Manifestazions atuales speziales

Data

19 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 19 de otober
Melissa Naschenweng al Bal dla Jonëza da Paur
La Jonëza da Paur de Badia inviëia a so bal, la sabeda ai 27 d'otober, tla Ciasa J. B. Runcher a San Linert
Ai 27 d'otober dales 20:30 inant, organisëia i Jogn da Paur de Badia tl salf dles manifestaziuns le Bal dla Jonëza da Paur, en chësc ann cun na gran novité. Fora por la nöt ne sonará nia ma le grup "Wolayersee Echo", mo al sonará y ciantará ince la ciantarina Melissa Naschenweng dl'Austria, consciüda te döt le raiun todësch y dala televijiun. Ince por i jogn sarál Dj Elf che se crüzia da mëte sö de bela musiga.
Al é incé la poscibilité da gní a cëna. Por resservé na mësa, pón cherdé sö Verena al nr. 346/0102118
Al se fajess plajëi da podëi ves saludé cun la braia de coran o le diendl.

Reggae y hip hop ladin y talian tl SaJ.un
Ai 2 de novëmber él tl zënter Saj.un a La Ila le conzert dl pröm vëndres, en chësc iade cun le jonn d'Al Plan Daniel Zardini y i Rebel Rootz
Le jonn d'Al Plan Daniel Zardini (en ert Ethnic Techniques), presentëia ai 2 de novëmber so repertore rap y de improvisaziuns por talian y todësch. Al laora sciöche chelner y ciafa te so laur cun la jënt ispiraziun por süa musiga y sü tesć. Al á metü man cun le scrí poesies, tolon ejëmpl da so berba Paul. Al á spo conesciü le monn dl hip hop y dl reggae y á sintí le debojëgn da dé so contribut sciöche persona y sciöche ladin.
Rebel Rootz é n grup musical nasciü dl 2010 a Trënt. I sis musizisć fej composiziun y sona cianties de stil reggae, dance hall, dub, ska y rock. Dl 2012 ái dé fora süa pröma CD dal titul "Radice Ribelle", dl 2014 l'album "Sotterraneo". Ai á soné sön de gran palcs de cités talianes y pro conzerc sciöche "Train to Roots", "Mellow Mood" y al "Venice Sunsplash 2013". Tla Val Badia ési conesciüs do avëi tut pert al OpenAir Gadersound 2018.

Sëres d'informaziun tl Saj.un
Le Sorvisc ai Jogn Val Badia inviëia a n'edema de formaziun, tl Zënter dla Jonëza y dla cultura Saj.un a La Ila. Le program
23.10.2018 dales 19:30: Se mëte autonom (selbstständig): La comerzialista Jelena Comploi spliga ci che al ó ester por mëte sö na ativité y se mëte autonoms.
24.10.2018 dales 19:30: Acomapagnamënt tla plüra: la referënta Gabriela Mair am Tinkhof dá informaziuns d'öga sön co acompagné porsones te süa plüra.
25.10.2018 dales 19:30: Comportamënt a risch di jogn - danter devertimënt y prigo (en colaboraziun cun le Consëi de Formaziun da Badia): cun Wolfgang Hainz (Forum Prevenziun) y colaboradësses dl Sorvisc por les dependënzes da Bornech. La jonëza pé se möie gonot te situaziuns de prigo. Nia dagnora ne n'é les gaujes de chësc comportamënt tleres; geniturs y gragn se crüzia y é malsigüsc sön co che ai dess se comporté te chëstes situaziuns. Chësta sëra vëgnel analisé le comportamënt a risch di jogn, án jará ite sön le consum de sostanzes y sön les poscibilités por geniturs da ti jí pormez a chisc momënc.
26.10.2018 dales 19:30: Sessualité* Atramënter!? Tobias Stampfer cunta de süa esperiënza de vita. Acompagnamënt dl Dr. Edmund Senoner – psicologh
27.10.2018 dales 16.30 ales 18.30: Domisdé de pröm aiüt por mituns y jogn: le grup di jogn dla Crusc Blancia Alta Badia mostra ci fá tl caje de emergënza.

"Nia de Parora" - la pasciun a La Val
L'Uniun Teater La Val adöm al Cor de Dlijia da La Val porta sön paladina la storia dla Pasciun de Gejú, cun situaziuns y personaji dal stamp modern
Le toch, dal todësch "Die Ungetreuen - Eine Jüngerpassion in fünf Akten" de Karl Herbst, é gnü traslaté tl ladin da Matteo Rubatscher, ince ideadú dl proiet y regist. Adöm cun Sylvia Costabiei, Anna Deiaco y Carlo Suani ál lauré sön la dramaturgia dl toch y porté la storia dla Pasciun te nosta realté: le test resta chël dl teater de Herbst, mo les situaziuns y i personaji dess avëi n stamp modern.
La storia ciafa corú, profondité y intensité tres les cianties fora dl "Messias" de Georg Friedrich Händel, che gnará portades dant dal Cor de Dlijia da La Val cun n ensemble baroch sot ala direziun de Elio Clara. Intratan n workshop cun la balarina y coreografa Anastasia Kostner á le cor colié adöm musiga, movimënt y contignü dla storia. Ursula Tavella á dessigné scenografia y costüms, Julian Marmsoler é responsabl dl design dles löms, le tonn é tles mans de Benni Valentin.
Les rapresentaziuns é te dlijia da La Val. Premiera incö vëndres ai 19/10 dales 20:00, les atres rapresentaziuns é: domënia ai 21/10 dales 16:00, jöbia ai 25/10 dales 20:00, sabeda ai 27/10 dales 20:00 y domënia ai 28/10 dales 16:00. I posć n'é nia numerá. Les chertes vëgn venüdes n'ora dan les rapresentaziuns. Informaziuns al 333/8236384.

