungeneraldefascia.tn.it) o a l'Union di Ladins (union@ladinsdefascia.it).
RADIO
"LADINIA LIVE": Microfons davierc sun atualità y cultura
La trasmiscion ie da audì uni merdi y mierculdi dala 13:45 ala 14:00 sun la frecuenzes de RAI LADINIA
Mertesc, 23 de otober - Rassegna de teater ladin uton 2018
Intervista con Sabrina Rasom, responsabla servijes linguistics e culturèi Comun General de Fascia. Moderazion: Anna Mazzel.
La trasmiscion "DAI CRËPS DL SELA" ie da audì uni di dala 19:05 ala 19:30 sun la frecuënzes de RAI LADINIA
Vender, 19 de otober - Te stua de... Roland Verra (prima pert)
Vintsies ani alalongia ie l dut. Roland Verra stat l ntendënt dla scoles ladines. Chëst ann iel jit n pension y l ti à sëurandat la ncëria ala dut.ra Edith Ploner. Ntan chësta trasmiscion vëniel rujenà sambën de scola, dla mudazions che l ie stat y ciuna prospetives che à la scola ladina. Trasmiscion de Simon Moroder.
Sabeda, 20 de otober - Momënc de vita – intervista a Zenzo Costa
Zenzo Costa de Mëne é nasciü a Calfosch tl 1937, so pere â opté por jí fora di Paisc Todësc, olache döta la familia á vit por agn alalungia tratan la secunda vera. Tl 1947 é Zenzo cun sü geniturs, fredesc y sorusc ruvé indo zoruch a Calfosch, olache al á imparé le laur da sartú. Por 12 agn alalungia âl lauré dlungia Stuttgart y spo él indo gnü a vire a Calfosch. Zenzo nes cunta ince de sciöche al y sü compagns passâ le tëmp lëde deboriada y dles matades che ai fajô a Calfosch. N program de Erika Castlunger.
Domenia, 21 de otober - Te stua de... Roland Verra (segonda pert)
Tla segonda trasmiscion cun l ntendënt da dant vala mpue dl'urgansazion y dla figura dl ntendënt dla scoles ladines che ie mudeda dassënn. Sce pludagiut fova l ntendënt na istituzion iel al didancuei "mé" plu n dependënt dla provinzia. N auter argumënt che vën tratà ie nce la ciarestia de maestri, la stënta de abiné personal che va a nsenië tla scoles jan ite sun l "iter" lonch per deventé de rodul. Trasmiscion de Simon Moroder.
Lunesc, 22 de otober - Cunté y dé inant la storia – lecorc ntëur al tëmp dla generazion dl '68
Pian via dala testemunianzes y dai lecorc persunei rujenons dla trasfurmazions che nosta sozietà moderna à fat tres su per i ani '60 y '70 a livel economich, politich, soziel y culturel, coche nce tla relazion danter ëi y ëiles, mutons y genitores. Program de Leo Senoner.
Mercui, 24 de otober - Le Raìsc – portina per scutèr su
La cooperativa "Le Raìsc" é metuda adum da n grop de joegn e joenes psicologs, psicoterapeuts e educatores che sporc servijes educatives e de didament a duc. Anter i desvalives projec che i à endrezà l'é chel de la portina per la dependenzes ma no demò che se ouc a chi che padesc de vèlch dependenza o dejèje psichic. En rejonon con Martina Volcan. Program de Anna Mazzel.
Juebia, 25 de otober - L'altonn da zacan ti recorc da incö
Cun la fin dla buna sajun se müda ince usanzes, festes y spëisa da paur. Tla memoria è les tradiziuns ciamò vies pro tröc, scebën che te nüsc tëmps se àl mudè cotan. Georg y Ingrid Lardschneider nes cunta fora de sües recordanzes. Program de Sara Frenner.
TELEVIJION
Mertesc, 23 de otober dala 20:50 - Natura e ambient: Jé a pe fora por les Dolomites
Da tres inca é le jí a pé öna dles maius atraziuns te Südtirol y suradöt tles Dolomites, y la gran rëi de sëmenes cun sües marcaziuns cöcenes y blances le desmostra. Nüsc pioniers á salpü da invié i turisć te sües ciases sciöche valgügn de familia. Chësta gran ospitalité é dessigü restada öna de nostes cualites plü importantes y vignun che laora tl ciamp dl turism, dai ostis ai chi che laora te n'agenzia, a chi che acompagnëia le scior da n post al ater, pó ester brau de vire y mantigní le valur de chësc pice ciantun de paraisc. Program de Karin Pizzinini, camera y tai Fulvio De Martin, a cura de Anna Mazzel.
Mercui, 24 de otober dala 20:50 - Vies de comunicazion tla valedes ladines - Cieche la stredes nes conta
A Col iel mo al didancuei da udëi, l troi ulache bele tl Medieve univel traspurtà l fier dla minieres dl Fursil. Nia dalonc, su per i ronesc ërc dl jëuf de Falzares, oven bele al scumenciamënt dl 1900 fat su na streda per i prims turisć che univa tla Dolomites. Cieche la stredes, i troies y i cunliamënc à ulù y uel dì per l svilup economich, soziel y turistich dla valedes ladines iel da udëi te chest program de Elisabeth Kostner, a cura de Anna Mazzel.
Juebia, 25 de otober dala 20:50 - Euro – magazin de sport tles valades ladines
N program de Diego Clara y Hartmann Mairhofer, a cura de Leo Senoner.

