Cortina e Gherdena OK, Fascia resta endò

Data

07 de dezember 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La ultima doi giornèdes de campionat ne à contà de na bona reazion de Cortina e Gherdena. L Fascia l’é enveze jit de contra a doi desfates

L campionat de Alps Hockey League, dò la picola paussa per la nazionèles, l’é endò da nef pontà via, con l Pustertal Wölfe a fèr semper da patron, enceben la neva de la pruma desfata de la sajon ruèda de contra al Renon per 5 a 2. N azident de pecia emportanza chel di pusteres, ajache l vantac su la seconda forzes del campionat, l VEU Feldkirch e l Red Bull Hockey Juniors a 40 ponts, l resta gran e segur.

Descorsc da auta classifica chisc, che per desgrazia i no revèrda la squadra ladines. Dò na senestra pruma pèrt de sajon e la trei desfates ruèdes en sabeda ai 24 de november de contra a Pusteria, Renon e Vipiteno, la squadres ladines era chiamèdes a na setemèna bona, a na forta reazion. A responer prejent l’é stat tant l Cortina che l Gherdena, che se à vadagnà 6 ponts te doi partides.

L Cortina à dant batù l Fascia Falcons (3:4) tel derby ladin al Scola de Dèlba ai 29 de november e dapodò l se à vadagnà amò na venta te sie stadie Olimpich de contra al EHC Alge Elastic Lustenau (5:3). Ence l Gherdena à fat n bel saut inant. Ai 29 de november e al prum de dezember i ladins à jià e avent a Selva al Pranives de contra al Milan (4:0) e al EC Bregenzwald (3:2). Gherdena e Cortina se à coscita troà al 10° e 11° post en classifica, respetivamenter con 30 e 27 ponts.

Chi che no é stac bogn de se trèr sù, restan coscita a 5 ponts en classifica a l’ultim post dessema al EC KAC II, l’é stat enveze apontin i bec del Fascia Falcons. I fascegn, dò aer perdù l derby ladin col Cortina te na partida jièda e dassen scombatuda fin al ultim second, i à cognù ge fèr front a la seconda forza del campionat, i Red Bull Hockey Juniors a Salisburgo. La partida é fenida 7 a 0 per i patrons de cèsa.

Enceben la gran dificoltà su la giacia che per endèna é do a viver l Fascia Falcons, la sozietà é stata bona de se fèr aprijièr per la bela scomenzadiva metuda a jir en jebia ai 29 de november te la giornèda del derby ladin. De gra a la colaborazion anter la sozietà sportiva e i Krampus da Poza l’é stat realisà na gustegola scomenzadiva benefica a pro de la Sociazion Bambi.

La proscima endesfides per la ladines les sarà doman, en sabeda ai 8, con n auter derby ladin anter Cortina e Gherdena tel stadie Olimpich e de contra a la pruma de la clas, l Pustertal Wölfe, al Scola per l Fascia Falcons.

De più su la Usc nr 48 stampèda ai 7 de dezember, olache troède ence i resultac di falchec te la categorìes mendres

 (Daniele Verra)