Giancarlo Secchi de Ciampedel pert la vita sa mont

Data

12 de agost 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Anché dadoman l’aea giusta fenì la via ferèda Piazzetta sot Piz Boè e fosc, endèna che l chierìa l colet te prossach, l’à perdù l’equilibrie e l’é sutà jù da la crepa.

Gran desgrazia per Ciampedel, anché dadoman sun Pordoi l’é mort Giancarlo Secchi de 58 egn lurierant de la Sitc. L’era n gran pascionà di monts, ge saea bel jir a pe e a fèr via ferèdes.

Anché, desche duc i dis che l podea, l’era pontà demez da cèsa per jir a fèr n’autra ferèda: la Piazzetta che pèrt dal Jouf de Pordoi (ló da l’Ossarie) e la rua pech sot l spiz d Piz Boé.

L’era soul e sie corp mort l’é stat troà a pec metres da sie prossach da etres escursionisć che i era dò a fèr la medema via ferèda. Sul post l’é ruà sobito l Pelikan de Persenon che l se aea fermà coran ence ja Poza a tor sù l socoridor Luigi Felicetti “Pastina” ence el da Ciampedel. Canche i é rué sul post, Giancarlo l’era jà mort per i gregn colpes giapé. L’aea jà fenì la via ferèda e l’aea amò l’embrago. Se peissa che l’abie perdù l’equilibrie a se tor fora l colet da prossach, ma no se sà nience se l se abie enveze sentù mèl.

Ades l mort, portà da la piazola a la capela dal Socors da Mont de Rèba l’é vin Fodom, percheche la via ferèda la é sul tegnir de Belun.

Giancarlo Secchi no l’era maridà e no l’aea fies. L’era l fra de Loris, Bruno e Fiorenzo, l’aea en dut chinesc nec. L lurèa dut l’an sui impianc portamont de Rodela. Tant l menacrep Luigi Felicetti, che l’ombolt de Ciampedel Ivo Bernard e l vize president de la Sitc Daniele Dezulian i lo recorda desche na persona umola e n gran lurierant, ma soraldut n gran, gran pascionà de la mont: l cognoscea vigni vièl e troi e se l scontrèa bendeché canche se jia a se fèr na raida. Vigni fin de setemèna de bon temp l jia sa mont. L’aea fat duta canta la via ferèdes, tant chiò che fora, ence ju per Mori e Riva del Garda.

Te paìsc de Ciampedel e te duta Fascia l’era benvolù, na persona resservèda e valenta. 




 (vr)