Partides scombatudes, mile emozions

Data

20 de otober 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
N auter week-end de hockey l’é ruà a sia fin. Descorion i resultac fascegn te la categorìes mendres

Ence chel di 13-14 de otober l’é stat n fin de setemèna pien de partides de hockey che à vedù bec de vigni età tor pèrt a la endesfides zenza tema e con la voa de venjer e defener i colores de sia mondura. Chi che se à regolà de brun e bianch per tegnir aut l’inom de Fascia se à bon sproà, con bona prestazions e partides dassen scombatudes.

Chel che cognea esser n dopie confront anter Fascia e Fiem se à mudà te na partida soula ajache l’endesfida de l’U.13 é stata sburlèda.

L team U.15 te sia Dolomiti Cup à enveze jià e batù apontin l Valdifiemme JTH per 7 a 5. Francesco Pezzei à portà inant i bienc e bruns enscin dai prumes momenc con n gol dò 32 seconc de jech. L prum temp é fenì 2 a 2 con n auter gol fascian de Igor Cassan, che amò tel secondo temp à portà endò inant i Falcons. L Fiem à troà amò la via de la parità, ma dò l Fascia à segnà 4 goi de fila con Juri Riz (2), Stefano Talmon e Stefano Iori. Con chesta venta, la squadra se porta al terzo post con 3 ponts en classifica.

Doi partides de gran livel e n muie scombatudes é states cheles del Fascia/Alleghe te l’U.17 e 19. Tel giron C de l’U.17 l Fascia/Alleghe à perdù con l’HC Real Torino, se vadagnan aboncont 1 pont dò la desfata ruèda ai shootout. La partida era fenida 2 a 2 de gra a na bela rimonta coi goi de Pietro Pellegrin e Cristiano Talmon. I rigores no à enveze portà ben, con 5 fai per man dant del dezisif gol del Torin con Matteo Liprandi. Con chesta venta l’HC Real Torino se arvejina al Fascia en classifica, che l’é ades al terzo post con 4 ponts.

N’autra desfata, enceben dò na partida piena de emozions, é ruèda per l Fascia U. 19, che se jia chest an l campionat te n team unich con l’Alleghe Hockey. De contra al HC Valpellice Bulldogs i goi de Andrea Ploner, Francesco Soppelsa e Edgar de Toni no é basté per schivèr la desfata, a cauja di 5 goi encassé anter l prum e l secondo temp de jech. La classifica no ge grigna al team U.19 che l’é te chest moment 12° con 6 ponts.

La proscima endesfides di fascegn sarà de contra al Piné per chel che vèrda l’U.13 (sabeda 20, Dèlba), HC Toblach per l’U.15 (domenia 21, Dobbiaco), WSV Sterzing-Vipiteno (jebia 18, Vipiteno) e amò de contra al Vipiteno per l team U.19 (domenia 21, Alleghe).

 (Daniele Verra)