"4 ëres sot önn en tët"
Chësc é le titul dl teater da ri che chi da La Pli de Mareo porta sön paladina chësc altonn
Le Teater La Pli inviëia dër bel da gní a ti ciaré al teater da rí "4 ëres sot önn en tët", tut dal toch original "Hier sind sie richtig" de Marc Camoletti y porté tl ladin mareo da Hansi Comploi, che á ince la rejia. Sön paladina jobelnëia Caroline Huber, Heidi Ploner, Anna Mühlmann, Annemarie Mühlmann, Elmar Winkler, Simon Willeit, Marco Comploi y Alex Daverda. La premiera cun renfrësch é en domënia ai 28 d'otober dales 15:00. Les atres rapresentaziuns é en sabeda ai 3/11 dales 20:00, domënia 4/11 dales 15:00, vëndres 9/11 y sabeda 10/11 dales 20:00, tres te Ciasa dles Uniuns a La Pli. Prenotaziuns al 331/7642806; les chertes vëgn ince venüdes n'ora dan le teater.

"I Ladins dles Dolomites", cun Simon Kostner
Döes serades a San Martin y Corvara, te chëres che le cabaretist y joblere cunta nosta storia te na manira particolara
Sön iniziativa di Consëis de Formaziun dla Val Badia, vëgnel metü da jí tla Val Badia deplü serades cun le cabaretist y joblere Simon Kosnter, sot al titul "I Ladins dles Dolomites - Simon Kostner cunta la storia de na identité". Chisc i apuntamënc: en mercui ai 24 d'otober dales 20:00, tl salf dl Istitut Ladin a San Martin de Tor; en jöbia ai 25 d'otober dales 20:00, tl salf dles manifestaziuns da Corvara.

Conzert cun cater cors de dlijia
La seziun "Musiga" dl'EPL-Ert por i Ladins inviëia chësta sabeda, ai 20 d'otober 2018, dales 20:00 te Dlijia da San Martin de Tor
L'EPL-Ert por i Ladins inviëia en sabeda, ai 20 d'otober 2018, dales 20:00, a San Martin de Tor a n conzert sacral tl cërtl dla Edema dla Fede. Al cianta chisc cater cors de dlijia: cor de dlijia da San Martin de Tor, cor de dlijia da La Ila, cor de dlijia da Lungiarü
y Cor dles Ëres d'Al Plan.

L'osteoporosa y les maraties reumatiches
Aspec de varijiun, prevenziun y terapia. Sëra de informaziun cun i doturs Giuseppe Zampogna y Elisabeth Pizzinini a La Ila
En mercui, ai 24 d'otober 2018, dales 20:00, gnaral metü da jí sön iniziativa dl Consëi de Formaziun de Badia a La Ila tla Scora mesana na serada de informaziun cun le dot. Giuseppe Zampogna y la dra. Elisabeth Pizzinini söl'osteoporosa y les maraties reumatiches.
Te Südtirol él milesc de porsones, jones y manco jones che á mai gaujá da romatisc. Sce an vá adora assá dal dotur pón gonot ciafé na soluziun, mo sce an aspeta massa dî spo devënta chisc mai maraties croniches. Le referat ó informé la jënt sön l'osteoporosa, i risć y la prevenziun.

"Cunté y dé inant la storia"
Mëisa turonda cun Leander Piazza, Adriano Sommavilla, Gregor Prugger, Markus „Mec" Schenk, Gretl Senoner, Manfred Mureda y Egon Moroder Rusina, n vënderdi ai 19.10. dala 20.00, basite te Cësa di Cungresc a Urtijëi
Per l proiet "Ti dé tëmp al tëmp" vëniel metù a jì na manifestazion ulache l unirà cuntà de lecorc ntëur ala generazion dl '68. L sarà na mëisa turonda propi amesa la mostra che ie ntan chisc dis cun lëures de bera Luis Piazza da Cudan y bera Raimund Mureda per i 60 ani dla Lia Museum Gherdëina. Muderadëur dla sëira ie David Lardschneider.
Coche i doi artisć bera Luis y bera Raimund ova messù y sapù da jì pea cun i gran mudamënc che ie stac te puec dejeneies, iel propi la generazion ntëur al '68 che tira na rissa da una na pert cun l passà, ma che fej pona su la fundamëntes per l daunì, sambën tl'ert ma pona nce tla pert soziela y politich-ideologica. L se trata de na ucajion per pensé do a cieche n se ova tëut dant ntlëuta, y coche dut se à mudà te chisc cincant'ani. Ie pa dut unit miec o piec? Duc ie nviei de cuer a unì a scuté su!