Informaziuns plü menüdes söi programs radio y televijion de RAI Ladinia pôn ciafè sön www.raibz.rai.it – Sun l medem sit i programes TV sarà da vedei sota "Mediateca" y les trasmiscions radio sota "Podcast".

Referac
La fertuna sta tl cë
N sada ai 20.10. dala 20.00 tla Bibliotech O.v. Wolkenstein te Sëlva prejenterà Christine Wunsch l liber de alenamënt per plu mumënc de fertuna tla vita da uni di.
Tenì cësa zënza fé maroca
N lunesc ai 22.10. dala 10.00 nchin la 12.30 tla Bibliotech Tresl Gruber a S. Cristina, cun l'ëifoma Maria Lobis. Nce te cësa se abìnel su montes de refudam. Tl referat vëniel dat cunsëies co schivé maroca y co se fé nstësc mitli y prudoc che n adrova uni di. L ie da se lascé nuté su nchin ai 19.10. cherdan su l 333 7739605. Metù a jì dal VKE Gherdëina.
Vester ëila de uni viers – Snait de mudé
N mierculdi ai 24.10. dala 20.00 tla Bibliotech Tresl Gruber, cun Martha Erlacher. Na persunalità sterscia ie la cundizion per avëi suzes, rënder, vester sani y cuntënc per n tëmp plu lonch. La manifestazion, tumeda ora d'auril, vën piteda śën mo n iede. Metù a jì dala Bibliotech Tresl Gruber.
I öri eterics
Le Consëi de Formaziun da La Val mët da jí en mercui ai 24 d'otober dales 20:00 n referat cun Elisabeth Oberbacher, dal titul "I öri eterics (ätherische Öle): n meso natural por l'apoteca de ciasa". Le referat é te salf dles manifesatziuns da La Val.

