Anna, récord ala Ciadinac/Scilier

Data

10 de messel 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’atleta dles maratones estremes d’La Pli de Mareo á desfiré döes gares de "skymarathon" te sis dis, davagnan la gara südtiroleja de 44,7 km
Por Anna Pedevilla da La Pli de Mareo él sté na edema de gares dër sfadioses. Metü man ára ai 01/07 tla Valtellina, plö avisa a Corteno Golgi cun la "Skymarthon Sentiero 4 luglio", öna dles gares plü conesciüdes tla Talia. Chiló él dagnora n gran numer de altec de livel alt che tol pert. Al é na skymarathon dër tecnica, cun tröc toc olache an mëssa dër mëte averda da ne tomé nia por le gran ert che é dles perts jö. Al é ince toc olache an mëssa arpizé, sides söpert co jöpert. La gara mostra sö na destanza de ca. 42 km cun n deslivel + de ca. 3000 metri. Le punt plü alt arjunj 2744 m, che é la Cima Séllero. Da iló inant reston por ca. 13km a na altëza che vá dai 2200m a 2700m. N percurs dër prigorus y ri da salté. A Anna i garetel n buniscim 4. post final, do la Dragomir (ROM) che é stada 4 ai Mondiai, la Desco (ITA), öna dles mius al monn, y la Rota (ITA). Deache la proa valô ince por i campionac taliagn assoluc, éra rovada sön le 3. scalin dl podest. Ara nes cunta: "I n’á mai fat na gara tan ria, i mëssi dí che i ê incontënta da ester rovada sana y intiera al travert, al é sté en valgügn toc dër da prigo, olache tomé ess albü conseguënzes graviscimes. Ti rové tan pormez a de te’ altetes é sté por me desco davagné.”

La devënta cun récord de gara nü

En sabeda ai 07/07 ára spo tut pert ala Skymarathon Rosengarten/Schlern che piâ ia a Tiers dales 7 da doman. Chësta é ca 44,7 km lungia, á n deslivel positif de 2980 m cun ciamó n iade le medem jöpert. Anna é piada ia desche favorita pro les ëres y á bele condüt la gara dal mëteman. Ala fin ti él garaté n buniscim tëmp final de 5 ores y 34 menüc, che é ince le récord nü dles ëres. “Pié ia desche favorita n’ó dí por me nia, iö á ciaré da fá mia gara y da me gode le beliscim panorama dles munts. I mëssi dí che chësta é la plü bela gara che i á fat cina sëgn, salté chiló é veramënter dër bel. I sun dër contënta che i á davagné, dantadöt deache en chësc iade al travert êl ince mies mitans che m’aspetâ. I speri da podëi ciamó gní n iade a chiló a salté, al é n paraisc.”

Sëgn fej l’atleta dl Team La Sportiva na edema de palsa, spo ponsarara impormó ci gares salté ti proscimi mëisc.