Manifestazions atuales speziales

Data

02 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 2 de november
"4 ëres sot önn en tët"
Chësc é le titul dl teater da ri che chi da La Pli de Mareo porta sön paladina chësc altonn
Le Teater La Pli inviëia dër bel da gní a ti ciaré al teater da rí "4 ëres sot önn en tët", tut dal toch original "Hier sind sie richtig" de Marc Camoletti y porté tl ladin mareo da Hansi Comploi, che á ince la rejia. Sön paladina jobelnëia Caroline Huber, Heidi Ploner, Anna Mühlmann, Annemarie Mühlmann, Elmar Winkler, Simon Willeit, Marco Comploi y Alex Daverda. Le teater vëgn ciamó presenté indoman sabeda ai 3/11 dales 20:00, domënia 4/11 dales 15:00, vëndres 9/11 y sabeda 10/11 dales 20:00, tres te Ciasa dles Uniuns a La Pli. Prenotaziuns al 331/7642806; les chertes vëgn ince venüdes n'ora dan le teater.

Referat sön co mené reuniuns, y sentada generala
Sentada generala dl Consëi de Formaziun cun referat de Alex Ploner, en jöbia, ai 8 de novëmber 2018, dales 20:00, a La Ila tla Biblioteca
Tratan la pröma pert dla sëra gnarál porté dant n referat dal titul: „Tigní na sentada o porté n salüt da pert de na uniun" cun le referënt Alex Ploner. Le referat é ponsé por dötes les uniuns. Al gnará dé consëis pratics, adatá ince a porsones che ne baia nia ion dan da jënt.
Tla secunda pert dla sëra gnarál tigní la sentada generala dl Consëi de Formaziun de Badia. Dötes les uniuns dl Comun de Badia é dër bel inviades da tó pert ala incuntada, olache al gnará ince porté dant l'ativitè dl Consëi de Formaziun y aprové le bilanz dl ultim ann.

"Qualcuno volò sul nido del cuculo"
A teàtro con "Ra Filodramatica d'Anpézo"
Sto outón ra Filodramatica ra torna in šèna con un teatro par zivil adatà da Martino Apollonio Varentin da un testo inglese de Dale Wasserman voltà par talian da Giovanni Lombardo Radice. Sul palco se moarà na ventina àtore ogade da Martino Apollonio Varentin, che l'è tornà a me dià na man, e dapò i n' è outretante che no sé vede ma che i s'à dà fei par podè ruà in šena. 'L è un toco anbientà inze un manicomio che feš pensà sóra. Ra prima ra sarà ai 10 de noènbre da res 9 da daséra, ai 11 de noènbre da res 4 dapò dišnà, ai 14, 16 e 17 de noènbre senpre da res 9 da daséra. El vegnirà fato inze ra Sàla da teàtro "Alexander Girardi" in Anpézo. I biliete pò èse fisàde al 3332707943 dapò res 6 da daséra. Ve špetón dùte cuànte.

Cent ani dala fin dla Gran Viera
Festa n lecort di tumei dla prima viera mundiela, n dumënia ai 4.11. a Urtijëi
L Chemun de Urtijëi deberieda cun la Pluania y la cumpania di Scizeri de Urtijëi nvieia duta la cumenanza a na pitla festa de cumemorazion per i tumei dla Gran Viera, n dumënia ai 4 de nuvëmber:
dala 9.00 S. Mëssa per i tumei de duta la vieres cun i ciantarins dl Cor de Dlieja y strumënc a fla, dala 9.45 dan la Capela di Tumei, mumënt de reflescion sun i duei dla viera, sun la suferënza y la fam che nosta jënt a patì y l valor dla pesc.
Per chësta ucajion y n unëur di 96 jëuni tumei ntan la viera à l Chemun, la Pluania y la cumpania di Scizeri de Urtijëi nce lascià derturé su la Capela di Tumei y à lascià fé na tofla de cumemorazion cun la scrita: n lecort 1918 – 2018.

Dolomitale: l gran Filmfestival
Dai 8 ai 11 de nuvëmber tl Circolo/Lia Mostra d'Ert a Urtijëi
Cun l film dl reghisser de Gherdëina Martin Prinoth "Die fünfte Himmelsrichtung" vëniel giaurì n juebia dala 20.00 l filmfestival. Ti trëi dis do saràl da udëi na bela lingia de films, documenteres y films curc, n vënderdi bele 8 daduman inant y n sada y dumënia dala 14.00 inant, cun danter l auter n cuncors de films curc n sada dala 16.00.
Masterclass n sada dala 14.00 cun Natalie Halla dl'Austria, produtëura de films, che cunterà coche l vën a s'l dé n film per l chino, cun na udleda do la cultrines de si film "Life in four Elements".
Party, brunch y Museum: n sada dala 10.00 "Filmbrunch" cun l mesun de rujené cun reghisseres, produtëures, autores pra velch da pesslé y dala 22.00 inant gran party cun i Madax. N vënderdi vijita debant tl Museum Gherdëina.
Priejes: 18 € per duc i 4 dis, 9 € per un n di, 5 € per un n film (priejes lascei do per cumëmbri dl VKE, dla ULG y dla Lia Mostra d'Ert, persones cun handicap, jëuni nchin a 21 ani, studënc nchin a 26 ani y nce per chiche compra l abunamënt dan i 5.11.). Chertres danora sot a www.dolomitale.com/#tickets. (cëla nce articul a pl. 11)

