La Usc di Ladins

Lucia Dellagiacoma l’é la responsabola del Servije infermieristich de Fascia e ence ela à cognù reorganisèr dut l lurier de sie staff. Ge aon domanà co che i fèsc ades.

Co ve aede endrezà te chesta emergenza?
Te chest moment con me sion de 5 infermieres, ajache 3 endana no le laora per autre rejon. Doi e mez se cruzia de le persone col virus e doi e mez i va da chi che ge stajaane dò dant. Proprio per schivar più che l’é meso i contac e donca l pericol de se ciapar sù valch o ence de l portar, aon limità dut chel che l’era possibol de jir te le ciase e per chel che l’é meso monitoron le situazion al telefon, se fajon dir dut chel che serf per tegnir sot control la patologìa che i à e jon de persona demò se l’é proprio de besegn.

Ence i prelieves vegnei fac demò su prenotazion?

L’indicazion da l’Azienda l’era de i far su apuntament, ma no aane amò l’aparat per poder jir a se prenotar, donca aon metù fora de i far demò se l’é proprio besegn, la jent se à autolimità e n vegn dalbon pec.

Per l tampon e i despositives de protezion co siede metui?
Noi operatores sanitares aon cognù duc far l tampon, ence se no aane nesciun sintom, per esser segures de no slariar fora l virus. Noi sion de pec e i tampons i aane, ence se sé che no l’é stat sorì i reperir sobito, ma ades i é. Per grazia noi infermieres noi sion resulté duc negatives e no l’é nesciugn en carantena. Dal scomenz noi luron col couribocia, aon chel chirurgich, no chel FFP3, ajache jon dò a la desposizions che perveit canche se cogn meter chel chirurgich e i caji olache enveze ge vel aer chi col livel filtrant più aut. Segur de chisc dispositives no n’é n muie, se cogn vardar te i tegnir desché l’òr, ma canche l’é besegn de jir zaolà che i serf, i aon.

Co fajede canche cognede jir da chi che é positives?
A ciasa de chi enfeté se cogn jir con duta la protezion perveduda, ma ence da chisc se va demò se l’é proprio de besegn. Chi che à sintomes i vegn chiamé doi oute en dì e i ne dasc duc i dac che é pervedui da l’APSS per l Covid-19, che l’é la fiora, la tos, l strach, l mal, la fadìa a trar l fià e, se l’é besegn de la monitorar, ence la saturazion. 

N’él n muie?
Te Fascia de chi che à sintomes e che saon che i à jà fat l tampon n’é anter 60 e 70. Te chi passa 170 positives che aon te Fascia dai dac provinziai l’é ence chi ricoveré e dapò i familiares de chi che à fat l tampon se i à i sintomes i vegn duc conscidré positives. A chisc no serf ge far l tampon ades, se speta a l far dò per veder se i é varii. Ades l’Azienda ne à dat disposizion che cogn passar 14 dis da canche no i à più nesciun sintom, no demò fiora ma nience mal al col, tos o fadìa a trar l fià, e dapò i ge fasc l tampon 2 oute, se l vegn dute doi le oute negatif se pel dir che la persona la é varida e no l’é più n pericol per i autres. No se sà però per cotant de temp che dura l’imunità.

De più su La Usc stampèda de vender ai 3 de oril 2020.

 (Lucia Gross)