Guides fascènes su la forenadoa

Data

22 de setember 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Gran bel resultat l’é stat arjont chest istà da la sezion Cati Sat Auta Fascia su la forenadoa Dolèda ta Dèlba.

Se à serà sù con gran sodisfazion l servige de informazion – a titol de volontariat - fat da noscia Sezion ogni mèrtesc e mercol ti meisc de messèl e aost su la forenadoa Dolèda, ta Dèlba.

Sodisfazion no demò per nos, ma soraldut per i ghesć che de n muion se servìa de chest meso per jir sa mont e de segur ence per la Sozietà Dolèda che ne à domanà de fèr l servige.

Ogni mèrtesc e ogni mercol i sozi de la Sezion se à metù a la leta con pascion e competenza; dant fora i se à studià che dir e co informèr i sciores, ajache se volea fèr bela fegura e soraldut se troèr vertesc a responer a duta la domanes che ne vegnìa fates.

Ben segur prum de dut vegnìa dat n salut de benvegnù e n gran e sinzier develpai per aer chierì fora noscia bela Val per se fèr la vacanzes.

L salut vegnìa dat te nosc lengaz ladin e dapodò per talian, todesch o ingleis, a seconda di sciores che l’era te cabina de la forenadoa. Dapodò se dijea la carateristiches de chest modern impiant portamont e, ajache l percors l’é dassen maraveous, se se conzentrèa sobito su la vedudes, su la beliscima pizes che se veit, sui prees e pèscoi da mont, su olache se rua dò i ot menuc de viac e olache se pel jir da sunsom Col di Rosc.

Rué sun Col di Rosc/Belvedere se compagnèa fora de forenadoa i sciores e amò aló sun reja de la stazion a mont, vegnìa responet a n muie de domanes, curiositèdes e se sotrissèa la veduda da marevea di 234 monc che se veit. Apede se rejonèa del troi 601 Vièl dal pan, de coche se rua vin Pordoi  e de l’ardida forenadoa che rua sun Sas Pordoi, del Boè, del Grop del Sela col Piz Ciavazes, l sompian de la Mesules, del beliscim Saslench, del Rosengarten-Cianedac, e coscita inant.

Ben segur la Marmolèda, la reìna de la Dolomites tegnìa banco, enceben che chest an la moscèa dut so gran padiment e fadìa per stravardèr chel che resta de sia giaces.

Sul viac a jir de retorn la cabina la era semper manco piena e coscita se podea aer n raport più diret coi ghesć: se podea rejonèr e coer sù vèlch imprescion o vèlch marevea.

De solit se dijea proprio che se aessa contà vèlch curiosità, ajache di monc e de la vedudes i se n’aea jà tout pien i eies. Bel apontin se trajea ca e se parlèa de la “Dolomites Patrimonie Unesco” nominan i monc e i lesc che in fèsc pèrt e se spieghèa la simbologìa del logo e del perché su la dreta l porta l’inom Dolomites ti cater lengac: talian, todesch, ladin e furlan. Se à schèji ogni outa rejonà del fat del jouf del Sela serà ai auti vigni mercol e se domanèa colun che l’era so pensier. Se ge spieghèa che l’é na endesfida touta sù da la Region Trentin Sudtirol ajache chest an la Nazions Unides à proclamà l’an 2017 “an del turism sostenibol”.

L’é stat trat ca la storia di Ladins de Fascia, del lengaz che vegn durà ti ofizies publics, de la pèrt de rilief de la scola ladina, zenza se desmentièr de l’Istitut cultural e Museo de Fascia. Se moscèa fora - Pian de Ciampedel -  e se ge dijea de la vila ladines che l’era e che l’é amò anchecondì te val.

Amò apede noscia tradizions religiouses e no e del bel carnascèr fascian.

No podea mencèr l mond encantejimà de la lejendes ladines e tel moment che se passèa sora Dolèda, no mencèa de menzionèr  de la richenta Contessa de Dolèda che ogni sabeda o vea de festa, montèda sun sie bel ciaval bianch e la peèa via per jir ja Sènt’Ugèna e che canche la ruèa sun pent de Soal, la ciampènes les scomenzèa a sonèr.

Auter argoment n muie aprijià l’é stat chel de la geologìa; la desferenzes de la crepes de Dolomia, opura del calcar de la Marmolèda e amò de la crepa neigres di vulchegn.

Ence l teritorie, l bosch, la piantes e frutam palesèa n muie de interess. No parlon pa de la besties da mont, ajache can de no se vedea caprioi, muflons, ciamorces, cerves e sessaben montagnoles.

No se aon desmentià de dir del gran patrimonie di troes da mont che l’é te val, de sie cataster, de la manutenzion, di segnes e la tabeles che vegn menù sù e curà apontin da noscia Sezion.

Cognon dir che l’impegn l’é stat bel e bon grief e impegnatif, ma che l ne à dat de gran sodisfazions e sion contenc de l’aer fat, soraldut con gran serietà e profescionalità, enceben da volontadives e no da profescionisć.

Aon vedù e palesà con man che i sciores i à dassen aprijià la scomenzadiva; n muie de outes i ne a batù la mans, i se à congratulà a ousc e ence i ne à strent la man per ne dir develpai. Apede i ne à cognosciù fora per Cianacei e i ne a fermà a ciacolèr e jir amò a fon te vèlch argoment.

Dut l Consei e diretif de la sezion tras la presidenta Licia, vel ge sporjer n develapi a duc i volontadives che se à dat jù: Teresa, Dino, Gabriella, Rosanna, Diego, Alessia, Sia, Giuliano, Sara, Marika, Assunta, Licia e ence a Osvald per la traslazion di tesć per todesć.

N rengraziament va a la Sozietà Dolèda che la n’à dat fiduzia.

 (Maria Assunta Merli)