Manifestazions atuales

Data

30 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 30 de november
Musiga
N conzert per Mina
Doman, sabeda al prum de dezember da les 18.30 al PalaFiemme de Ciavaleis vegn endrezà l conzert "Pentagrammawinds & Mina" con i laboratories de la scola de musega Il Pentagramma.
Cunzert de S. Zezilia dla Mujiga da Bula
Duman sada ai 1.12. dala 17.00 te dlieja da Bula. Sot ala bachëta de Caroline Hempel sunerà la Mujiga i pec "Puttin on the Ritz", trëi Choräle de J.S. Bach, la "Overture from Water Music", "Conquest of Paradise", "Lord of the dance", "Carmen Fantasy" y "Virginia" per stlù ju cun "Hymne á la Musique". Duc i ie nviei a unì a scuté su.
Cunzert "Lux" lum y speranza
Duman sada ai 1.12. dala 20.30 tla dlieja de S. Cristina cunzert cun l cor dl'ëiles dla Ladinia "Ladinia Women's Chorus" che cianterà sot ala bachëta de Martin Runggaldier y cun acumpaniamënt de Eva Vinatzer al tlavier. Ntreda cun dunfierta liedia.
Conzert d'Advënt: "A Betlehem söl iade"
En domënia ai 9 de dezëmber dales 17.00, tla dlijia de Badia. Cun: "Cor Kerygma & compagns" sot la direziun de Agnes Irsara (i compagns é n grup de ëi che cianta cun le Cor Kerygma); i "Turmbläser" de Badia sot la direziun de Fridl Pescoller; Ermes Costa da Calfosch (campiun mondial da soné i orghi da man), y n grup de archëc sot la direziun de Fridl Pescoller. Monica Nagler portará dant tesć meditatifs.
Meludies d'Avënt sun l Marcià da Nadel a S. Cristina
N sada ai 1.12. dala 17.00 ala 18.00 sunerà l CDJG Brass Quintett.
N dumënia ai 2.12. dala 17.00 ala 18.00 saràl da audì l Cor Sasslong. N sada ai 8.12. for dala medema ëura saràl da audì l Cor di Jëuni de Urtijëi y n dumënia ai 9.12 suneràl i Acajo.
Meludies d'Avënt sun l Marcià da Nadel a Urtijëi
N dumënia ai 2.12. dala 11.00 tl raion da jì a pe cianterà la grupa "De Cater". N vënderdi ai 7.12. dala 11.00 sun Plaza Stetteneck saràl da audì la "GeigenmusiG" y dala 17.00 te dlieja dl cor di ëi "Raetia". N sada ai 8.12. dala 11.00 suneràl i corni da mont Ladinia y n dumënia ai 9.12. dala 11.00 l duo dala baghes "Victor y Paolo" y dala 17.00 l cor de ëiles "Quilisma".
Cunzert d'Avënt dla grupa "Cordes y Butons"
N dumënia ai 9.12. dala 17.30 te Tublà da Nives te Sëlva cunzert cun prejentazion de na CD dla grupa metuda adum da Reinhilde Gamper - zitra y cianté, Tamara Gamper - vidula y cianté y David Moroder armonica Steirische. La ntreda ie debant.
Meludies d'Avënt sun l Marcià da Nadel te Sëlva
N sada ai 8.12. dala 17.00 nchin la 18.00 puderàn scuté su la meludies sunedes dal CDGJ Brass Quintett.

Dotors y Apoteches
Dotors
L dutor de servisc te Gherdëina da n sada ai 1.12. dala 8.00 daduman nchin la 8.00 daduman de n lunesc ai 3.11. ie la duturëssa Micoli Barbara de Sëlva, streda Nives 2, tel. 351 5544347.
Doturs Val Badia: Le dotur en sorvisc tl fin dl'edema di 1. y 2 de dezëmber, ti comuns de Corvara, Badia y La Val, é le dotur Alberto Caretta, Badia, tel. 0471/839706 o 380/3161999. Ti comuns de Mareo y San Martin él en sorvisc le dotur Edoardo Agreiter, San Martin de Tor, tel. 0474/523315 o 333/1380852.
Apoteches
L'apoteca che ie de servisc per Gherdëina, ora dl orar ordiner de giaurida, da n vënderdi ai 30.11. nchin n vënderdi ai 7.12. ie chëla de Sëlva, tel. 0471/795142 o 333/1776615, (davierta dala 8.30 - 12.30).
L'apoteca en sorvisc tla Val Badia, fora dl orar ordinar, dal vëndres ai 30 de novëmber dales 19:00 al vëndres ai 7 de dezëmber ales 19:00, é chëra da San Martin/Picolin, tel. 0474/523020.