Mujiga
Me+Marie y Andrea Valeri tl Circolo
N vënderdi ai 26.10. tla sala dla Lia Mostra d'Ert a Urtijëi sun Plaza S. Antone, dala 20.00 cunzert cun Andrea Valeri y l sarà nce da audì Stefan Demetz y Marc Perin. N sada ai 27.10. for dala 20.00 cunzert de Me+Marie y l sunerà nce Andreas Kondrak y Marion Moroder, Rachet Branco dl'Austria per jì inant mo cun na aftershow cun DJ Jonas Zimmermann. Chertes danora giàpen a n miëur priesc tla ustaria Pitla Stua a Urtijëi.
"Roberto Cacciapaglia - Quarto Tempo Tour 2018".
N lunesc ai 22.10. a Stanecia tla Cësa de Cultura dala 20.30. Musicist cunesciù per si cumposizoins che lieia adum la mujiga eletronica cun chëla tlassica. Do si Tour ti USA ie chësc l sëul cunzert te Europa. Chertes: te duta la Casses Raiffeisen de Südtirol, tla butëighes Athesia y online sot a www.ticketone.it.
Brian Auger y Alex Ligertwood
N merdi ai 23.10. a Stanecia tla Cësa de Cultura dala 20.30. Auger, l Guru dl Hammond che sona al mumënt l orgun eletronich per Zucchero, deberieda cun Alex Ligertwood (ciantarin di Santana) y si band per l prim iede da audì live te Südtirol. Chertes: te duta la Casses Raiffeisen de Südtirol, tla butëighes Athesia y online sot a www.ticketone.it.
"Igudesman & Joo" i doi artisć musicisć
N mierculdi ai 24.10. a Stanecia tla Cësa de Cultura dala 20.30. Aleksey Iguedesman y Hyung-ki Joo mët adum tlassica cun pop y teater. Na sëira de mujiga y matades coche n à dinrer udù. Chertes: te duta la Casses Raiffeisen de Südtirol, tla butëighes Athesia y online sot a www.ticketone.it.
Max von Milland
N juebia ai 25.10. a Stanecia tla Cësa de Cultura dala 20.30. L musicist de Südtirol cun si band prejentea si album nuef "Bring mi hoam". Danora sónel mo la grupa Malù cun Lucia Kastlunger. Chertes: te duta la Casses Raiffeisen de Südtirol, tla butëighes Athesia y online sot a www.ticketone.it.
Blues cun Joe Louis Walker
N vënderdi ai 26.10. a Stanecia tla Cësa de Cultura dala 20.30. La lijënda dl US-Blues per l prim iede te Südtirol. L ie la nuet dl Blues de Steinegg Live cun ghesć coche Nik Lee & The Jingle Fellas, Marco Pandolfi. Chertes: te duta la Casses Raiffeisen de Südtirol, tla butëighes Athesia y online sot a www.ticketone.it.
Finela dl festival "Steinegg live"
Ai 27.10. dala 20.30 tla Cësa de Cultura cun la doi grupes de cësa "VinoRosso" y "The Fonzies" de Bulsan y ala fin mo cun DJ Peter dla ex Eule. Unide a ve devertì, la ntreda ie debant.
Conzerc al teater de Pardac
Al chino de Pardac per la rassegna "MusicAutunno" insnet vender ai 19 de otober da les 21.00 se podarà scutèr Massimo Bubola e sia band con "Da Caporetto al Piave".

Cursc
Decurazions per la fòsses per Unissant
Ai 20.10. dala 14.00 ala 17.00 tla sala dla bibliotech a S. Cristina, cun Jan Moroder dla butëiga Flëures. L ie da se nuté su da Doris al 339 5706444. Metù a jì dal KVW S. Cristina.
Balé per i 50+
Bai de grupa cun mujiga da dut l mond per ëiles y ëi sëura i 50 ani, cun Greti Mussner. Da n lunesc ai 22.10. dala 17.00 ala 18.00 per de ndut 14 iedesc, for de lunesc tla sala Gisela Moroder tla Cësa de Paussa a Urtijëi. Se scrì ite pòssen tla Butëiga dl Mond a Urtijëi. Metù a jì dal KVW Urtijëi.
Curs de cujiné
A 6., 7. y 8.11. per duc i nteressei y chëi che cujina cun pascion. L curs vën tenì da Rudi Pescosta tl restaurant Concordia a Urtijëi y scumëncia for dala 8 da sëira. Uni sëira mpèren a fé n menù da 4 derzedes. Da paië ite iel 90 € y se scrì ite pòssen nchin ai 31.10. da Paul Walpoth, tel. 339 4800706. L possa fé pea al plu 15 persones. Metù a jì dal KVW Urtijëi.
Curs per se njenië ca a parturì
Per ëiles che aspieta y genitores dl daunì, che à l terminn de jené-fauré 2019. L'ancuntedes sarà tla palestra dla Cësa de Paussa a Urtijëi, dai 5.11. nchin ai 10.12.2018 uni lunesc dala 16.00 nchin la 18.00/19.00. Iscrizions: CUPP tel. 0471/457457, 8.00-16.00 da lunesc nchin vënderdi; email vormerkung.bz@sabes.it; ëifoma 0471 797778; assistënta sanitera 0471 794290.
Ginastica de prevenziun
La Uniun dles Ëres d'Al Plan organisëia la ginastica de prevenziun cun Marlene Zingerle. Le curs mët man en mercui ai 24 d'otober dales 18:00, te palestra d'Al Plan y vá inant indöt 8 iadi. Infos y iscriziuns pro Annamaria Complojer al 334/6102551.

