Manifestazions atuales speziales

Data

07 de dezember 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 7 de dezember
Advënt a Al Plan
Sön plaza dl paiun de paisc él vigni fin dl'edema le pice marcé d'Advënt, cun n bel program de cornisc
Inice iniann mët da jí l'Assoziaziun Turistica Al Plan/San Martin le pice marcé d'Advënt, sot al motto dl Advënt a Al Plan. Sön plaza de paiun a Al Plan sarál deplü ciasotes olache an pó cumpré produc artejanai y spëisa da chiló. Le marcé é davert de dezëmber ai 7 y 8, ai 14 y 15, ai 21 y 22 y dai 27 ai 30, dagnora dales 17:00 ales 19:30. Vigni de sarál la poscibilité por i mituns da se fá na roda cun i ponys, les sabedes dales 18:00 gnarál cunté stories da Nadé incër le füch.

"A Betlehem söl iade"
Conzert d'Advënt, en domënia ai 9 de dezëmber dales 17.00, tla dlijia de Badia
Düc canc é bel inviá da gní al conzert d'Advënt che vëgn tigní en domënia ai 9 de dezëmber dales 17.00, tla dlijia de Badia. An podará aldí chisc grups che cianta y sona: "Cor Kerygma & compagns" sot la direziun de Agnes Irsara; i "Turmbläser" de Badia sot la direziun de Fridl Pescoller; Ermes Costa da Calfosch che sona i orghi da botuns, y n Grup de archëc sot la direziun de Fridl Pescoller.
Monica Nagler portará dant tesć meditatifs. Chësc conzert podará ester n momënt de ligrëza por se mëte sön le iade aspetan la festa de Nadé.

Angela Aux y Me+Marie
Incö ai 7 de dezëmber, en ocajiun dla 1.st.friday.live.session@saj.un, sonará dui grups tl Zënter dal Jonëza y dla Cultura SaJ.un a La Ila. La manifestaziun é dales 21:00, cun entrada debann. Düc sura i 16 agn é dër bel inviá.
Angela Aux (Florian Kreier) é n musizist de contrasć, che se descrí instës sciöche n vicel senté sön n cabl che podará tl dagní ester n marinar o n cogo. Ël portará dant ai 7 de dezëmber cianties y rimes particolares.
Me+Marie é le duo metü adöm da Maria Moling da La Val y Roland Vögtli dla Svizera. Ai sona y cianta adöm bele dal 2012 incá y á dé fora so pröm CD dl 2016. Le grup é conesciü dandadöt tla Germania, tla Svizera y tl Austria y fej musiga de stil indo rock/pop. Tratan süa tour 2018, rovará Me+Marie ince a La Ila.
Tl Zënter dla Cultura y dla Jonëza SaJ.un portarái dant n bel repertore fora de so album nü "Double Purpose", gnü fora d'agost. La band é te chësta ocajiun metüda adöm da Maria (usc y bateria) y Roland (usc y chitara), acompagná da Jacob Foord y Julia Viechtl al bas y Teresa Staffler y Clemens v.Finckenstein ala pianola.

Lovines - le prigo blanch
Le tema dles lovines vëgn traté te na manira particolara, cun n spetacul multimedial söl program ai 12 de dezëmber a San Martin de Tor
La Lia da Munt Ladinia - Val Badia ó ti jí pormez te na manira alternativa ala tematica dles lovines y le prigo che ares ascogn. An á porchël ponsé a na serada particolara, organisada deboriada cun le grup NEW EOS Teater-Musiga da Balsan. Sot al titul "Incubo Bianco" gnarál pité n spetacul multimedial sön le tema dles lovines - cun parores, musiga y imajes. Le spetacul é garaté aladô dl liber "Mi sono perso nel mio bosco" de Angel De Larezila da Moena, patrun de ütia da munt y mëmber dl Aiüt Alpin, instës rové sot na lovina y gnü fora ví. Al gnará ince mostré fotos esclusives dl Aiüt Alpin de Moena. L'apuntamënt é por en mercui ai 12 de dezëmber dales 20:00, tl salf dl Istitut Ladin a San Martin de Tor.

