Chi bec de Sas Becé

Data

13 de dezember 2017

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
En jebia ai 14 de dezember l’é l 80cedean de la levina che à caujà la mort de 8 fenc, aspiranc maestres de schi.


L’era de dezember del 1937 canche, tel paìsc de Cianacei olache tachèa a se fèr strèda l turism, 20 fenc sche duc fascegn aea tacà a fèr n cors per doventèr maestres de schi: n nef mestier, na possibola fontèna de vadagn se vajea lèrga te na val amò en meseria.

Chel dì, ai 14 de dezember, con l’istrutor Hans Steger i se aea envià via per jir a se arcedèr sun Sas Becé, ma entorn mesa la does se à destacà na levina che ge é jita encontra ai 20 joegn.

Na pèrt i é stac bogn de se salvèr, e i à tacà a chierir i compagnes tel gran mont de neif che passèa via i 4 metres, ma per 8 de ic no l’é più stat nia da fèr. L’era Luigi Bernard da Grìes, Giuseppe Bernard da Ciampedel, Giuseppe Donei da Moena, Tullio Gabrielli da Poza, Roberto Perathoner da Cianacei, Raimondo Soraperra da Dèlba, Ferdinand Wiedenhofer da Neva e Sigfried Stolz da Busan. Chi de età amò se recorda l’imprescion, la desperazion, l clim ireèl de chela sepoltura e la gran proa de degnità e de solidarietà data da la jent de Fascia te chela ocajion.

Acà 10 egn l Comun e la Frazion de Cianacei à volù recordèr chest grief fat de noscia storia con n libret: “Quei ragazzi del Sas Becé”, metù ensema da Elisa Salvi e Marzia Demarchi. Chest an la vitimes vegn recordèdes en jebia ai 14 de dezember te na messa de recordanza per i 80 egn da chela gran tragedia te gejia de Sèn Florian da les 6 da sera.

 (lg)