Na parità strenta contra l Monte Ozolo

Data

04 de november 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Demò n pont vadagnà per nesc jiadores te la partida de campionat enceben l bon jech e la lingia de ocajions abudes. Bon ejit enveze te Copa Provinzia olache i se à vadagnà la semifinèla 

Podea esser na setemèna perfeta chela che en domenia passèda se à serà sù co la endesfida contra l Monte Ozolo, te l’auta Val de Non. Ampò, sul senester ciamp de Cloz, fat pesoch da la pievia, l Fascia no é stat bon de troèr l gol che fossa stat dassen vadagnà e che aessa dat la terza venta te set dis.

Ai bec fascegn ge era stat domanà de dèr seghit a la venta contra l Giovo, tant per la classifica che per l moral. E i ladins aea sobito responet delvers te la partida de Copa Provinzia jièda en jebia ai 25 de otober a Martignano contra l Monte Vaccino. Per passèr servìa venjer con amancol doi goi de desferenza e, enceben sot de un a nia a la fin del prum temp, ti secondi carantacinch de jech Debertol e compagnes à schicià i aversaries desche mai fat dant, troan ti prumes ot menuc cater goi e de fat ence la calificazion. A serèr sù dant de la fin de la partida l’é ruà ence l quinto gol. L Fascia se à coscì vadagnà l met de se jièr tel meis de mèrz la doi partides de semifinèla contra la Trambileno.

Mingol stencé ma con gran gaissa, i joegn de mister Chelodi à portà ence te Val de Non n bel spirit de squadra e na gran voa de venjer. Enceben che l ciamp no semper l lo conzedea, l Fascia à proà a jièr la bala se pojan soraldut su Deluca, metan ensema de bela jièdes e ge dajan più che vèlch cruzie ai defensores de cèsa.

Lejé l’articol entriech con apede i resultac del setor mender su la Usc nr 43 stampèda ai 2 de november

 (Cristoforo Debertol)