Dotors y Apoteches
Dotors
L dutor de servisc te Gherdëina da n sada ai 20.10. dala 8.00 daduman nchin la 8.00 daduman de n lunesc ai 22.10. ie l dutor Aba Fallaha de Sëlva, tel. 0471/794111 o l 0471 797540 o l 333 9593131.
Doturs Val Badia: Le dotur en sorvisc tl fin dl'edema di 20 y 21 d'otober, ti cin' comuns dla Val Badia, é le dotur Guido Caretta, Corvara, tel. 0471/836189 o 337/616080.
Apoteches
L'apoteca che ie de servisc per Gherdëina, ora dl orar ordiner de giaurida, da n vënderdi ai 19.10. nchin n vënderdi ai 26.10. ie chëla de Sëlva, tel. 0471/795142 o 333/1776615, (davierta dala 8.30 - 12.30).
L'apoteca en sorvisc tla Val Badia, fora dl orar ordinar, dal vëndres ai 19 d'otober dales 19:00 al vëndres ai 26 de otober ales 19:00, é chëra da Corvara, tel. 0471/830237.

Avisc
Cunsëies dla Zentrela di Cunsumadëures
Ncuei vënderdi ai 19.10. dala 15.00 nchin la 17.00 sun Plaza Nives te Sëlva, saràl l Mobil dla Zentrela di Cunsumadëures de Bulsan, che vën a dé nfurmazions d'uni sort. Metù a jì dal KVW de Sëlva.
La Crëusc Blancia ve mëina a lité
N dumënia ai 21.10. dala 7.00 nchin la 21.00 ti pieta la Crëusc Blancia a duc i litadëures che ne n'ie nia boni de jì, de se lascé mené debant da cësa nchin tl local de vela y inò ndëur. Chësc servisc muessa unì apustà danora, cherdan su l 0471 444444 (o fax 0471 444370) nchin n vënderdi 19.10. dala 17.00.
Per duta la lies de Gherdëina
La Consulta per la Ntegrazion de Gherdëina y l Servisc Furmazion mët adum n database de duta la lies de Gherdëina, sibe cultureles che sportives, sozieles y n.i. L database da cunsulté unirà metù online tl portal www.manif.it y l unirà nce stampà. Duta la lies ie bele unides cuntatedes per e-mail. Sce vel' lia ne ëssa nia giapà la e-mail, iela prieda bel de cuntaté l Servisc Furmazion per dé ju si dac: tel. 0471 773225, e-mail furmazion.gh@micura.it.
Udiënzes dla Uniun di Ostis
La Uniun di Ostis HGV tëgn udiënzes ince tla Val Badia, vigni secundo y cuarto lönesc dl mëis, dales 16.00 ales 17.00 tla ciasa de Comun a Badia.
Segra de düc
En domënia ai 21 de otober él Segra d'La Pli de Mareo. Cun gran mëssa dales 8:30, y le vëndres sëra, la sabeda sëra y la domënia program profan d'aurela cörta.
Ta Dèlba la cena pureta
Insnet, vender ai 19 de otober vegn endrezà ta Dèlba la cena pureta per didèr Fratel Elio Croce. L'apuntament é te la sala di alpins vejin a la gejia de Sènt Antone da les 19.30.
Corsc de ingleis
La Biblioteca de Sèn Jan endreza corsc de ingleis dai 29 de otober ai 28 de november. La lezions sarà de lunesc e de mercol: h. 19.00-20.30 l cors per prinzipianc e h. 20.30-22.00 l cors mesan. L cost l'é 70 euro per i sentadins de Sèn Jan e 90 per i etres. Info te biblioteca, tel. 0462.763062, mail: vigodifassa@biblio.infotn.it.
A Poza marcià del Ski Team Fascia
Doman, sabeda ai 20 de otober te Oratorie de Poza, l Ski Team Fascia endreza n picol marcià de roba durèda. Da les 9 a les 14 pel vegnir consegnà l material e dut l dì se pel jir a se tor la roba. Via per l domesdì castagnes e most per duc.
Regoeta fer veie te Fascia
Doman, sabeda ai 20 de otober, i volontadives di gropes miscionaries Freinademetz e Mato Grosso i passa a Vich, Poza, Pera, Soraga, Mazin, Ciampestrin e Fontanac a tor sù fer veie e metèi per didèr la miscions. I passa ence ti etres paìjes de Fascia o su apuntament chiaman Pietro al 338.1125392 o Franco al 335.5956009.
A Cianacei na scontrèda su la ferates
La sociazion Transdolomites endreza en mèrtesc ai 23 de otober da les 17.00 te chino Marmolèda de Cianacei na sera de informazion su la fatibilità e la sostegniboltà economica de la neva ferates te la Dolomites: la Trent-Penìa e la Busan-Cortina.
L Moviment Ladin de Fascia se prejenta
L Moviment Ladin de Fascia prejenta si candidac e so program per la litazions di 21 de otober. Insnet vender ai 19 de otober ultim apuntament da les 20.30 te sala del Consei de Comun de Sèn Jan a Poza.

