L jëunn de Puster Jannik Sinner pierd contra Constant Lestienne

Data

11 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
N juebia ai 11 de utober sa sëira iel stat la partida danter l matador raionel Sinner, de permò 17 ani, contra l franzëus Lestienne. La partida fina via dala 20.51.

Do n prim set valivà ora, ulache deguni ne à dat ju n juech, iesen passei al tie break: Sinner ie stat bon de ti vester a Lestienne: do doi codles de set ova l franzëus valivà ora, ma Sinner à desmustrà de avëi nierves y persunalità de n grant, vencian l tie break y nscila l set: 7 a 6 per Sinner.

N bon tennis ie unì mustrà tl segondo set, inò scialdi valivà ora, ma danz che Sinnner à mpo messù ti zeder n juech al averser, che à venciù per 5 a 7.

Tl terzo set jìvela inant coche dant, te na maniera valiva, cun l publich for plu y plu ciaut, che ti dajova na sburdla sëuraprò al matador raionel de Puster, plu avisa de Sanciana/Innichen. Sun l 5 a 5 manaciova Sinner de pierder si batuda, trëi iedesc, doi iedesc iel bon de valivé ora, ma danz che l se giapa n break per l 5 a 6. Lestienne à nscila l mesun de stlù la partida cun si batuda, l va inant a 15-40, y l va a se tò l juech, l set y la partida. Sinner á perdù, ma cun unëur: l daunì mundiel ie inant te si mans!

La semifineles y la fineles

Segures ie bele i orares per i juesc tl singul de semifinela de n sada ai 13 de utober y de finela n dumënia ai 14 de utober: tramedoi scumëncia dala 14.00. La finela dl dopl ie n sada ai 13 de utober dala sies da sëira. Nchin a n vënderdi ie la ntreda mo debant, da paië iel mé per i juesc de sada y dumënia ai 13 y 14 de utober, 15 euro. La chertes ie bele śën da giapé jan ite tla plata internet www.tennis-valgardena.com/de/atp/home, ulache n possa nce jì ite per cialé coche la partides va inant, pont per pont, cun l live-score, coche n dij. Drët butà à l kids day n dumënia ai 7 de utober.

Do l bel turnoi di ëi saràl dai 15 nchin ai 22 de dezëmber inò l gran turnoi nternaziunel dl’ëiles, da 15.000 dollar. La matadora de Gherdëina Verena Hofer ova l ann passà arjont la semifinela. Y da ne desmincë nia: n vënderdi da sëira iel tl Zënter de Runcadic gran party per festejé i vint ani de iubileum di Nternaziunei de Tennis de Gherdëina.

David Lardschneider

Fotografia dla partida: Jannik Sinner pierd contra Constant Lestienne.