Referac
Ciodí pa freeride?
Alta Badia Guides organisëia en domënia ai 2 de dezëmber dales 18:00 tl salf dles manifestaziuns da Corvara na serada sön le freeride, cun i mius freeriders dl monn. Ala pert sarál Arianna Tricomi - campionëssa mondiala dles ëres dl Freeride World Tour 2018, spo Silvia Moser - freerider y slackliner da Cortina, y Markus Eder - secundo classifiché pro le Freeride World Tour 2018.

Sozial
Portel de referiment sozièl
Ogne mercol da les 16:00 a les 18:00 te Comun general, te strèda di Pré de Lejia a Sèn Jan vegn metù a jir n portel de referiment sozièl, per problemes de dependenzes o de autra sort, avert a duc e no a paament. Ge vel se prenotèr. Per info chiamèr l 370.3004296 o scriver a: sportello.lerais@gmail.com.
Scontrèdes del DSA Trentin
L DSA (Desturbes Spezifics de l'Aprendiment) de Fiem e Fascia endreza n'outa al meis scontrèdes de aprofondiment sun empedimenc spezifics de l'aprendiment. En mercol ai 12 de dezember da les 20.30, a la Rosa Bianca de Ciavaleis, Paolo Colombo spiegarà i strumenc compensatives informatics desche didament al studie.
Festa dl volontariat te Ciasa de Palsa a San Martin
En gaujiun dl de internazional dl volontariat inviëia la Ciasa de Palsa Ojöp Freinademetz düc sü volontars y volontares y dötes les uniuns che á fat val' sorvisc volontar ia por l'ann, a na mëssa de rengraziamënt cun pice renfrësch. Al dess ester n sëgn de dilan. Bel inviades é ince les porsones interessades a fá sorvisc volontar te Ciasa de Palsa. An s'incunta indoman sabeda al 1. de dezëmber dales 15:30, te capela dla Ciasa de Palsa.
La Ila: Festa d'Advënt
Indoman sabeda al 1. de dezëmber dales 14:00 él te Scora Mesana da La Ila na picia festa d'Advënt - na incuntada dles vëdoes, vëdui y porsones sores di trëi paisc dl comun de Badia. Al sará siur degan Iaco Willeit che fej na introduziun al Advënt y n rapresentant de Comun. N grup de ciantarines abelësc la incuntada. Dedô aurela cörta y picia marëna. Organisaziun: KVW La Ila.
Deberieda: Festa de S. Miculau
Ncuei vënderdi ai 30.11. dala 16.00 tla sala dla sentedes dl Servisc Soziel a Urtijëi tla streda Purger. "Deberieda" ie na grupa per se ancunté danter persones che à problems psichics o de sozialisazion cun ulenteres. Per nfurmazions tel. 0471 798015. (Respunsabla dla manifestazion: Rita Faltner).
Festa da Nadel cun la Lia Sustëni ala Vita
N sada ai 8.12. dala 3 domesdì inant, tla Cësa de Cultura de Sëlva, saràl la festa tradiziunela da Nadel per persones cun handicap y si families. Pra velch da maië y da bever y mpue de mujiga aspiteràn S. Miculau, che purterà dessegur vel' pitla scincunda. Unide de trueps.
Doi stuei da rodes a desposizion dla jënt
La Lia Sustëni ala Vita ti mët a desposizion ala jënt dla valeda, aslune y zënza de gran burocrazies, doi stuei da rodes (per jites, jì dal dutor, jì a lité y n.i.). I vën dai via mé per n cër tëmp y per na dunfierta liedia. Chi che n adurvëssa un possa cuntaté Heinz Santifaller, tel. 335 5292813.