Sozial
Con la Lilt a Ciavaleis
La Lilt, delegazion de Fascia e Fiem, dedica l meis de otober a la campagna 2018 per la diagnosa e la terapìa contra l tumor al piet. En mèrtesc ai 23 de otober da les 20.30 te biblioteca de Ciavaleis vegn endrezà na sera de informazion con i dotores Marco Cristofolini, Marco Pellegrini, Paola Bondioli e Guido Piazza.
Portel de referiment sozièl
Ogne mercol da les 16:00 a les 18:00 te strèda di Pré de Lejia a Sèn Jan per endrez del Comun general de Fascia vegn metù a jir n portel de referiment sozièl avert a duc e no a paament.
Ge vel se prenotèr. Per aer informazions chiamèr l 370.3004296 o scriver a sportello.lerais@gmail.com
Scontrèdes del DSA Trentin
L DSA (Desturbes Spezifics de l'Aprendiment) de Fiem e Fascia endreza n'outa al meis scontrèdes de aprofondiment sun empedimenc spezifics de l'aprendiment. Ai 7 de november la pedagogista Sonia Boschetto rejonarà del Pian Didatich Personalisà te la sala Spazio Giovani de la Scola populèra de Pardac.
Deberieda: jì a spaz y törggelen
Ncuei vënderdi ai 19.10. dala 14.00 se ancónten dan la Cësa de Paussa a Urtijëi per jì ora l Pedrutscher a S. Piere a törggelen. "Deberieda" ie na grupa per se ancunté danter persones che à problems psichics o de sozialisazion cun ulenteres. Per nfurmazions tel. 0471 798015. (Respunsabla dla manifestazion: Marlies Piazza).

Temp lede
"Festa Steinegg Live"
N dumënia ai 21.10. dala 10.30 inant tla cësa de cultura de Stanecia, festa cun lianies blances y pier de selin, bal dl domesdì y program per mutons, cun la "Südtiroler Tanzlmusig", i "Goldrieder" y "Bobby-Live".
Törggelen cun i Jëuni dla Lia da Mont y i Jëuni de Sëlva
Nvion bele śën al Törggelen urmei cunesciù n sada ai 10.11. S'ancunton dala 18.00 dala Betula a n aperitif y furnon cun la curiera de linia dala 19.30 ora Solaion per jì dal Putzerhof. Dala 1.00 uniràl i taxi a nes menerà, chiche uel a Laion al Schmierberball, o de reviers te Gherdëina. Per chëi che vën cun diendl o brea de pel iel da paië 35 € per la cëina cun vin y ega y taxi, per i autri 40 €. Pudëis ve scrì su da Daniel (3339454642) o Karin (3924387958) o da zachei di doi cunsëies nchin ai 7.11..
De dles biblioteches 2018 - presentaziun
En gaujiun dl De dles biblioteches 2018, inviëia la Biblioteca Sas dla Crusc da gní a ti ciaré a n teater de ambries por mitans y mituns, indoman sabeda ai 20 d'otober dales 15:00, te biblioteca a La Ila.

Religion
Edema dla Fede: Nia de parora
Incö vëndres ai 19 d'otober dales 20:00, te dlijia da La Val. Presentaziun dla pasciun. Ciara ince info cun foto a pert.
Edema dla Fede: conzert
Indoman sabeda ai 20 d'otober dales 20:00, te dlijia da San Martin. Al cianta i cors de dlijia da San Martin, La Ila y Lungiarü, y ince le Cor Ëres Al Plan.
Edema dla Fede: conclujiun
En domënia ai 21 d'otober dales 17:15 s'incunton a Badia por jí en prozesciun cun ciandëres cina Oies. Lassö dales 18:00 funziun de conclujiun.

Iadi, jites y escurscions
Viade a Mantova con la Comunanza Ladina de Bulsan
En domenia ai 28 de otober 2018, con partenza da les 7:30 da la senta dla Comunanza Ladina tla streda Roen nr. 6. Iade cultural y recreatif tla zité vedla UNESCO.
Prenotazions y ifnormazions pro: tel. 0471 983687 o 346-3520845 (Ivan Lezuo) da mesdí o do les set da sera.

