Manifestazions atuales speziales

Data

30 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 30 de november
Magic Town S. Cristina
L marcià da Nadel per mutons y families tl zënter Iman
Da duman sada ai 1.12. inant deventerà S. Cristina inò n pitl luech plën de magia! Duc i pitli puderà se devertì pra i cater juesc, ntan che i genitori puderà se tò dl'aurela de se bever vel' buanda bona ciauda, cumpré vel' scincunda da Nadel y passé nsci de biei mumënc te na blòta atmosfera da Nadel.
Chëst ann coche nuvità, puderà i mutons y la mutans sbriscé ju per na sbrisciadoia de dlacia fata dala Scola d'Ert de Urtijëi. De sada y dumënia dala 5 domesdì inant saràl grupes dla valeda che cianterà y sunerà meludies da Nadel per vo.
L marcià da Nadel sarà daviert dai 1. ai 3.12., dai 7. ai 9.12., dai 14 ai 16.12., dai 21. ai 24.12. y dai 26. ai 30.12.2018 for dala 10.00 ala 18.30.

Di dla porta davierta tl Lizeum d'Ert "Cademia" y tla Scola Prufesciunela
N sada ai 1.12.2018 dala 9.00 nchin la 12.30 a Urtijëi
L Lizeum d'Ert "Cademia" y la Scola Prufesciunela per l Artejanat Artistich de Gherdëina nvieia duc al di dla porta davierta, ulache i vijitadëures puderà unì a ti cialé ala strutura cun vijites menedes. Oradechël saràl da udëi ativiteies dl nseniamënt sëuraprò tl ciamp dl'ert y dla mujiga, ma nce dla leteratura y dla scienzes te plu rujenedes che tën nce cont dl argumënt dl ann "Der Kreis - il cerchio - l cërtl".
Duc ie nviei de cuer.

"Tenebrae Choir"
N juebia ai 6.12. dala 20.30 tla dlieja de S. Cristina
Te chësc cunzert di Jëuni de Mujiga de Gherdëina, propi tl tëmp d'Avënt, lascerà chësc cor nglëisc nce audì pec tlassics da Nadel, ma nia mé. I cianterà nce "folk songs" da dut l mond, cianties americanes che à abù n gran suzes y n valgun pec di Beatles, l sarà perchël da audì na bela variazion de cianties mpue d'uni sort, dessegur plajëules da scuté su.
L Tenebrae Choir ie unì metù su tl 2001 da Nigel Short, ex cumëmber di The King's Singer. Leprò iel dut ciantarins ezelënc dla Nghiltiera. Per l cunzert a S. Cristina se prejenteràl te n pitl ensemble de sies ciantarines y ciantarins, che dajerà na desmustrazion dla cualità dla ujes, che fej ora l tipich "Tenebrae-Sound" cunesciù y fajerà a na maniera che l deventerà n avenimënt cunzertistich sentì y intim.

Prejentazion dl Schi Club Gherdëina
N vënderdi ai 7.12. dala 18.00 sun Plaza Nives te Sëlva
Te chësta ucajion uniràl prejentà duta la grupes de atlec dla disciplines defrëntes dl Schi Club Gherdëina cun si trainadëures y respunsabli, y nce l cudejel nuef dla sajon 2018/2019, ulache l ie da giaté d'uni sort de nutizies nteressantes y nfurmazions dla garejedes, fotografies dla grupes di atlec y nce i sponsores che sustën l'atività dl Schi Club Gherdëina.
Duc ie nviei de cuer a chësta prejentazion.

