Filip Schenk arjuma de puech na bedaia olimpica

Data

11 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Nchin dan l’ultima disciplina, che fova chëla de sveltëza “lead” – perauter la spezialità dl atlet de S. Cristina – fova Filip sun la drëta streda per vëncer na bedaia pra i Juesc Olimpics di Jëuni a Buenos Aieres

Arpizeda sportiva - N mierculdi ai 10 de utober 2018 ova i sies finalisć dl’arpizeda sportiva da s’la fé ora per la bedaies, che univa sëurandates mé per la cumbinazion. Scumencià àn cun la “speed”, ulache l ie for doi arpizadëures che se mesura sun doi vies una dlongia l’autra. Scialdi per dsarà iela jita tla doi proes per l prim y l terzo post. L favorit Keita Dohi à messù ti la zeder a Sam Avezou dla Franzia y Filip Schenk ie unì batù da Yufei Pan dla Cina de manco de vint centejimi de secunt y fova nsci cuarto do chësta prima disciplina.

Tl “boulder” ie Filip Schenk stat scialdi bon de ti vester ai problems de bouldering metui dant, mé Dohi ie stat n śich miëur de ël, arjunjan duc cater i top permez ai trëi de Filip y mé ëi doi ie stac boni de cunlië la mosses che se damanda na gran forza. Cun l segondo plazamënt tl “boulder” fova Filip sun la bona streda per ruvé pra na bedaia olimpica, ajache do chël unìvel mo la ultima disciplina, la “lead”, te chëla che Filip ie for scialdi bon y che l ova nce bele pra la cualificazions cun l segondo post purtà tla fineles.  

La via se damandova gran artenienza dai atlec y finova via cun na traviersa cun puec grifs per i piesc. Doi atlec ie ruvei nchin suinsom. Filip Schenk à scumencià bën y fova asvelt, ma ie pona tumà tla secuënza ala fin y nsci iel per ël “mé” sautà ora l cuarto post.

Cumpedan adum i ponc dla garejedes ie Filip – l jëunn de S. Cristina che garejea per la grupa sportiva dla Fiamme Oro – ruvà tla cumbinazion al cuarto post. Danz che bedaia ne n àl chëst iede venciù deguna, purempò iel n boniscimo plazamënt, cunscidran dantaldut che la defrëzes danter i finalisć fova da stramp pitles.

La bedaia d’or de chisc Juesc Olimpics di jëuni ti ie jita al iapanesc Keita Dohi, nce chëla d’arjënt ie ruveda tl Iapan cun Shuta Tanaka y l franzëus Sam Avezou à venciù la bedaia de bront; 4. Filip Schenk, 5. Yufei Pan dla Cina y 6. Petar Ivanov dla Bulgaria.

Ulrike Maierhofer

FOTO:
Filip Schenk (fotografia de archif de Jan Schenk).