Cunzert de S. Zezilia dla Mujiga de S. Cristina
N dumënia ai 11 de nuvëmber dala 5 domesdì te sala de chemun
La Mujiga de S. Cristina nvieia de cuer a unì a scuté su l cunzert de S. Zezilia, per chël che n à mparà ite sot ala bachëta dl dirighënt Christian Hofer n program da na bela variazion, che va dala marces tipiches per mujiga da banda, a ouvertures y nce vel' pez modern. Tres la sëira menerà Elena Mussner. Tla prima pert saràl da audì l "Hochachtungsmarsch" de H. Pixner, l "Kaiserwalzer" de J. Strauss, la "Mazury Rhapsody" de A. Bösendorfer y l "Florentiner Marsch" de J. Fucik. Do na pitla pausa jiràla inant cun la "Overture to Trish" de E. Huckeby, "The symphonic Gershwin", ora dl film Star Wars "The last Jedi" de J. Williams, per stlù ju cun la Polka "Im Wäldchen" de K. Sejk.
L presidënt Andreas Perathoner cun duc i cumëmbri dla Mujiga se ncunforta che unieis a scuté su.

"La roda dl tëmp"
N vënderdi ai 9 de nuvëmber dala 20.00 te Tublà da Nives
Ntan chësc ann à i Cunsëies de Furmazion de Gherdëina metù a jì l proiet "Ti dé tëmp al tëmp", ulache l ie stat de plu manifestazions y scumenciadives ntëur a chësc argumënt atuel y de mpurtanza per duc canc. Śën iesen ruvei ala fin de chësc proiet y sciche ultima manifestazion vëniel metù a jì na sëira de descuscion che va sot al "Forum Sëlva" y che à l titul "La roda dl tëmp". Trëi generazions se anconta y conta de si esperienzes de vita y plu avisa puderàn audì bera Tobia Insam da Paratoni (87 ani), Marco Forni de Sëlva (57 ani) y Valeria Mussner de Sëlva (23 ani). Moderadëur dla sëira sarà Vinzenz Senoner. Duc ie nviei de cuer a unì a scuté su! L vën metù man dala ot da sëira.

"Windkraft" y "I Virtuosi Italiani"
I doi ensembles sarà da audì deberieda cun la ciantarines Erika Mussner y Priska Malsiner, n juebia ai 8.11. dala 20.30 te dlieja de Sëlva
Pra chësc segondo cunzert di Jëuni de Mujiga de Gherdëina saràl nce la doi ciantarines Erika Mussner de Sëlva y Priska Malsiner de Urtijëi. Ëiles à bele ciantà pra sëires de "Lieder" y nce te plu operetes y opres. Erika cianterà pra chësc cunzert „Folk Songs" de plu paejes, adatei da Luciano Berio. Ëila sarà da audì cun i Windkraft, n ensemble de mujiga nueva, cun musicisć dl Südtirol y dl Tirol dl Nord che sona strumënc a fla de lën y de banda. Priska Malsiner cianterà pec ora dla 4. Sinfonia in sol magg. de Gustav Mahler cun i Virtuosi Italiani, n ensemble de mujiga da camera scialdi cualificà y atif, che à nce tëut su scialdi sun plates y CDs.

Fotoclub Val Badia: mostra y premiaziun
La sabeda ai 10 de novëmber vëgnel tigní la premiaziun dl concurs de fotografia y daurí la mostra cun les plü beles fotos
Le Fotoclub Val Badia á le plajёi de ves invié, en sabeda ai 10 de novëmber dales 18.00, tl Istitut Ladin "Micurá de Rü" a San Martin de Tor, ala daurida dla mostra y premiaziun dl concurs dal tema "Architetöra tla Ladinia y fora por le monn". La mostra restará daverta cina en vëndres ai 23 de novëmber, tratan i orars dl Istitut: dal lönesc ala jöbia 10:00 - 12:00 y 15:00 - 17:00, le vëndres dales 10:00 ales 12:00.

Marcé dl cufer a Corvara
En domënia ai 11 de novëmber dales 10.00 ales 17.00
La Uniun dles Ëles da Corvara organisëia n marcé dl cufer, cun mostra y poscibilité da cumpré de bel patüc fat a man. Le marcé vëgn tigní en domënia ai 11 de novëmber dales 10:00 ales 17:00, tl salf dles manifestaziuns da Corvara. Al sará ince n pice renfrësch - cun spënora lëdia che jará a bëgn dl'assoziaziun Comedicus.