Mostres y Ert
Mostra "n memoria" dl scultëur Vinzenz Peristi
Chëst ann iel avisa 75 ani ca che l scultëur Vinzenz Peristi ie mort. Per chësta ucajion vëniel metù a jì tl Tublà da Nives te Sëlva na mostra n si memoria, che ie da udëi nchin ai 4.11. da merdi nchin dumënia dala 16.00-19.00. De sada y de dumënia iela nce davierta danmesdì dala 10.00-12.00. N Unissant iela stluta.
Luis Piazza y Raimund Mureda
L Museum Gherdëina nvieia a unì a ti cialé ala mostra per i 110 ani dala nasciuda di doi artisć y per i 60 ani dla Lia dl Museum, cun i doi artisć che fova danter i fundadëures. La mostra tla Cësa de Cultura a Urtijëi ie da udëi nchin ai 28.10. da lunesc nchin vënderdi dala 10.00-12.00 y 15.00-18.00 y de sada y dumënia dala 10.00-12.30.
"Mudamënc de perspetiva"
Clara Mayr (Südtirol), Christoph Fuchs (Svizra) y Marc Risch (Liechtenstein) ie i trëi artisć che à venciù l ann passà l segondo Symposium nternaziunel de scultura sun Ciampinëi y prejënta te chësta mostra lëures da na gran tenscion. La mostra resterà davierta nchin ai 25.10. uni di dala 10.00-12.00 y 16.00-19.00. De lunesc iela stluta.
Ert cuntemporana tla dliejes
Ivan Lardschneider, AliPaloma & Daniele Alessi, Marianna Gostner, Thomas Huck, Giancarlo Lamonaca mët si ert te cin dliejes dla Val dl Isarch: la dlieja de Ciastel, chëla de Milland, la dlieja de S. Bastian a Tluses, chëla de Jevun y de Laion. Tl medemo tëmp iel nce na mostra n chësc cont tl Museum dla zità de Tluses che ie da udëi nchin ai 30.11. da merdi nchin sada.
Fazions de bënulëi
La mostra de pitura "affective effects" di artisć Philipp Messner, Dejan Dukic, Julia Frank y Martina Steckholzer, tla Galaria Ghetta a Puntives Sud 8, cureda da Sabine Gamper, ie da udëi nchin ai 30.11. da merdi nchin vënderdi dala 15.00 ala 18.00 o scenó cherdan su danora l numer 366 1500243.
"act" de Helmar Demetz
La mostra de opres d'ert de Helmar Demetz de S. Cristina ie da udëi nchin ai 1.11. tl Café Surëdl a Urtijëi tla streda Roma, da lunesc nchin sada dala 10 ala 19.
Matthias Sieff a Riva del Garda
L zipiador fascian Matthias Sieff met fora sia operes a Riva del Garda te la Sala Civica "G. Craffonara" Giardini di Porta Orientale. L'esposizion, dal titol "Antichi caratteri contemporanei" resta averta enscin ai 31 de otober, duc i dis h. 10.00-13.30 e 17.00-20.30.
Oraries del Museo Ladin de Fascia
La senta zentrèla del Museo Ladin de Fascia a Sèn Jan resta averta enscin ai 31 de otober, con l'orarie da d'uton: dal mèrtesc a la sabeda da les 15.00 a les 19.00.

Prejentazions
Liber per mutons "Flurina y l ucel salvere"
N mierculdi ai 24.10., n ucajion dl „Di dla biblioteches", prejenterà la Union di Ladins de Gherdëina chësc liber per mutons tla biblioteca ladina „Anda Malia da Cudan" tla Cësa di Ladins dala 17.00 nchin la 18.00.
"Stories di fredesc Grimm"
N juebia ai 25.10. dala 16.30 tla Bibliotech O.v. Wolkenstein prejentazion dl liber cun la diesc stories plu cunesciudes di fredesc Grimm y ilustreda da studëntes dl Lizeum d'Ert Cademia, dat ora dala Union di Ladins de Gherdëina.
Di dla biblioteches – Autores jëunes se prejënta
N vënderdi ai 26.10. dala 20.30 tla Bibliotech S. Durich a Urtijëi. Nadia Rungger, Nadia Unterfrauner, Magdalena Ferdigg, Carmen Ramoser, Anna Maria Parteli: cin autores de Südtirol, te chëles che la pascion per l scrì ie rujënt sciche na lum tl scur, lijerà dant ntan na sëira cun mujiga ora de si libri y scric.

Galaria retrac