Mostres y Ert
Roba da fé damat de Gherdëina y dla Ruscia
N dumënia ai 2.12. dala 17.00, tla sala Luis Trenker tla Cësa de Cultura de Urtijëi, giaurida dla mostra "juech - ert", ulache n mët a cunfront la vedla roba da fé damat russa cun chëla de Gherdëina. La mostra sarà da udëi nchin ai 16.1. da lunesc nchin vënderdi dala 16.00-19.00, de dumënia y dis de festa dala 11.00-19.00. Ntreda debant.
Scultëures jëuni mët ora si opres d'ert
11 scultëures che vën dala Talia y dal'Europa mët ora si opres, che i à fat aposta per chësta mostra cun la tematica "Equilibrio-Balanz", ajache propi chël ie debujën per cunlië artisć cun ravises y ideies desferëntes. La mostra tla Lia Mostra d'Ert a Urtijëi, Plaza S. Antone, ie mo da udëi nchin duman sada 1.12. dala 10.00-12.00 y 16.00-19.00.

Avisc
Senteda generela dla Lia da Mont Gherdëina
Duman sada ai 1.12. dala 20.00 tla Cësa de Cultura de Urtijëi.
Marcià da Nadel dla Jungschar
N dumënia ai 2.12. mët la Jungschar de Urtijëi inò a jì si marcià da Nadel te calonia basite, dala 7.30 nchin la 11.30. Duc ie nviei de cuer a unì a ti cialé ala bela gherlandes d'avënt y ala blòta decurazions che n à fat cun i mutons y la mutans dla Jungschar.
Giaurida dl Marcià da Nadel a Urtijëi
Duman ai 1.12. uniràl giaurì l Marcià da Nadel a Urtijëi dala 17.00 cun na pitla festa de giaurida sun Plaza Stetteneck, ulache l cianterà la grupa Helios. L marcià sarà daviert via per l'ena dala 16.00 - 19.00, de sada y dumënia dala 11.00 - 19.00. Tres l zënter dl luech saràl nce la mostra tradiziunela de criples.
Marcià da Nadel a S. Cristina
Duman sada ai 1.12. dala 10.00 uniràl giaurì a S. Cristina l Marcià da Nadel y piterà inò n program de devertimënt per mutons y families y uni sada y dumënia dala 17.00 saràl da audì meludies da Nadel. L sarà daviert for dala 10.00 - 18.30; dai 1. ai 3.12., dai 7. ai 9., dai 14. ai 16., dai 21. ai 24. y dai 26. ai 30.12.2018.
Marcià da Nadel dla "Locia"
Ai 6.12. uniràl giaurì l Marcià da Nadel dla berstot prutejeda "Locia", tla sala dla Lia Mostra d'Ert a Urtijëi sun Plaza S. Antone. L marcià resterà daviert nchin n dumënia ai 9.12. for dala 10.00 - 12.30 y dala 16.00 - 19.00 y la sada ai 8.12. dut l di dala 10.00 - 19.00.
Marcià da Nadel te Sëlva
Te Sëlva unirà l Marcià da Nadel giaurì ai 7.12. dala 17.00 y resterà daviert ai 8. y 9.12. dala 10.00 - 19.00. Dai 13. ai 16.12. y dai 21.12. ai 6.1. saràl daviert dala 15.00 - 19.00. Sun plaza de dlieja saràl nce da udëi na mostra de criples.
Reunion generela dl KVW de Urtijëi
N sada ai 8.12. dala 15.00 per duc i cumëmbri dl KVW de Urtijëi, tla Cësa de Cultura. Te chësta ucajion giàpen nce la cherta da cumëmber per l 2019. L sarà nce n reladëur che tenirà n referat sun n tema atuel. Sëuraprò saràl nce velch da bever y da pesslé cun danterite mpue de mujiga cun l Trio d'ëiles de Gherdëina cun Otto Dellago.
Prima estrazion di pesć dla lotaria da Nadel
N dumënia ai 9.12. dala 16.00 sun Plaza Nives te Sëlva uniràl trat ora i prim trëi pesć da 1000 € l'un dla lotaria da Nadel metuda a jì dai buteghieres de Gherdëina. L pest unirà mé sëurandat a chëi che ie prejënc iló.
Udiënzes dla Uniun di Ostis
La Uniun di Ostis HGV tëgn udiënzes ince tla Val Badia, vigni secundo y cuarto lönesc dl mëis, dales 16.00 ales 17.00 tla ciasa de Comun a Badia.
