“Gé, tu e l sport”

Data

12 de otober 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks

Anché, jebia ai 12 de otober, da mesa les 6 te Comun general de Fascia pea via n cors per fèr video con riprejes e paroles ladines.


L’é na ocajion de formazion e na endesfida anter joegn e gropes tel ciamp del sport: la creazion de video con riprejes fates te Fascia e portèdes dant con dialogs, tesć e grafica per ladin.

L’à inom “Gé, tu e l sport” e l’é n cors con 6 apuntamenc che ponta via en jebia ai 12 de otober da mesa les 6 da sera te sala del Consei del Comun general de Fascia.

Dut é nasciù da na proponeta portèda dant da Jacopo Bernard, joen regist del program de sport per ladin Finalzil, e touta sù dal Comun general de Fascia. Jacopo Bernard, co la colaborazion di joegn condutores de Finalzil met a jir n projet dedicà a joegn e sociazions de sport per la realisazion de video olache la scenes les va ensema con paroles e tesć per ladin.

La scomenzadiva à l’obietif de ge ensegnèr ai partezipanc a meter ensema video en cont de argomenc sportives te Fascia dal pont de veduda de la riprejes, de la redazion de tesć giornalistics e de la doura del lengaz ladin, col didament de la redazion de Fascia de “la Usc di ladins” e de l’Istitut cultural ladin Majon di Fascegn.

I partezipanc, da soi o en grop, sarà didé a meter en esser sie projet te doi meisc. I video più bie vegnarà premié e mané fora desche programes de Finalzil. Chi che se engaissarà a tor ju o a scriver e portèr dant neves per ladin podarà fèr ence na esperienza de conduzion di programes per la televijion del Comun general.

L’é pervedù 6 scontrèdes pean via da chesta jebia ai 12 de otober. La dates e i oraries di etres apuntamenc vegnarà dezidui endèna la pruma scontrèda aldò di besegnes e de la desponibilità di partezipanc.

Tor pèrt no à negun cost e no l’é pervedù enscinuazion dantfora.

Per informazions: Servijes linguistics e culturèi del Comun general de Fascia: tel. 0462762158 o mail cultura@comungeneraldefascia.tn.it.

Galaria retrac