"Daurí mi cör"
Chësc é le titul dl conzert d'Advënt, che sará da aldí ai 16 de dezëmber a Rina
Le Cor Col dla Vedla organisëia a Rina n conzert d'Advënt sot al titul "Daurí mi cör". Le conzert vëgn tigní en domënia ai 16 de dezëmber dales 16.00 te dlijia da Rina. Al sará da aldí n grup de stromënc dla Musiga da Rina, le Cor de mituns dla scora da Rina (direziun de Bruna Frenes), le Cor de Dlijia da Rina (direziun de Alex Craffonara), le Cor Col dla Vedla da Rina y le grup "Mosaic" d'Al Plan. Düc canc é bel inviá.

Cunzert de "Cordes y Butons"
N dumënia ai 9 de dezëmber dala 17.30 te Tublà da Nives te Sëlva
L trio "Cordes y Butons", ulache l ie leprò la surans Reinhilde (zitra y usc) y Tamara Gamper (vidula y usc) y David Moroder da Resciesa (armonica) sarà da audì n chësta dumënia, ai 9 de dezëmber te Tublà da Nives te Sëlva.
Sot al moto "Sonns particuleres per l tëmp chiet" lascerài audì pec strumentei y nce n valguna cianties. L cunzert mët man da mesa la sies da sëira y la ntreda ie debant. Duc ie nviei a unì a scuté su.

Cunzert a fin de bën, per l tëmp chiet dl ann
N juebia ai 13 de dezëmber dala 20.00 te dlieja de S. Cristina
La grupes "Die Kraxn" y "Cordes y Butons" lascerà audì de bela meludies fines y plëines de armunia.
La dunfierta ti unirà data a na familia de Gherdëina che à debujën de aiut. Se ncunferton sun vosc unì!

Nadel sun dlacia
Na sëira de mujiga, bal y ert ve ncanterà tl stadio Pranives te Sëlva. Nce Carolina Kostner, stëila dl jadiné artistich, sarà da udëi pra chësc spetacul
Coche bele tradizion mët l Eisclub Gherdëina nce chëst ann a jì n spetacul da Nadel sun dlacia, plu avisa ai 27.12. dala 21.00. L ie na legrëza che la prinzëssa dl jadiné artistich Carolina Kostner nes unerea cun si prejënza senziera, lesiera y divina sun dlacia. Dlongia la stëila dl jadiné saràl nce d'autri atlec de livel nternaziunel che mustrerà si capaziteies tecniches y artistiches, danter l auter l pèr jëunn de jadiné Manuel Piazza de Urtijëi y Alyssa Montan, l pèr Sara Campanini y Francesco Riva y i jëuni Gabriele Frangipani, Lara Naki Gutmann y Maurizio Zandron. Sëuraprò puderàn mo amiré la grupa de jadiné sincronisà "Ice Angels" dla Val Badia. Sambën mustrerà nce la mutans dl Eisclub vel' bal ispirà ala armunia di cater elemënc.
N possa cumpré la chertes tla Lia dl Turism de Sëlva nchin ai 26.12. o pra la cassa da sëira. Ve nvion duc canc a chësc spetacul de marueia!

World Cup Adventures a S. Cristina
Trëi dis de festa n ucajion dla garejedes de Copa dl Mond
N juebia, vënderdi y sada ai 13, 14 y 15 de dezëmber, trëi dis de festa sun Plaza Dosses. La festa scumëncia n juebia dala 20.00 cun na cërcia de vins dl Südtirol y dala 22.00 inant blues y jazz cun l Greta Marcolongo "Duett". La festa va inant n vënderdi y sada cun scumenciamënt dala 10 danmesdì cun la "Lucky 17" rock'n roll band. Do la garejedes dala 14.00 inant inò mujiga y aperitif lonch. N vënderdi stlujeràn ju la sëira cun la "DNA Danceband" y gran "spaghettata" da mesanuet, y n sada cun na party cun i "Sauguat"
Se ncunferton a festejé cun vo sun Plaza Dosses!