La mior partida del Fascia

Data

21 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
I jiadores de mister Chelodi à serà sù en parità contra l Solteri. Anché domarena na neva endesfida a Vich contra l Giovo

Belebon de spes canche la robes no les carenea descheche se volessa, se se taca a la malasort ma, a ge pissèr delvers, se troa semper ence la vera caujes de che che no va.

Coscì l’é stat ence te la ultima partides del Fascia Balon, olache a chierir delvers se à troà che anter n eror del portier, un del defensor e un de l’atacant, fosc la sort, mala o bona che la fosse, se la podea meter da na man.

Enstouta ampò, canche dò na partida jièda delvers, olache se à ence padì ma se à tegnù bot, dò esser jic en vantac e aer proà a troèr ence l secondo gol, ciapèr l gol de la parità a l’ultim menut de recuperament del secondo temp e dir adaut “che desfortuné che sion” segur no l’é stat massa.

Ence perché la parità la é ruèda aldò de n autogol su na trata dal cianton che no la era. E se pisson che trei dis dant, te la partida de Copa Provinzia, semper en vantac de un a nia (trata dai unesc metrese de Debertol), a trèr te usc fascian la bala del un a un final l’era stat l defensor ladin Luca Trottner, emben tirèr cà la malasort fosc no l’é deldut falà.

Desche scrit, l Fascia aea troà l vantac, endò co na trata dai unesc metres de Debertol, e per dut l prum temp l’à tegnù te man l jech. Tel secondo temp enveze a tegnir vif l jech ge à pissà i patrons de cèsa ampò ge dajan pech da lurèr a Colusso e ge lascian ai fascegn gran post per i contrataches. La soula ocajions per i trentins les é ruèdes sun trates da cet, olache soraldut te na ocajion, l portier del Fascia l’é sgolà per trèr fora dal cianton aut la bala. Da l’autra man i ladins à abù dotrei oportunitèdes con Lorenz, Riz e soraldut con Cigolla che se à vedù rebater na gran trata dal portier ghest, sutà fora da l’usc a eies seré. E l’é su chesta ocajions mencèdes che i bec de mister Chelodi cogn se bater l prust, ajache ensotuta scì, te l’ultim menut la malasort ge à metù la man.

Dut ensema, l’un a un a Gardol contra chesta squadra, seguramenter la miora scontrèda enscin ades dal Fascia, l’é n pecià per coche l’é ruà ma no l’é na desfata. Da ades inant però no se pel perder etres ponc. A scomenzèr da anché domarena, a Vich da mesa les cater contra l Giovo.

 

Su la Usc nr 41 stampèda ai 19 de otober troède ence la classifica e i resultac de la squadra mendres

 (Cristoforo Debertol)