La vintejima dl Rait
Le Rait de San Linert dles valades ladines festejëia so 20ejim aniversar
En domënia ai 4 de novëmber vëgnel tigní la 20ejima ediziun dl Rait de San Linert dles valades ladines, cun plü co 130 ciavai. La festa mët man cun la santa mëssa dales 9:00 tla dlijia de Badia en onur de San Linert. Dales 10:45 podarán odëi la defilada da Pedraces cina a San Linert, a chëra che al tolará pert ciavai haflinger y norics dles valades ladines y da deplö perts de Südtirol. Sön un di ciars podaran amiré la statua de San Linert, patronn dl paisc y protetur di ciavai y por le pröm iade ince n model en miniatöra dla dlijia de Badia, fat dai artejans dl post. Al rait tolará pert ince i davagnadus de sis raic "Oswald von Wolkenstein", le team Haflinger dl OVW Ritt, le campiun talian y europeich de gares cun ciavai y gücia Hannes Weitlander, la Ungarische Post cun ciavai norics, Norbert Rier, sciöche ince n ciar dla Forst. Dl intratignimënt musical sides tratan la defilada che ia por le de da festa se crüzia les musighes de Badia, da Pichl Gsies y da Vich, sciöche ince le Bal Popular Val Badia. Sambëgn ne manciará nia le cor de dljia, i ministranc, la jënt cun i guanc da zacan, le degan siur Iaco Willeit y l'ombolt Iaco Frenademetz a ciaval.
Le Rait de San Linert é dantadöt ocajiun por perié do la benedisciun di tiers y sü patruns. Dedô sarál i ciavai dla raitadoia Teresa che fej na show, acompagná dai sonns dla Müjiga de Badia te ciamp dal sport y implü án la poscibilité da se cumpré val' produt local, venü dales patrones y da chëres dala troht. La festa jará inant sides tla ciasa dles uniuns a Badia co tla tënda, olache al vëgn dé fora spezialités gastronomiches dales uniuns di paurs, dai stödafüch y dala musiga de Badia. Domisdé sarál la Böhmische de Badia y da sëra le grup "Tiroler Burschn" che sona y al gnará ince dé fora ciastëgnes. La manifetaziun vëgn tignida da vigni tëmp.
Por le sostëgn finanziar dla manifestaziun vëgnel rengrazié le Comun de Badia, l'Assoziaziun Turistica de Badia, la Cassa Raiffeisen Val Badia, la dita Forst, la uniun di ciavai halfinger y norics y düc i atri sponsors.

La Ila: rapresentaziuns teatrales
L'Uniun Teater La Ila é tl laur da arjigné ca la comedia "Madër nia jí ala nia" (tut dal orginal "Der entführte Selbstmordeinbruch") de Wolfgang Bräutigam. La rejia é de Erika Castlunger
Na dita de costruziun é tl laur da jí ala nia y düc se proa da ciafé na soluziun por trá ite scioldi y al nasc n gröm de incomprenjiuns y confujiun. Sön paladina él da odëi: Ellen Alfreider, Alessandro Bonfanti, Andrea Bonfanti, Marco Moscon, Andy Pizzinini, Chiara Pizzinini, Roland Pizzinini, Sabine Rudiferia, Tobias Stampfer y Cindi Vittur.
Les rapresentaziuns é sabeda 3, domënia 4, mercui 7, sabeda 10 de novëmber dales 20:30, y domënia 11 de novëmber dales 15:00, tla Ciasa dla Cultura a La Ila. Prenotaziuns al 333/2525740.

La familia y les ciafes dl mal
A Oies na incuntada y n referat cun le prof. Diego Manetti, moderadú de Radio Maria
En vëndres ai 9 de novëmber rovarál adalerch a Oies le prof. Diego Manetti, moderadú de Radio Maria, por na incuntada particolara. An mët man dales 19:00 cun na santa mëssa y dedô sarál spo le prof. Manetti che tëgn n referat por talian dal titul "Dono - Amore: la famiglia e la grande seduzione del male".

Na serada de bal, de gala... n pü' atramënter!
Ai 10 de novëmber a La Val, organisada dal Cor dles Ëres d'Al Plan adöm cun le Cor Raiëta da La Val, cun le sostëgn de Badiamusica
Na sëra plajora cun musiga da salon de na orchestra de 20 porsones che sona archëc y stromënc a fle. Döt cant te n ambiënt da sté saurí, decoré cun savëi, na cëna che plej, n gote de bun vin cun jënt vistida da festa. La musiga fina, la Wiener Tanzmusik, lascia ince pro che an pois s'la cunté, mo suradöt che an pois balé, n iade n pü' atramënter cun saú; an podess feter dí da Opernball, por se lascé porté sön les notes di walzer. Por chi che é gnüs coriusc, é le de da scrí sö la sabeda ai 10 de novëmber dales 19.00 inant, tl salf dles manifestaziuns a La Val. Le Cor dles Ëres d'Al Plan adöm al Cor Raiëta da La Val, cun le sostëgn de Badiamusica, s'á ponsé fora na iniziativa nöia, organisada plü sigü por le pröm iade tla Val Badia. Tl prisc de entrada ala portada de düc, sarál n aperitif lapró. Les chertes pó gní apostades al numer de telefon 349/2303591. Gnide tröc!