La Usc di Ladins

Da dotrei dis se rejonèa de la distribuzion di couribocia che la Provinzia de Trent à emprometù de dèr fora te dut l Trentin. Anché sabeda ai 4 de oril i couribocia é rué ti Comuns de Cianacei e Ciampedel. Chisc doi comuns, defat, ensema con etres 3 del Trentin, i é stac metui sot maor atenzion ajache i à passà via l 2% di positives al virus e per chest la Provinzia à metù en doura desposizions particolères.

Anter chestes l’é la consegna sobito di couribocia, che i Studafech à scomenzà sobito a portèr fora ai sentadins te sia majons. L’é emportant recordèr che l’é apontin i Studafech volontadives del paìsc, donca jent cognosciuda, che fèsc chest servije, ajache l’é jit stroz ence notizies fausses de malintenzioné che va stroz a ge sonèr a la jent con la scusa de chesta consegnes o de fèr l tampon.

L’era, descheche aon dit “fake news”, ampò l’é emportant che noscia jent sapie che nesciugn che no i cognosc vegn mané zenza comunicazion mirèda a portèr vèlch o fèr servijes ai sentadins te sia majon.

I Studafech, ence ic con l couribocia, i lascia chisc presidies per la protezion, 2 per vigni sentadin, fora da usc o te la casseta de la letres, o en cajo i sona per avisèr che i li à lascé de fora.

N servije emportant chest fat dai volontadives, e no l’é l soul te chisc tempes, coche ne disc l’ispetor del Distret di Studafech de Fascia Giancarlo Pederiva.

“I couribocia i é rué anché e peisse che i vegne dac fora amò en giornada a Cianacei e Ciampedel dai studafech. Ti autres comuns enveze peisse che i servirà canche vegnarà dat le neve desposizion che ge permet a la jent de jir fora mingol de più , ma con chesta portezion.

Te chest temp de emergenza fin dal scomenz i ne à domanà de far l servije de jir stroz per le strade a slariar fora l messaje preregistrà da la Provinzia che ge recorda a duta la jent che la cogn star a ciasa. Chest l’é stat fat te duc i paìjes del Trentin e jiron inant de segur amancol fin en lunesc, dapò vedon le istruzion che i ne dasc.

Per l rest en general posse dir che i studafech i é stac tegnui mingol da na man – spiega Pederiva - no i ne à metù en pruma linea per ne tegnir mingol stravardé, percheche no sie pericol che ne rue ite l virus ence te nesc gropes.

I Studafech de Cianacei jà dant e ades ence chi de Ciampedel i se rangia daìte da so paìsc, zenza se mescedar coi autres: se l’é intervenc più gregn i vegn fac ensema dai autres gropes, ma no da chi de chisc doi comuns. Se l’é da entervegnir col 118 aon duc i protocoi e le disposizion pervedude, per ejempie no podon più jir più diretamenter sul malà, ence se l’é situazion che no à nia a veder col Covid-19, noi cognon star più dalonc.

Per l rest ence nesc volontadives i cogn respetar le regole che val per duc i sentadins, dute le norme de igiene e soraldut no jir stroz se no i cogn o no l’é proprio de besegn.”

 (Lucia Gross)