Ujes averc a la Rosa Bianca
L'Istitut la Rosa Bianca Weisses Rose se fèsc cognoscer a scolees e families con la scomenzadiva "Ujes averc" te la senta de Ciavaleis en sabeda al prum de dezember da les 14.30 e te la senta de Pardac en sabeda ai 15 de dezember da les 15.00. A Ciavaleis en lunesc ai 10 da les 14.30 e a Pardac en mercol ai 19 da les 14.15 vegn endrezà laboratories per i scolees.
L'Ofize de "Ëres dëida Ëres"
L'ofize a Bornech é da ciafé tla str. Paul von Sternbach nr. 6, info.bruneck@frauenhelfenfrauen.it. Al é davert dal lönesc al vëndres dales 8.30 ales 11.30. Fora de chësc orar, vëgnel tut sö termins sön prenotaziun. Tel. 0474/410303.
Iniziativa di ëi de Puster - MIP
L'ofize dla MIP - Männerinitiative Pustertal dëida i ëi y peri pro caje de devorz, pîta aiüt por ciafé na soluziun te situaziuns de dificolté. L'ofize é da ciafé tl Paternsteig nr. 1 a Bornech y é davert lönesc 14-19h, mercui 14-19h y vëndres 8-12h, telefon: 0474/555848, info@mip-pustertal.it
Reuniun dla Uniun Apicolturs Ladinia
Düc i zidlaés dla Val Badia, scric ite y nia tl'Uniun Apicolturs Ladinia, é dër bel inviá ala festa de Sant Ambroje y reuniun generala dla uniun. La manifestaziun gnará tignida en sabeda ai 15 de dezëmber dales 19:00 tl salf dla Cassa Raiffeisen a San Martin de Tor.
Te Museo l nef calandèr ladin 2019
Ai 4 de dezember da les 17.30 te la sala Luigi Heilmann del Museo, l'Istitut cultural ladin prejenta l nef Calandèr Ladin 2019 e i neves prodoc de la Mediateca Ladina, la piataforma web per la difujion del lengaz ladin.
Cena de la solidarietà con la Crousc Checena
Insnet, vender ai 30 de november da les 19.30 al Park Hotel Avisio a Soraga l'é la cena de la solidarietà endrezèda da la Crousc Checena de Fascia. L vadagn jirà a studenc meritegoi, a families de la val che à de besegn, Anffas, sociazion mèl del zucher del Trentin, don Elio Sommavilla e i miscionères fascegn.
Concors de fotografìa per i Mondièi
La sociazion Inout, en colaborazion con l Comitat di Mondièi Junior 2019, endreza l concors de fotografìa "Neif gallery" sul tem "sport e neif te Fascia". Pel tor pèrt duc i pascioné de fotografìa, i miores retrac vegnarà premié e metui fora te na mostra. Manèr i retrac a inoutfassa@gmail.com dant dai 4 de jené del 2019.
A Moena n cors de self-coaching
Al prum e ai 2 de dezember te sala de Comun de Moena Andrea Ciresa, formator e coach zertificà de la Society of NLP, endreza n cors per emparèr la tecniches de self-coaching e a smaorèr l livel de autostima personèla. Per info chiamèr l 349.1784740 opura scriver a info@andreaciresa.it.
Marcià da Nadèl a Pera
Te calonia de Pera vegn endrezà ence chest an l Marcià de Nadèl per didèr i projec miscionaries te la Republica Democratica del Congo, tel Perù, te la Siria e te la Palestina. L'é avert en sabeda ai 8 e ai 9 de dezember con orarie 9.00-12.00 e 14.00-19.00.
Vijita vidèda col grop Fai
Anché, vender ai 30 de november, da les 10.00 a les 12.00 l Grop Fai de Fascia e Fiem endreza na vijita a la gejiola de Sèn Nicolò e la cortina de Pardac. La vijita vegn vidèda dai "Aprendisć Ciceroni" i studenc de la clasc terzes de la mesènes de Pardac.

