Nef sistem de oraries per i dotores de Fascia

Data

17 de mei 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Chisc dis passé l’é nasciù la Sociazion “Medici Fassa” e l’é stat metù a jir na reorganisazion per la vijites e i oraries, che ades perveit ence i ambulatories su apuntament.
L’é pontà via coi 15 de mé na reorganisazion del servije di dotores de familia: l’é nasciù la sociazion “Medici Fassa” metuda sù dai dotores Orazio Braghenti, Monica Costantini, Guido Dalprà e Salvatore Reina, perveduda da l’“Accordo Collettivo”, nazionèl e provinzièl, che regolamentea l’atività de la medejina generèla. Chesta l’é na vida de lurèr neva, olache i dotores coordenea anter de ic l’atività, per miorèr l’assistenza a si pazienc. La sociazion “Medici Fassa” é stata pissèda acioche i pazienc no cogne più fèr longia coudes per jir dal medico e canche un dotor l’é en feries l’é la segureza de aer sostituc califiché e che se cognosc, ajache i dotores che fèsc pèrt de la sociazion pel tor l post di etres. I cater dotores che aderesc a la sociazion se cruzia ence che i studies reste averc per 8 ores en dì per 5 dis en setemèna, con n studie avert fin les 7 da sera. La sociazion di dotores de Fascia é a la leta demò di pazienc di dotores che n fèsc pèrt. I pazienc turisć cogn se oujer demò ai dotores enciarié del Servije de Medejina Turistica e no ai etres coleghes de la sociazion. Che mudel pa per i pazienc? Per i pazienc l’é novitèdes emportantes per chel che vèrda la vijites, i oraries de vijita e i ambulatories. Per schivèr che la jent cogne spetèr al lonch te ambulatorie l’é stat pissà de endrezèr oraries de vijita su prenotazion. Ogne dotor à metù jù si oraries, per chest i pazienc cogn se enformèr da sie dotor o jir te ambulatorie olache l’é stat metù fora duta la informazions. La dotora Costantini, per ejempie, ades la fèsc vijita ence te ambulatorie de Soraga, che l’é la senta zentrèla de la neva sociazion olache fèsc ambulatorie duc i dotores che n fèsc pèrt. De più su La Usc stampèda che vegn fora ai 19 de mé.