“La prima neve”: n film da veder

Data

07 de fauré 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks

Girà te la Val dei Mocheni col sostegn de Trentino Film Commission, chest bel film de Andrea Segre é en programazion te duta la provinzia. En mercol sera ai 8 de firé tel chino de Tieser.


Michele l’é n bez de 11 egn che stèsc te la Val dei Mocheni te anter i monc del Trentin e te na comunanza che rejona n veior lengaz de mendranza de reisc todescia. Chest joenet stèsc con sia mère e l giaf da man de sie père, Pietro, che l fèsc l tisler e l’arleva eves; sie père l’é mort da pech lascian sia familia, e soraldut Michele, te na gran crisa.

Enlongia a chest dolor, desche sul fer paralel de la scines de na ferata, viaja l padiment de Dani, n joen de naa dal Togo che l’é sciampà da la vera en Libia. L’é stat metù te n zenter de azet e no l’é bon de azetèr de esser père de na pìcola beza.

La vita de Michele e chela de Dani se encroja canche chest ùltim vegn manà a lurèr da Pietro.

L’invern se arvejina, con chela neif che Dani no l’à mai vedù, e te chest jir del temp Michele e Dani i à l met de emparèr a se scutèr, a se entener e a medeèr sia ferides.


Chesta en curt la storia portèda dant tel film “La prima neve”, n film sostegnù da Trentino Film Commission che l’é stat metù en programazion te 9 sales te duta la provinzia, ensema a na lingia de etres 10 film che à desche teater i lesc de nosc raion.

La scomenzadiva vegn metuda a jir con la colaborazion del Coordenament teatrèl trentin e per l’ocajion l biliet de entrèda l’à n priesc mender, e apontin te chest chèder tel chino-teater de Tieser en mercol ai 8 de firé da les 21.15 al cost de 2 euro se pel veder “La prima neve”.

Se trata de n film che é stat girà del 2013 sot la direzion de Andrea Segre e prodot da la Jolefilm de Marco Paolini e da Rai Cinema col sostegn de etres sponsor e l’é stat selezionà ence per la 70esima Mostra internazionèla de Unejia.

L pìcol protagonist l’é n bez de la Val dei Mocheni (Matteo Marchel) a sia pruma esperienza desche ator, enveze l ruol de Dani l’é stat dat a l’ator Jean Christoff Folly, ghest de n zenter de azet de Perjen. Anter i etres atores l’é Anita Caprioli, Peter Mitterrutzner e Giuseppe Battiston, e apede ic jent del post.

 (Lucia Gross)