Radio y Televijion
RADIO
"LADINIA LIVE": Microfons davierc sun atualità y cultura
La trasmiscion ie da audì uni merdi y mierculdi dala 13:45 ala 14:00 sun la frecuenzes de RAI LADINIA
La trasmiscion "DAI CRËPS DL SELA" ie da audì uni di dala 19:05 ala 19:30 sun la frecuënzes de RAI LADINIA
Vender, 30 de novëmber - „Restless" de Revelation Nightmare
Ntan la trasmiscion „De Viac tl mond dla mujiga moderna" vëniel prejentà chëst iede na produzion nueva de na band ulache l fej pea nce doi jëuni de Gherdëina. Ëi à dat ora si prima EP che cuntën 6 cianties y l stil va plutosc tla direzion dl gothic-metal-rock y che unirà presenteda ai prim de dezëmber. Na ciaculeda cun Theo Demetz y Simon Senoner. Trasmiscion de Tobias Dellago.
Sabeda, 01 de dezëmber - Momënc de vita – intervista a Florina Detomaso
Florina Detomaso é nasciüda y chersciüda sö a Sotil, na picera vijinanza tl comun de La Plie de Fodom y ara á fat la maestra dla scora elementara por 41 agn alalungia. Florina nes cunta de sciöche al ê da jí a scora a Roncat y de sciöche ara instëssa é deventada maeastra. Ëra á insigné de de plü scores te Fodom, canche te feter vigni fraziun êl na scora elementara. N program de Erika Castlunger.
Domenia, 02 de dezëmber - "Jënt da zacan – Fotografies y stories"
L'atività editoriela de Othmar Moroder de Urtijëi ie scialdi granda; do avëi bele dat ora 2 libri iel śën dan man n liber nuef, scrit per gherdëina, dal titul "Jënt da zacan – Fotografies y stories". L nteressant de chësta publicazion ie nce che la cuntën na CD ulache l ie lessù pec y cianties che ie unides tëutes su te Gherdëina ntëur l 1940. Trasmiscion de Simon Moroder.
Lunesc, 03 de dezëmber - Dolomiti Superski 2018/19
La sajon turistica da d'inviern mët man. N valgun raions che ie bel davierc, la majera pert gëura chisc dis. Dolomiti Superski se prejënta al apuntamënt cun la sajon nueva cun de plù nuviteies y, sciche for, cun n'ufierta de cualità per duc i schiadëures. Valutazions cun l diretëur Thomas Mussner. Program de Leo Senoner.
Mercui, 05 de dezëmber - Berlichete!
Berlichete l'é n intervent pervedù fora per dut l meis de november dal Pian de politica linguistica del Comun general de Fascia e endrezà dai Servijes linguistics per endrezèr percorsc gustegoi e lijieres de arvejinament di bec e sia families al ladin. L'obietif l'é ence de tor dant a na vida costrutiva chi che no rejona ladin, per favorir l'integrazion e smaorèr l numer de locutores.I laboratories creatives é vegnui endrezé da la touses de MarameoLab, espertes de didatica e jech. Program de Anna Mazzel.
Juebia, 06 de dezëmber - Na sarturëssa amesa la natöra
Fora de süa pasciun por le cují y por la natöra se á Anita Vittur fat sö so pice atelier, olache ara cuj indumënc cun fibres naturales. Program de Esther Videsott.
TELEVIJION
Mertesc , 04 de dezëmber dala 20:50 - Deboriada
Program de Ivan Senoner y Georg Penn, a cura de Leo Senoner.
Mercui, 05 de dezëmber dala 20:50 - Natura e ambient: La ènema ferida di bosc´
Dò l gran torment dai 29 e 30 de otober del 2018 l paesaje te Fascia l'é zis mudà e de gregn tòc de nesc bie bosć i vèrda fora da spaent con duc i èlbres jabas. La ènema de nesc bosć, beleza e richeza de noscia valèda, la é ferida. Amò apede l'é vegnù jù ence na gran meta tel paìsc de Dèlba e dut chest à portà sacotenc dans economics che arà n gran peis ence chisc egn che vegn. Sarèi bogn i Fascegn de se la fèr ca ence chest'outa? Program de Luciana Detomas e Fulvio De Martin, a cura de Anna Mazzel.
Juebia, 05 de dezember dala 20:50 – Scenar, ert y cultura
Per Helga Moroder ie l depënjer zeche che ti mplenësc la vita. Dedite te si pitl atelier se nòzela de na tecnica particulera per lauré cun acril. L cheder vën for inò stramudà, te n juech de culëures zënza fin y l mutif che la depënj l plu gën ie la popes da fé da mat da zacan. Lucia Castlunger ie n'ana da druch che viv per la mujiga. Dlongia la cumposizions jazz, scrìjela gën tesć y cunlëura cun plu ciantarins tla y ora dla Ladinia.