Angela Aux y Me+Marie
Ai 7 de dezëmber, en ocajiun dla 1.st.friday.live.session@saj.un, sonará dui grups tl Zënter dal Jonëza y dla Cultura SaJ.un a La Ila. La manifestaziun é dales 21:00, cun entrada debann. Düc sura i 16 agn é dër bel inviá.
Angela Aux (Florian Kreier) é n musizist de contrasć, che se descrí instës sciöche n vicel senté sön n cabl che podará tl dagní ester n marinar o n cogo. Ël portará dant ai 7 de dezëmber cianties y rimes particolares.
Me+Marie é le duo metü adöm da Maria Moling da La Val y Roland Vögtli dla Svizera. Ai sona y cianta adöm bele dal 2012 incá y á dé fora so pröm CD dl 2016. Le grup é conesciü dandadöt tla Germania, tla Svizera y tl'Austria y fej musiga de stil indo rock/pop. Tratan süa tour 2018, rovará Me+Marie ince a La Ila.
Tl Zënter dla Cultura y dla Jonëza SaJ.un portarái dant n bel repertore fora de so album nü "Double Purpose", gnü fora d'agost. La band é te chësta ocajiun metüda adöm da Maria (usc y bateria) y Roland (usc y chitara), acompagná da Jacob Foord y Julia Viechtl al bas y Teresa Staffler y Clemens v.Finckenstein ala pianola.

Les scores altes da La Ila se presentëia
Dötes les porsones interessades é inviades incö ai 30 de novëmber a na sëra de informaziun por imparé da conësce les scores y le laur che vëgn fat
Incö vëndres ai 30 de novëmber dales 20:00 vëgnel tigní tla sënta dles Scores Altes da La Ila na sëra d'informaziun sön les trëi scores: l'Istitut Tecnich Economich, le Lizeum Linguistich y le Lizeum de Sciënzes Umanes.
Düc canc é dër bel inviá da gní a imparé da conësce damí les scores cun sües strotöres y se fá insciö na idea de sciöche al vëgn lauré.

Advënt a Al Plan
Sön plaza dl paiun de paisc gnarál daurí le pice marcé d'Advënt, cun n bel program de cornisc. Ai 6 de dezëmber vëgnel San Micurá
Inice iniann mët da jí l'Assoziaziun Turistica Al Plan/San Martin le pice marcé d'Advënt, sot al motto dl Advënt a Al Plan. Sön plaza de paiun a Al Plan sarál deplü ciasotes olache an pó cumpré produc artejanai y spëisa da chiló. Le marcé é davert de dezëmber dai 6 ai 8, ai 14 y 15, ai 21 y 22 y dai 27 ai 30, dagnora dales 17:00 ales 19:30. Vigni de sarál la poscibilité por i mituns da se fá na roda cun i ponys, les sabedes dales 18:00 gnarál cunté stories da Nadé incër le füch. En jöbia ai 6 de dezëmber gnarál ince San Micurá cun sü agnui y malans. Al pëia ia dales 17:00 dan les scores por jí tres paisc cina söl marcé, olache al ti dará n pice scarniz cöce ai mëndri. La jënt é bel inviada da storje pro.

La magia dl Nadé te plaza a Calfosch
La dlijia de S. Vighile i fajará da cornisc ala secunda ediziuna dla manifestaziun "La magia dl Nadé", che vëgn metüda da jí sön plaza de paisc a Calfosch
Le pröm apuntamënt gnará tigní ai 6 de dezëmber y ciamó n iade ai 27 de dezëmber y ai 4 de jená. Al gnará dé fora sön plaza de vigni sort de duciaries, sciöche ince n bun tê cialt o n gote de vin cöt. En ocajiun dl pröm apuntamënt sarál le cuartet de possaunes "Resonn" che abelësc le domisdé y dales 17:00 sarál San Micurá che vëgn a ti porté na picera scincunda ai pici mituns. Ai 27 de dezëmber podarán aldí le sonn dla pia cun le duo "Vic & Paolo", deperpo che le cor Mosaic se cruziará dl intratignimënt musical ai 4 de jená. La manifestaziun mët man vigni iade dales 16:30 y vá inant cina ales 18:30. Al é na bona ocajiun por passé adöm n domisdé te n'atmosfera tradizionala dl tëmp da Nadé.

