»Gio te stravarde te, tu tu me stravarde me«

Data

06 de auril 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Te dut l Trentin da en mèrtesc ai 7 de oril se cogn durèr l couribocia te boteighes e locai averc al publich. Te Fascia i é stac metui a la leta de duc i sentadins.


Con doman, en mèrtesc ai 7 de oril, te duta la Provinzia de Trent se podarà jir te boteighes e lesc seré olache l’é de autra persones demò con bocia e nès corii. L’ordenanza è stata data fora da la provinzia de Trent, ma te vèlch Comun de Fascia la era jà stata metuda en esser da vèlch dì.

I prumes l’é stat i Comuns de Cianacei e Ciampedel, che con etres 3 comuns del Trentin era stac metui sot a control più rigorous da la PAT jà ai 3 de oril. Chiò ai 4 de oril l’é stat donca dat fora i couribocia sporc da la PAT, e porté te duta la majons dai Studafech.

Endèna aboncont ence de etres Comuns à tacà a se ativèr: l Comun de Sèn Jan aea dezidù de sotescriver l’ordenanza jà ai 29 de mèrz.

L’ombolt Giulio Florian ne à dit che, ajache se sà che troèr chesta sort de presidies de protezion sanitèra no l’é sorì te chisc tempes, spetan che vegne dat fora i couribocia da la Provinzia de Trent ence ti etres paìjes, i Comuns de Fascia à podù fèr cont su la donazion de na sentadina de Poza, che l’à sport 8000 couribocia che é stac spartii fora anter i comuns de Sèn Jan (3000), Mazin (1000), Soraga (1000) e Moena (3000). Duta la Jonta del Comun de Sèn Jan – ne à dit amò l’ombolt Florian – à lurà en sabeda e domenia per poder fèr ite en segureza chisc coutribocia, che è stac porté fora dai studafech amò en domenia, a na vida che per canche jirà en doura l’ordenanza duc i posse i aer a la leta.

Vegn dat fora un couribocia per families con una soula persona e 2 per chelec con più jent. Te la confezion l’é stat metù ence doi letres, chela de l’ordenanza e n’autra che spiega coche à da vegnir durà chisc couribocia, che i pel vegnir duré più outes ma semper demò da la medema persona. L titol de la letra l’é »Gio te stravarde te, tu tu me stravarde me«, ajache vegn spiegà che chesta sort de couribocia no i serf a stravardar chi che li doura, ma a stravardar i etres. Duc podassane portar stroz l virus, ence se no aon sintoms, donca se ogneun fèsc sia pèrt, duran l couribocia e se sà ben respetan ence duta l’autra normes de prevenzion, podon se defener un co l’auter.

Maor informazions su la desvaliva sort de couribocia sarà da poder lejer su La Usc stampèda de vender ai 10 de oril.

 (Lucia Gross)