Informaziuns plü menüdes söi programs radio y televijion de RAI Ladinia pôn ciafè sön www.raibz.rai.it – Sun l medem sit i programes TV sarà da vedei sota "Mediateca" y les trasmiscions radio sota "Podcast".

Temp lede
Fin dl'ena de juesc "Trix Days"
N sada y dumënia ai 1. y 2.12. tl'aula magna dla Scola Elementera de Urtijëi, saràl l gran fin dl'ena de juesc da mëisa per granc y pitli, cun na vela de plu 500 juesc. Chëst ann uniràl fat n puzzle da 5000 tòc y la sala a tema ie dedicheda te chësta 13. edizion ai bastimënc che va sot al'ega. Daviert: 10.00 - 18.00. Priesc de ntreda: 3 € y 8 € per families.
San Miculau te Sëlva
N mierculdi ai 5.12. danter la 16.30 y la 17.30 passerà San Miculau sun Plaza Nives te Sëlva y partirà ora ai pitli mutons vel' pitla scincunda. L unirà nce pità n té bon ciaut a duc.
San Miculau a S. Cristina
N mierculdi ai 5.12. tantosc che l unirà scur, jirà S. Miculau cun l angiul y l fant Ruprecht tres l luech de S. Cristina. Dala 15.30 l aspieten sun Plaza de Chemun ulache l partirà ora vel' pitla scincunda ai mutons y l cor di sculeies se ncunforta a ti cianté dant a S. Miculau y ala families cianties d'avënt.
San Miculau a Urtijëi
N mierculdi ai 5.12. dala 17.00 a Urtijëi tl raion da jì a pe. Do che na grupa dla Scola de Mujiga arà lascià audì meludies da Nadel saràl la defileda cun S. Miculau, l fant y i angiuli tres l raion da jì a pe y nce i malans se lascerà udëi inò n chësta sëira.
Defileda de moda da d'inviern
N sada ai 8.12. dala 17.00 sun Plaza Stetteneck a Urtijëi. N valguna butëighes de Urtijëi prejenterà la culezion nueva da d'inviern dan na paladina de marueia.
Cëna de chi dl '63 dla Val Badia
Chi dl 1963 ó festejé sü 55 agn cun na sëra de alegria y aurela cörta, porchël é düc chi dla classa dla Val Badia inviá ala festa, en sabeda ai 6 de dezëmber dales 19:00, tla ostaria La Munt a Badia. Por tó pert ala serada, él da paié ite 70,00€ anter la fin de novëmber söl cunt IT88D 06045 58180 000000098500, intesté a Susanna Castlunger. Infos al 320/1741872.
Sèn Nicolò a Poza
En jebia ai 6 de dezember sègra a Poza: h. 10.30 defilèda da Piaz S. Nicolò e h. 11.00 messa grana. Te tendon: h. 12.30 marena, 14.30 spetacol di Circensema; 15.30 marendel con Bambi. Dò premiazion de "La cerchegna" e "Cianton rencurà", rua Sèn Nicolò, conzert de la Musega de Poza, loterìa, cena, musega e bai. L recavà va ai Studafech.