Atmosfera da Nadé a Corvara y San Ciascian
Fora por l'Advënt y tratan les festes da Nadé gnarál ince chësc invern metü da jí le pice marcé da Nadé sön plaza de Comun a Corvara y le "Paisc da Nadé" tl zënter da San Ciascian
Intrami i marciá da Nadé metará man ai 6 de dezëmber y al gnará pité dales 16:00 ales 19:00 produc locai, articui de artejanat, decoraziuns da Nadé mo ince spezialités gastronomiches tradizionales. N program rich de ativiteé y manifestaziuns musicales cun grups dl post ti fajará da cornisc ai marciá, abelis da löms y decoraziuns tradizionales. Pro le marcé da Corvara, che é davert de dezëmber dai 6 ai 9, dai 14 ai 16 y spo dai 22 ai 6 de jená, sarál i mituns che á la poscibilité da amiré y se fá n bel retrat cun i düli y te n valgönes ocajiuns podará i mituns ince fá n pice rait cun i ponys.
A San Ciascian, olache le Paisc da Nadé é davert vigni de dai 6 de dezëmber ai 6 de jená, podarán indere se fá na picera roda cun i alpacas y i lamas la sabeda y la domënia, adinfora di 29 y 30 de dezëmber, y al sará ince val' sëra olache al sará da odëi le famëi cun sües cioures. Le program cun dötes les informaziuns ciafon ti ofizi informaziuns dl'Alta Badia.

2. Boulder Event
En vëndres ai 7 de dezëmber, vëgnel metü da jí tl local da boulder SaJ.un a La Ila le 2. evënt da boulder
Chiló se tratera de na manifestaziun olache al stá al pröm post le devertimënt. Danter les staziuns che gnará arjignades ca, sarál plü vies de dificolté desfarënta.
Scomenciamënt é dales 19:00 y jará inant cina ales 22:00. Al sará döes categories: öna por i ëi y öna por les ëres, intres dai 16 agn insö. Alplü pó tó pert 30 partezipanc. Le cost d'iscriziun, olache al é laite ince na boanda y la poscibilité da tó pert a na loteria, é de 10,00€.
Les iscriziuns vëgn tutes sö al 335/5400890 anter la jöbia ai 6.12.
Dales 21:00 sarál musiga dal ví cun le grup Me+Marie, che fej tapa a La Ila tl cheder de süa tournee "Double Purposes". Düc é bel inviá da tó pert ativamënter o a ciaré pro!

Marciá de solidarieté por Suramunt
Do les rogossies che é stades ala fin d'otober y che á gaujé tröc danns te nosta valada y ciamó deplü tl raiun vijin de Fodom, Col y Alie, s'á le Consëi de Formaziun de Badia ponsé da mëte da jí n'aziun de solidarieté por daidé na scolina/scora de Suramunt
Al é porchël gnü invié düc i crejimanc de Calfosch, Corvara, La Ila, San Ciascian y Badia da tó pert al'iniziativa. Tröc jogn y ince umes á tut sö l'invit y á dé ca tröp tëmp por pastelné produc da vëne en ocajiun de n pice marcé che gnará tigní te vigni paisc.
Le paisc de Corvara á bele fat le marcé en Santa Tarina, ai 25 de novëmber, le paisc da Calfosch venará sü produc la pröma domënia d'Advënt, ai 2 de dezëmber do mëssa. Le paisc de Badia inviëia al marcé en la Festa dl'Imacolada, ai 8 de dezëmber do la gran mëssa, tla Stüa di paurs.
A La Ila gnará le marcé tigní la sabeda ai 15 de dezëmber do la mëssa da sëra te calonia basite.
I crejimanc da San Ciascian vënn sü produc la domënia ai 16 de dezëmber, ince do la gran mëssa. Al vëgn invié la popolaziun da jí ai marciá y da dé insciö n pice sëgn d'aiüt a nüsc vijins de Suramunt, che ne l'á te chësc momënt nia tan saurida.
Organisaziun: Consëi de Formaziun de Badia, en colaboraziun cun le Consëi de Formaziun de Corvara.