Gran sport y bela atmosfera pra i Nternaziunei de Tennis a Runcadic

Data

10 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Jannik Sinner de Sanciana/Innichen se fej unëur pra l debut pra l gran turnoi nternaziunel, te si edizion de iubileum de 20 ani, desfrutan a puntin la Wild Card tl tabelon prinzipel. L ie for n bon publich pra l gran ATP-Challenger de Runcadic

Tennis Runcadic - L’atmosfera ie coche for particulera, ntan l turnoi nternaziunel de tennis. Mo deplù n merdi, ulache l ie unit adalerch truepa jënt de Gherdëina, ma pona sambën nce da Puster ca, a ti cialé al matador raionel Jannik Sinner, l jëunn de permò 17 ani che ti ie stat a Luca Giacomini de Padova, numer 647 dl mond, te puech deplù che una na ëura, vencian per 7:6 (4), 6:1. La tribuna fova mplenida de jënt, ma l jëunn de Puster ie restà cunzentrà, per n debut straurdiner te chësc turnoi de livel nternaziunel. L prim set ie stat scialdi cumbatù, l jëunn de Puster à monce recuperà n desvantaje de 1:4, vencian pona, tl segondo à Sinnner riesc stlut via. „L ie massa bel a avëi venciù tlo mi prima partida dla ATP-Challenger-Tour. La truepa jënt me à sustenì dassënn!“ Nscila Sinner, che à n juebia la partida per i otafs de finela (do la stluta de redazion dla USC, ndr.)

Atmosfera particulera

Coche dit iel n’atmosfera particulera, tl Zënter dal Tennis a Runcadic. L trainadëur de tennis Stefano Bassetto rejona, cun referimënt ala pert sportiva, de „n livel scialdi aut, cun truep jugadëures scialdi boni.“ La sportiva Nadira Binaschi, che ie unida aposta da Verona su a ti cialé al turnoi, auza ora „la bona urganisazion dl turnoi, cun la particularità dl fonz dl mplant de Runcadic, cun la codles che va scialdi debota.“

N gran lëur, de gran efizienza, vëniel fat per i comunicac stampa da pert de Martina Moser y Simon Kostner. L capo di arbitradëures Giuseppe Furrer n con’ dla urganisazion: „Tlo te Gherdëina unions tratei sciche inió pra de tei turnoies ufiziei tla Talia.“ L Supervisor dl turnoi Stephane Cretois rejona de na manifestazion „full of charme.“

L diretëur de turnoi Ambros Hofer auza ora coche pra la edizion de chëst ann iel „n turnoi de n livel sportif scialdi aut, cun plu prejënza de jënt a cialé pro che ti ani dant, per n merdi nce de gra ala pertezipazion dl jëunn de Puster Jannik Sinner, che à desmustrà de vester bon de tenì pea nce pra n tel livel; l ie na gran atrazion.”

Davia che l ie chëst ann l bel iubileum de vint ani, do doi dejeneies de Tennis Nternaziunel te Gherdëina, undesc iedesc cun l turnoi dl’ëiles, 9 iedesc l turnoi di ëi, s’la ciaculons cun Hofer nce dla urganisazion: “Al didancuei ie dut l cumité de urganisazion che lëura bën, deberieda, uniuna y uniun sà can y ula mëter man. L ie danz n gran mpëni, che duc muessa for vester tlo. A ti cialé de reviers a chisc vint ani vëniel de cër’ velch belau mpue’ da rì a pensé do coche dut se à mudà, a livel de cumité de urganisazion. Tl prim fova danz mo dut nuef. Ma cun la esperienza iel unit ora na bona routine tl manejamënt di vares urganisatifs y logistics.“ Nscila Ambros Hofer, diretëur dl turnoi cun na montdepesć de 64.000 euro.

La semifineles y la fineles

Do i dis de cualificazion da n sada inant y do l scumenciamënt n lunesc di juesc dl tabelon prinzipel iel te chësc fin dl’ena la fineles. Segures ie bele i orares per i juesc tl singul de semifinela de n sada ai 13 de utober y de finela n dumënia ai 14 de utober: tramedoi scumëncia dala 14.00. La finela dl dopl ie n sada ai 13 de utober dala sies da sëira. N vënderdi ie la ntreda mo debant, da paië iel mé per i juesc de sada y dumënia ai 13 y 14 de utober, 15 euro. La chertes ie bele śën da giapé jan ite tla plata internet www.tennis-valgardena.com/de/atp/home, ulache n possa nce jì ite per cialé coche la partides va inant, pont per pont, cun l live-score, coche n dij. Drët butà à l kids day n dumënia ai 7 de utober.

Do l bel turnoi di ëi saràl dai 15 nchin ai 22 de dezëmber inò l gran turnoi nternaziunel dl’ëiles, da 15.000 dollar. La matadora de Gherdëina Verena Hofer ova l ann passà arjont la semifinela. Y da ne desmincë nia: n vënderdi da sëira iel tl Zënter de Runcadic la gran party per festejé i vint ani de iubileum di Nternaziunei de Tennis de Gherdëina.

David Lardschneider

Foto:

Jannik Sinner, l jëunn de Puster de permò 17 ani, che ti ie stat a Luca Giacomini.