Cursc
Curs per se njenië ca a parturì
Per ëiles che aspieta y genitores dl daunì, che à l terminn de fauré/merz 2019. L'ancuntedes sarà tla palestra dla cësa de paussa a Urtijëi, dai 7.1.2019 ai 11.2.2019 uni lunesc dala 16.00 ala 18.00/19.00. Iscrizions: CUPP tel. 0471/457457, 8.00-16.00 dal lunesc al vënderdi; email vormerkung.bz@sabes.it; ëifoma 0471/797778, assistënta sanitera tel. 0471/794290.
Curs de pastelné cun Ines
Per mutons dla scoles elementeres, n mierculdi ai 19.12. dala 14.00 tla sala dla NJG a Urtijëi. N fajerà na cripl da Nadel. N scumëncia dala 14.00, ma n possa unì nce mpue plu tert sce n à dant mo vel' lezion o auter. Da paië ite iel 10 € y da se scrì ite iel tl ufize dla NJG, tel. 0471 799006.

Sport
Corsc col Ski Team Fascia
L Ski Team Fascia endreza dai 7 ai 10 de dezember n cors de arvejinament debant al schi, brea, freestyle e paslonch per i bec de la scolina e de la populères de la val. Ai 11 de dezember taca i corsc da d'invern ence per i scolees de la mesènes. Vegn endrezà ence n cors de schialpinism. Maor info a 0462/764111 o info@skiteamfassa.it
Partides de hockey dl HC Gherdëina
N sada ai 1.12. dala 20.30 saràl tl stadio Pranives de Sëlva la partida dl campiunat AHL danter l HC Gherdëina y l EHC Bregenzerwald.
Plaza dala dlacia Setil davierta
La plaza dala dlacia Setil a Urtijëi ie inò davierta y chël uni di dala 10.00 ala 12.00 y dala 14.00 ala 17.00, nchin ala fin de fauré 2019. Tlo giàpen nce i jadins da se mpresté ora.
Se scrì ite pra i Gherdëina Runners
Per nfurmazion plu avisa prëibel mandé na e-mail a info@gherdeinarunners.it. Da paië ite iel 55 € per chëi che uel nce vester tesseri FIDAL, o 40 € per cumëmbri scëmpli. Tl priesc iel nce la vijita medica sportiva, che uniun muessa avëi.

Religion
Santa Mëssa di pitli
Duman sada ai 1.12. dala 17.00 tla gran sala te calonia a Urtijëi. Duc i genitores cun mutans, mutons, popsc y sambën nëinesc y laves cun si nepoc ie nviei de cuer ala S. Mëssa di pitli, cun Sn. pluan Vijo Pitscheider. L Cunsëi de Pluania dla unità cura d'anes Gherdëina nvieia duc a fé pea.
Al Plan: Benedisciun dles gherlandes d'Advënt
En domënia ai 2 de dezëmber dales 10:00 él a Al Plan le Rorate dles Families, abelí dal cor di mituns. Te chësta ocajiun gnarál ince benedí les gherdlandes d'Advënt. I mituns cun les gherlandes s'incunta 10 menüc denant dan dlijia, por fá l'ingres deboriada. Le Zënter Families Mareo y la Ploania d'Al Plan inviëia bel.
Picolin: Mëssa cun rît extraordinar
Incö vëndres ai 30 de novëmber dales 19:30 él tla dlijia da Picolin na santa mëssa tl rît extraordinar cun le prou P. Christian Blümel.

Teater
Rassegna de teater
Insnet, vender ai 30 de november h. 20.30 al PalaDolomites de Ciampestrin e en domenia ai 2 de dezember h.15.30 te teater de Ciampedel l'é "La Mizacoles" col toch "Se fae inant l più ascort". En vender ai 7 de dezember h. 20.30 te teater de Ciampedel e en domenia ai 9 de dezember h. 15.30 te Oratorie de Poza l'é l grop "I Bontemponi" che porta dant "La ciampènes de la sabeda sènta".

Galaria retrac